LUKA 22:7-54

⁷Idadzafika nthawe ya cikondweso ca Mikate. Ndipo ntsiku imweyo bzikhafunika kuti kuphedwe kabira kakuikhira nako ntsembe ya Paxikwa.

⁸Ndipo Jezu adatuma Pedru na Juwau aciwauza kuti: Ndokoni mukondze cikondweso ca Paxikwa, kuti tidzadye.

⁹Ndipo iwo adamubvundza kuti: “Kodi mun'funa kuti tikakondzere kuponi?”

¹⁰Ndipo Jezu adawatawira aciti: “Mukafika mumzindamo mun'kaona munthu adasendza tacu ya madzi. Mukamutewere mpaka panyumba yomwe an'kapitayo.

¹¹Ndipo mukamuwuze mwenekaciro nyumbayo kuti Misiri atituma kuti tidzabvundze kuti: “Kodi iri kuponi nyumba ya alendo yomwe iwo na ateweri wao an'funa kudzadyera cikondweso ca Paxikwa?”

¹²Ndipo iye an'kakulatizani nyumba ikulu ya m'ndzulu yomwe ina bzombo bzentse, imwepo mukakondzere mwemo.

¹³Pomwe iwo adayenda adakawona bzentse ninga momwe iye adawawuzira. Ndipo iwo adakakondza cikondweso ca Paxikwayo.

¹⁴Pomwe nthawe idakwana, Jezu adakhala patsantsali lakudyera pabodzi na atumiki wace.

¹⁵Ndipo iye adawawuza kuti: Ndikhafuna kale kuti ndidyenamwe pabodzi Paxikwai, pomwe ndikanati kuyamba kubonera.

¹⁶Na tenepo ndirikukuwuzani cadidi kuti: Nin'dzaidya lini pomwe, mpaka cikadzacitika cire caico ca mu Umambo bwa Mulungu.

¹⁷Ndipo adatenga m'kombo aciwusimba aciti: “Tambirani mumwe pabobzi.”

¹⁸Na tenepo ndirikukuwuzisai kuti ndinidzamwa lini pomwe msuzi wa uva, mpaka kufika kwa umambo bwa Mulungu.

¹⁹Ndipo iye adatenga pomwe mkate aciwusimba, adaubedula aciti: “Iri ni thupi rangu lomwe ndakupasaniri. Mbacitani bzimwebzi mucimbandikumbukira.

²⁰Pomwe adamala kudya adacita pomwe bzibodzibodzibzo ndipo adatenga mkombo acilewa kuti: M'komboyu ngwa ciphatano cipsa ca mulopa wangu omwe wataikira imwepo.”

²¹Tsono dziwani kuti nyakundipindukira ndidakhala naye pabodzi patsantsali lakudyera pano.

²²Nakuti Mwana wa Munthu aniyenda kukafa cadidi ninga momwe bzidalewedwa. Tsono tsoka kuna munthu nyakumupindukirayo.

²³Pamwepo iwo adayamba kumbabvundzana aciti: “Kodi mbani wa ife-pano omwe an'funa kumupindukirayo?” .

²⁴Ndipo ateweri wace adayamba kuganizana kuti mkulu mbani pakati pawo.

²⁵Tsono Jezu adawawuza kuti: Azimambo wa wanthu ana mpambvu zakuwatonga. Ndipo iwo ambafuna kuyesedwa wanthu wabwino.

²⁶Tsono kuna imwepo mbabzileke kukhala tenepoyo. Nkulu pakati panupa mbaakhale ninga ng'ono. Ndipo m'tsogoleri mbaakhale ninga nyakutumika.

²⁷Kodi mkulu mbani na munthu omwe adakhala patsantsali lakudyera na ule omwe ali kutumika? Ngule omwe adakala patsantsaliyo. Na tenepombo kuna imwepo ine-pano ndiri ninga nyakutumika.

²⁸Imwepo ndimwe mukhanande pakubonera kwangu kwentse.

²⁹Ninga momwe Baba adandipasira umambo, na inembo ndin'kupasanimbo

³⁰kuti mudye na kumwa pabodzi na ine patsantsali lakudyera mu umbambo bwangu. Ndipo mun'dzakhala m'mipando mucidzatonga madzindza khumi na mawiri ya kuJirayeri.

³¹Simau, Simau, cenjera! Sathani wakumbira kale kuti akuwunguleni ninga mapira!

³²Tsono ine ndakukumbirira kale kuti cikhulupiro cako cisaye kumala. Na tenepo iwepo ukadzakhumbula udzakhwimisembo abale wako.

³³Ndipo iye adatawira kuti: Mbuya, ine-pano ndidakondzekera kuti ndiyende namwe kwentse. Napo mkawoko ayai kukafa.”

³⁴Tsono Jezu adamutawira aciti: “Ndiri kukuwuza Pedru kuti lero iwepo un'dilamba katatu kentse uko congwe akanati kulira.

³⁵Ndipo Jezu adawabvundza kuti: “Kodi pomwe ndidakutumani mucisaya kunyamula bzikhwama, na mabudu na xango, ciripo cinthu comwe mudasaya? Ndipo adatawira kuti: “Palibe.”

³⁶Tsono iye adawawuza kuti: Penu munthu ana cikhwama na budu mbaanyamule, na ule omwe alibe mbadzo agulise bhachi wace kuti akagule.”

³⁷Nakuti bzin'funika kuti bzitewezeke kuna ine bzomwe bzidanembedwa kuti: Iye adyesedwa kambowa. Thangwe bzentse bzomwe bzidalewedwa bziri kucitikadi.

³⁸Pamwepo iwo adamuwuza kuti: “Mbuya, tinazo mbadzo bziwiri izi! “Ndipo iyembo adawatawira kuti: “Zakwana.”

³⁹Na tenepo Jezu adayenda mphiri la Olivera ninga ukhali msambo wace. Ndipo ateweri wace adayendambo naye.

⁴⁰Pomwe adafika pambutopo adawawuza aciti: “Pembani kuti musaye kupumpsidwa.”

⁴¹Ndipo iye adafundukira pang'ono ndipo adagodama acimbapemba aciti:

⁴²“Baba, mukafuna cosani m'komboyu kuna ine. Sikuti na kufuna kwangu maka kwanu imwe.

⁴³Pamwepo adawoneka anjo wakudzulu kuti amulimbise mtima.

⁴⁴Pomwe Jezu adabva ciaya adapemba na mphambvu kwene-kwene. Ndipo iye akhacoka kaluma ninga mathotho ya mulopa uli kogoga pantsi.

⁴⁵Ndipo Jezu adalekeza kupemba aciyenda kuna ateweri wace. Pamwepo adakawaguma adagona na kusunama.

⁴⁶Ndipo iye adawabvunza kuti: Kodi mun'goneranyi kani? Lamukani mupembe kuti musaye kupumpsidwa.

⁴⁷Pomwe iye akhalewalewapo, udafika nthithi wa wanthu. Tsono Judasi m'bodzi wa atewweri wace khumi na awiri ndiye akhali patsogolo. Na tenepo iye adafendera pana Jezupo kuti amumuse mpsompsono.

⁴⁸Tsono Jezu adamubvundza kuti: “Judasi, kodi iwepo ulikupereka Mwana wa Munthu na mpsompsonoyu?”

⁴⁹Pomwe ateweri wa Jezu omwe akhali pamwepo adawona bzimwebzo adamubvunza kuti: “Mbuya, kodi tiwateme na mbadzo?”

⁵⁰Na tenepo m'bodzi wao adatema acigwatiratu khutu la didi la nyabasa wa mkulu wa azibaba wa ntsembe.

⁵¹Tsono Jezu adawawuza kuti: “Lekani kucita bzimwebzi.” Iye adamukhuya khutulo licilumikidzika pomwe.

⁵²Ndipo Jezu adawabvundza akulu-akulu wa azibaba wa ntsembewo na atsogoleri wa anyakulindira Nyumba ya Mulungu na atsogoleri wa wanthu kuti: “Kodi imwepo mwabwera na mbadzo na mabhonga kuti mudzandimange ndine kambowa?”

⁵³Nakuti ine-pano ndikhakhala namwe ntsiku zentse m'mnyumba ya Mulungu, ndipo imwe mulibe kundimanga. Tsono ino ni nthawe kuti mucite bzomwe munfuna nakuti Sathani ndiye ali kutonga.

⁵⁴Pamwepo adamuphata aciyenda naye kunyumba ya mkulu wa azibaba wa ntsembe. Ndipo Pedru akhambamutewera na kutali.