San Lucas 22:7-54

⁷Na̱tandaa mé víco̱ tá xíxi na pan ña̱ co̱ quée yusá na̱xia̱a̱ xi̱hi̱n. Mé víco̱ yóho na̱sacaja na ña̱ tá nu̱ cuía̱ ta sáhní na̱ ndicachi válí jóco̱ na̱ nu̱ Ndióxi̱.

⁸Mé qui̱vi̱ já na̱sahnda Jesús chuun nu̱ Pedro xi̱hín nu̱ Juan já na̱cachi a já xi̱hi̱n dá: —Cuáhán ndó caja ndíví ndo̱ ña̱ cajíní vicó pascua —na̱cachi a xi̱hi̱n dá.

⁹A̱nda̱ já na̱cachi da̱ cán já xi̱hi̱n á: —Yo vehe cúni̱ ndó cu̱hu̱n nde̱ ná caja ndíví nde̱ ña̱ cuxú.

¹⁰A̱nda̱ já na̱nducú ñehe Jesús tu̱hun nu̱ dá já na̱cachi a já: —Tá ná qui̱hvi ndó ñuu Jerusalén ja̱n já cuni ndó in da̱ta̱a ta ndójo da in yoo ticui̱í cua̱ha̱n da̱. Candi̱co̱ ndó ja̱ta̱ dá cu̱hu̱n ndo̱ ja̱nda̱ quia̱hva cuni ndó ndá vehe qui̱hvi da.

¹¹Ta já cu̱hu̱n ndó ca̱ha̱n ndó xi̱hi̱n mé da̱ xi̱hín ña̱ha vehe cán já cachi ndó já xi̱hi̱n dá: “Da̱ jána̱ha̱ nde̱he̱ cúú da̱ cáchí xu̱hu̱n: Ndáchí íin nu̱ú coo i̱ cajíni i̱ vicó pascua xi̱hín na̱ xíca tuun xi̱hín i̱.”

¹²A̱nda̱ já jána̱ha̱ mé da̱ cán in cuarto cáhnu ña̱ cánúu ji̱ni̱ véhe piso ni̱nu. Sa̱ íin tia̱hva va ña. Cán caja ndíví ndó ña̱ cajíní —na̱cachi Jesús.

¹³A̱nda̱ já na̱quee ndíví da̱ cán cua̱ha̱n da̱. Ta tá íin na̱cachi Jesús xi̱hi̱n dá coo quia̱hva já ndusa na̱sahi̱in. Ta chí na̱caja ndíví da̱ tócó ndihi ña̱ cajíni na vicó pascua.

¹⁴Tá na̱xi̱nu̱ co̱o hora cajíni na já na̱saco̱o Jesús xi̱hi̱n tócó ndihi na̱ xíca tuun xi̱hi̱n á nu̱ mesa.

¹⁵A̱nda̱ já na̱cachi Jesús já xi̱hi̱n ná: —Sa̱ xíca̱ ndiva̱ha ini i̱ cajíni i̱ vicó pascua yóho xi̱hi̱n ndó nani íin tóo i̱ xi̱hi̱n ndo̱ jáchi̱ va̱xi qui̱ví quivi i̱.

¹⁶Jáchi̱ mé a̱ nda̱a̱ ná ca̱ha̱n i̱ xi̱hi̱n ndo̱ ja̱nda̱ ná xi̱nu̱ qui̱vi̱ cacomí Ndióxi̱ cuéntá sa̱há ña̱yivi a̱nda̱ jáví cajíni tucu u̱ vicó pascua xi̱hi̱n ndo̱ —na̱cachi Jesús xi̱hi̱n ná.

¹⁷A̱nda̱ já na̱tiin a in vaso nu̱ ñúhu tó uva ta na̱ndiquia̱hva ndixa̱hvi nu̱ Ndióxi̱. Ta já na̱cachi a já xi̱hín na̱ xíca tuun xi̱hi̱n á: —Coho ndó dó ñúhu ini vaso yóho ta cahnda java ndó dó nu̱ táhan ndó.

¹⁸Jáchi̱ a̱ ndícó co̱o ga̱ i̱ coho i̱ tó uva ja̱nda̱ quia̱hva ná xi̱nu̱ co̱o qui̱vi̱ cacomí Ndióxi̱ cuéntá sa̱há ña̱yivi —na̱cachi Jesús xi̱hi̱n ná.

¹⁹Tá na̱ndihi na̱tiin a pan ta na̱ndiquia̱hva ndixa̱hvi nu̱ Ndióxi̱ sa̱há. A̱nda̱ já na̱sahnda java ña̱ já na̱sa̱ha̱n ña̱ nu̱ú na̱ xíca tuun xi̱hi̱n á cán já na̱cachi a já xi̱hi̱n ná: —Mé pan yóho cúú á tátu̱hun yiquí cu̱ñu i̱ jáchi̱ ndiquia̱hva i̱ mí i̱ quivi i̱ sa̱há ndihi ndó. Xíní ñúhú caja ndó ña̱ yóho ña̱ ná ndicu̱hu̱n ini ndó ña̱ na̱xi̱hi̱ i̱ sa̱ha̱ ndo̱ —na̱cachi Jesús xi̱hi̱n ná.

²⁰Tá sa̱ na̱ndihi na̱xijíni na ta já na̱tiin a vaso nu̱ ñúhu tó uva ta já na̱cachi a já: —Dó ñúhu ini vaso yóho cúú dó tátu̱hun ni̱í i̱ jáchi̱ cahní na̱ ye̱he̱ ta cui̱ta̱ ni̱í i̱ sa̱ha̱ ndihi ndó. Ta xi̱hín ña̱ yóho xi̱nu̱ co̱o nu̱ú tu̱hun na̱sa̱ha̱n Ndióxi̱ nu̱ú ña̱yivi sa̱nahá tá na̱cachi a jáca̱cu a ña̱yivi.

²¹ʼCuni jo̱ho va̱ha ndó ná ca̱ha̱n i̱ xi̱hi̱n ndo̱. Nu̱ mesa yóho íin coo da̱ ji̱có túhún ye̱he̱.

²²Jáchi̱ ja̱nda̱ sa̱nahá na̱sacu ini Ndióxi̱ ña̱ ndítahan ndoho ini ye̱he̱, da̱ na̱chindahá mé á nduu ña̱yivi. Joo ndáhví na̱cuu da̱ ji̱có túhún ye̱he̱ —na̱cachi Jesús.

²³Xi̱hín ña̱ na̱cachi Jesús yóho na̱casáhá na̱ xíca tuun xi̱hi̱n á cán ndáca̱ tu̱hún táhan na sa̱ha̱ ndá da̱ cúú da̱ sácú ini cu̱hu̱n ji̱có túhún ñahá.

²⁴Tá na̱ndihi já na̱casáhá ndítúhún i̱hvi̱ xi̱hi̱n táhan da̱ xíca tuun xi̱hi̱n Jesús cán sa̱há ndá da̱ cúú da̱ íin chága̱ sa̱ha̱.

²⁵Sa̱há ña̱ cán quéa̱ na̱cachi Jesús já xi̱hín ndihi da̱ cán: —Ndijáá ñuyíví sáhndá rey chuun nu̱ú ña̱yivi tá quia̱hva cúni̱ mé dá. Ta jári cúni̱ da̱ ña̱ ná cachi ña̱yivi sa̱ha̱ dá ña̱ cúú dá da̱ cája va̱ha.

²⁶Joo co̱ó nditahan coo ña̱ cán tañu mé ndó. Ña̱ ndítahan caja ndó quéa̱ tá in ndó cúni̱ ndó cacuu ndó da̱ íin chága̱ sa̱ha̱, xíní ñúhú jánuu ndáha̱ ndó mé ndó tátu̱hun da̱ loho chága̱ nu̱ ndíhi ndó. Ta ndá da̱ cúni̱ cahnda chuun, xíní ñúhú cacuu da tátu̱hun in da̱ cája ndíví nu̱ mesa xitoho da.

²⁷Mé ndó sa̱ cánda̱a̱ va̱ha ini ndó ña̱ íin chága̱ sa̱há da̱ íin coo nu̱ mesa a̱ ju̱ú ga̱ da̱ cája ndíví ñahá. Joo ye̱he̱ na̱jánuu ndáha̱ i̱ mí i̱ ta na̱nduu u̱ tátu̱hun in da̱ cája ndíví nu̱ ndo̱.

²⁸ʼNdóhó cúú ndó na̱ na̱sanduu tuun xi̱hín i̱ nu̱ tócó ndihi ña̱ i̱hvi̱ na̱quixi nu̱ú i̱.

²⁹Sa̱há ña̱ cán quéa̱ tá quia̱hva na̱caja tátá i̱ ña̱ma̱ni̱ xi̱hín i̱ ña̱ ná cacomí i̱ cuéntá sa̱há ña̱yivi quia̱hva já caja i̱ ña̱ma̱ni̱ xi̱hi̱n ndó

³⁰ña̱ ná nditútú ndó canduu ndó xi̱hín i̱ tá ná cacomí i̱ cuéntá sa̱há ña̱yivi. Ta já ná cuu caja vií ndo̱ sa̱há na̱ na̱quixi ndíhu̱xu̱ i̱vi̱ táhndá na̱ na̱quixi chi̱chi Israel —na̱cachi Jesús xi̱hi̱n ná.

³¹A̱nda̱ já na̱ndica̱ha̱n Jesús já na̱cachi a já xi̱hi̱n Pedro: —Simón, cuni jo̱ho va̱hún. Jáchi̱ na̱xi̱ca̱ Satanás, mé tiñáhá sa̱cua̱ha̱ ña̱ma̱ni̱ ña̱ ná coto ndojó rí tócó ndihi ndó tá quia̱hva jáxi̱xi na trigo.

³²Joo sa̱ na̱xi̱ca̱ ta̱hví i̱ nu̱ Ndióxi̱ sa̱ha̱ yóhó, Simón já ná a̱ jándacoún ña̱ cándeé inún ye̱he̱. Ta tá sa̱ na̱ndicó co̱o inún xi̱hín ña̱ cajún ja̱n, ndítahan chindeún java ga̱ na̱ cándeé ini ye̱he̱ já ná coo nda̱cú na̱ íchi̱ cuéntá mí i̱ —na̱cachi Jesús xi̱hi̱n dá.

³³A̱nda̱ já na̱nducú ñehe Pedro tu̱hun nu̱ Jesús já na̱cachi da já xi̱hi̱n á: —Cande̱hé ndo̱, xitoho i̱. Ye̱he̱ sa̱ íin tia̱hva i̱ cu̱hu̱n i̱ veca̱a xi̱hi̱n ndo̱. Ta ja̱nda̱ ná cahní na̱ ye̱he̱ xi̱hi̱n ndo̱ tá cúni̱ na̱ jáchi̱ sa̱ íin tia̱hva vi̱ —na̱cachi da xi̱hi̱n Jesús.

³⁴Já na̱cachi Jesús já xi̱hi̱n dá: —Cande̱hé Pedro ná ca̱ha̱n i̱ ña̱ nda̱a̱ xu̱hu̱n. Mé qui̱ví viti tá cáma̱ni̱ cana chéle já u̱ni̱ tañu chije̱hé tu̱hún sa̱há i̱ ta ca̱hún ña̱ co̱ xíni̱ tohún ye̱he̱ —na̱cachi Jesús xi̱hi̱n dá.

³⁵Tá na̱ndihi já na̱nda̱ca̱ tu̱hún Jesús na̱ xíca tuun xi̱hi̱n á cán já na̱cachi a já xi̱hi̱n ná: —Jihna na̱chindahá i̱ ndo̱hó cu̱hu̱n ndó ca̱ha̱n ndó tu̱hun Ndióxi̱ ta na̱cachi i̱ xi̱hi̱n ndo̱ ña̱ ná a̱ cáñehe ndó yátí ni jiu̱hún ta ni inga ndu̱sa̱ a̱ cáñehe ndó cu̱hu̱n xi̱hi̱n ndo̱. Á na̱ndima̱ní ña̱ha nu̱ ndo̱ tá na̱sa̱ha̱n ndo̱ já —na̱cachi Jesús xi̱hi̱n ná. Já na̱cachi na̱ já: —Ni in ña̱ha co̱ó na̱ndima̱ni̱ nu̱ú nde̱ —na̱cachi na.

³⁶A̱nda̱ já na̱cachi tucu a já xi̱hi̱n ná: —Joo viti co̱ó ga̱ ña̱ cán coo. Viti cáchí i̱ xi̱hi̱n ndo̱ ña̱ tá íin yátí nu̱ ndo̱, xíní ñúhú cañehe ndó ña̱ cu̱hu̱n ndo̱. Cañehe ndó jiu̱hún ndo̱ tá ná quee ndó cu̱hu̱n ndo̱. Ta tá co̱ó machiti nu̱ ndó, xíní ñúhú ji̱có ndó jahmá ndeé ndo̱ já cueen ndó machiti ña̱ ná coo tia̱hva ndó.

³⁷Jáchi̱ sa̱nahá na̱ca̱hyi̱ a̱ nu̱ libro yi̱i̱ Ndióxi̱ ta sa̱há ye̱he̱ na̱ca̱ha̱n tá na̱cachi a já: “Na̱cachi ña̱yivi cúú dá ta̱a quini sa̱há ña̱ cán quéa̱ na̱chitáhan na da̱ xi̱hín ña̱yivi quini.” Tócó ndihi ña̱ na̱ca̱hyi̱ nu̱ú tu̱hun Ndióxi̱ sa̱há ye̱he̱ sa̱nahá xíní ñúhú xi̱nu̱ co̱o a viti —na̱cachi Jesús.

³⁸A̱nda̱ já na̱cachi na̱ xíca tuun xi̱hi̱n á cán já: —Cande̱hé ndo̱, xitoho nde̱. Yóho ñéhe nde̱ i̱vi̱ machiti —na̱cachi na. —Sa̱ íin va̱ha —na̱cachi Jesús xi̱hi̱n ná.

³⁹Tá na̱ndihi já na̱quee Jesús cua̱ha̱n yúcu̱ yíto̱ Olivo nu̱ sá sa̱ha̱n tuun a ca̱ca̱ ta̱hví a̱ nu̱ Ndióxi̱. Ta já ndíco̱ ndihi na̱ xíca tuun xi̱hi̱n á cán ja̱tá cua̱ha̱n na̱.

⁴⁰Ta tá sa̱ na̱xi̱nu̱ co̱o na cán já na̱cachi a já xi̱hi̱n ná: —Ca̱ca̱ ta̱hví ndó nu̱ Ndióxi̱ já ná a̱ ndícava ndó nu̱ú cua̱chi tá ná coto ndojó tiñáhá ndo̱hó —na̱cachi Jesús xi̱hi̱n ná.

⁴¹Tá na̱ndihi já na̱tavá xóo Jesús mé á tañu na̱ cán já na̱sa̱ha̱n tátu̱hun in quia̱hva nu̱ xínu̱ co̱o in yu̱u̱ tá jání yó ña̱ xi̱hi̱n ndáha̱ yo̱. Quia̱hva já na̱caxícá mé á tañu na̱ cán já na̱caxítí a̱ xíca̱ ta̱hví a̱ nu̱ Ndióxi̱.

⁴²Já na̱cachi a já: —Tátá Ndióxi̱, á cuu caja ndó ña̱ma̱ni̱ já ná a̱ ndóho i̱ ña̱ i̱hvi̱ ndiva̱ha ña̱ va̱xi nu̱ú i̱ ndoho i̱. Joo ná coo tá íin cúni̱ mé ndó ná a̱ cóo toho ña̱ cúni̱ ye̱he̱ —cáchí Jesús xíca̱ ta̱hví a̱.

⁴³A̱nda̱ já na̱canáha̱ in táto̱ Ndióxi̱ indiví já na̱xi̱nu̱ a̱ sáhan tu̱hun ndeé ini Jesús.

⁴⁴Ta na̱casáhá ndóho ndiva̱ha ini Jesús jáchi̱ na̱cacuéha̱ ini a. Sa̱há ña̱ cán quéa̱ na̱nducú ndéé chága̱ ví a̱ xíca̱ ta̱hví a̱ nu̱ Ndióxi̱. Ta chí ndícaa mé te̱e̱n á nu̱ ñúhu̱ ta dó cán cúú dó tátu̱hun ni̱i̱ cúyu nu̱ ñúhu̱.

⁴⁵Ta tá na̱ndihi na̱xi̱ca̱ ta̱hví a̱ nu̱ Ndióxi̱ já na̱nda̱ca̱ ndichi a já na̱quee a cua̱ha̱n nu̱ ndúu na̱ xíca tuun xi̱hi̱n á cán. Ta na̱nditahan mé á na̱ ndúu na quíji̱ na̱. A̱ ju̱ú quia̱hva cándií ini na sa̱há ña̱ cán na̱naá ini na na̱qui̱ji̱ na̱.

⁴⁶A̱nda̱ já na̱cachi a já xi̱hi̱n ná: —Ndá cuéntá quéa̱ quíji̱ ndo̱ ndúu ndó. Cuáhán ndaco̱o ndó ta ca̱ca̱ ta̱hví ndó nu̱ Ndióxi̱ já ná a̱ ndícava ndó nu̱ú cua̱chi tá ná coto ndojó tiñáhá ndo̱hó —na̱cachi Jesús xi̱hi̱n ná.

⁴⁷Ja̱nda̱ cáha̱n chá va Jesús xi̱hín na̱ xíca tuun xi̱hi̱n á cán cándichi a já na̱xi̱nu̱ cua̱há ndiva̱ha ña̱yivi nu̱ íin a. Ta in táhan da̱ u̱xu̱ i̱vi̱ xíca tuun xi̱hi̱n á, da̱ naní Judas cán, da̱ cán cúú da̱ ndáca ñayivi va̱xi da. Ta na̱cayati da tatí yúhu̱ dá sa̱jóho Jesús.

⁴⁸A̱nda̱ já na̱cachi Jesús já xi̱hi̱n dá: —Judas, tatí yúhu̱n sa̱jóho i̱ tátu̱hun da̱ quíhvi̱ ini ye̱he̱. Joo xi̱hín ña̱ cájún ja̱n ndíquia̱hvún ye̱he̱ ndahá na̱ co̱ cúní ye̱he̱, da̱ na̱chindahá Ndióxi̱ nduu ña̱yivi —na̱cachi Jesús.

⁴⁹Tá na̱xini tócó ndihi na̱ ndúu xi̱hi̱n Jesús cán ña̱ cúu já na̱casáhá ndáca̱ tu̱hún na̱ mé á já na̱cachi na já: —Á cúni̱ ndó, xitoho nde̱ ña̱ ná ndicui̱ta nde̱ xi̱hi̱n machiti cani táhan nde̱ xi̱hi̱n ná —na̱cachi na.

⁵⁰Joo in táhan da̱ xíca tuun xi̱hi̱n Jesús cán na̱jándicue̱he̱ da̱ in da̱ cúú mozo da̱ sa̱cua̱ha̱ nu̱ú ju̱tu̱ cán jáchi̱ na̱chitúhu̱n dá jo̱ho xoo cuáha da.

⁵¹Joo já na̱cachi Jesús já xi̱hi̱n ná: —Sa̱ íin va̱ha. A̱ cáni táhan ndó xi̱hi̱n ná —na̱cachi Jesús. Tá na̱ndihi já na̱cani ndaa ndáha̱ mé á jo̱ho mozo cán já na̱ndaja va̱ha mé á da̱.

⁵²Ta na̱casáhá cáha̱n Jesús xi̱hín na̱ sa̱cua̱ha̱ nu̱ú ju̱tu̱ cán xi̱hín na̱ sa̱cua̱ha̱ nu̱ policía ndáá veñu̱hu xi̱hín na̱ sa̱cua̱há veñu̱hu cán, mé na̱ na̱casa̱a̱ tiin na Jesús já na̱cachi a já xi̱hi̱n ná: —Cája ndó xi̱hín i̱ tátu̱hun cája na xi̱hín ta̱a cui̱hná jáchi̱ na̱queta ndó va̱xi ndó tiin ndó ye̱he̱ xi̱hi̱n machiti ta xi̱hi̱n yíto̱.

⁵³Joo co̱ó a̱ ná caja toho ndó xi̱hín i̱ tá na̱sahi̱in i̱ tañu ndó veñu̱hu cán. Joo núná nu̱ ndó viti caja núu ndó jáchi̱ na̱sa̱ha̱n Ndióxi̱ ña̱ma̱ni̱ ña̱ ná tiin ndó ye̱he̱. Jáchi̱ na̱cuaá viti ta chíndeé tiñáhá sa̱cua̱ha̱ ndo̱hó caja ndó ña̱ núu —na̱cachi Jesús xi̱hín na̱ cán.

⁵⁴A̱nda̱ já na̱tiin na Jesús. Já ñéhe na a̱ cua̱ha̱n na̱ vehe da̱ cúú sa̱cua̱ha̱ nu̱ú ju̱tu̱ cán. Ta xícá xícá ndíco̱ Pedro ja̱ta̱ ná cua̱ha̱n da̱.