Luk 17:20-35

²⁰Farisi (Köna keugö kapaŋkölköl) yeŋön Jisös kewö qesim waŋgiba jiget, “Anutugö bemtohoŋ mi mönö wanat nalönöŋ asuhuma?” Jiget möta meleŋda kewö jiyök, “Anutugö bemtohoŋan mönö jeninan ekinaŋgö dop qahö asuhuma.

²¹Mötket! Anutugö bemtohoŋi mi sutŋine uruŋine asuhuba ahöza. Miaŋgöra mi kiaŋgöreŋ me enduyaŋgöreŋ ahözawi, mewö jibingö osimakzin.”

²²Jisösnöŋ gwarekurupŋi kewö jii mötket, “Könaŋgep nalö kun kam kuŋgumawi, miaŋgöreŋ Suep gölmegö azi ölŋaŋgö nup meme wehönŋi mieŋgöreŋök kun ekingö ak eŋgimapmö, mi kunbuk ekingö osime.

²³Nalö miaŋgöreŋ kewö jiget mötme, ‘Mötket! Amötqeqe Toŋan mönö endu malja. Mötket! Mönö ki asuhuza.’ Mewö mewö jigetka i ekingöra miaŋgöreŋ ösumok kude luluhuba anme.

²⁴Mi kewögöra: Suep gölmegö azi ölŋan kunbuk kamawi, nalö mi wölbilikö dop kewö akŋa: Mi suep likepŋeyök zilaŋ biliksik ala asariba likepŋe dop köla anjawi, yaŋön mönö miaŋgö dop asuhuma.

²⁵Könaŋgep mewö asuhumapmö, mutuk ambazip nalö kewöŋe gölmenöŋ maljei, yeŋön azi mi yaköriba andö qem waŋgigetka sihimbölö ketaŋi mötma.

²⁶“Mönöwök Noagö nalöŋe ambazipnöŋ malmalŋini qemasolokep qakŋe mala ayuhugeri, miaŋgö dop mönö Suep gölmegö azi ölŋan kunbuk kamawaŋgö nalöŋe mewöyök asuhuma.

²⁷Noagö nalöŋe nene lömbuaŋ ala o köhöikŋi nemba ambi kenam bohonŋaŋgö alget anda kaiga aŋgömeget. Ahakmeme mewö aka memba qemasolokep malgetka Noanöŋ waŋge uruŋe öŋgöyöhi, silim miaŋgöreŋ teköyök. Teköiga o göulu ketaŋan kaba ambazip jinonŋi qahö löm köl eŋgii o nemulahöba kömuget.

²⁸“Lotkö nalöŋe mewöyök qemasolokep malgetka mewöŋanök asuhuyök. Ambazipnöŋ nene lömbuaŋ ala o jawat nemba nup köl kömöta jike miriŋini memba qeköm nembi ala yuai bohonŋi memegöra algetka yuai tosatŋi bohonŋi memba malget.

²⁹Mewö aka memba malgetmö, Lotnöŋ Sodom miri mosöta aniga wehön miaŋgöreŋök könöp aka köt sömsöm könöpŋambuk mi mönö kie ewö suepnöhök eta ambazip jinonŋi qahö eŋgohoi kömuget.

³⁰Könaŋgep Suep gölmegö azi ölŋan kunbuk asuhumawi, nalö miaŋgöreŋ ambazipnöŋ mewöŋanök qemasolokep aka mala ayuhume.

³¹“Silim miaŋgöreŋ sombemnöŋ malmawaŋön mönö inap yuaiŋi memamgöra miri uruŋe kude öŋgöma me nupnöŋ anda malmawaŋön mönö mewöŋanök miriŋe kude liliŋgöba kama.

³²Lot anömŋan meleŋda andöŋe uba kömumba köt ahöhi, mönö mi mötmörime.

³³Kunŋan malmalŋi siyoŋsayoŋi qahö nanŋaŋgöra aŋgön köla nanŋi imbi-imbi malmamgö mötzawi, yaŋgö malmalŋan mönö sohomapmö, kunŋan malmalŋi nöŋgöra aka köleŋniga sohomawi, yaŋön mönö malmal ölŋaŋgö könaŋi miwikŋaiba oyaeŋkoyaeŋ malma.

³⁴“Nöŋön kewö jibi mötket: Suŋgem miaŋgöreŋ azi yahöt dumnöŋ mohotŋe ahöyohotka yetköreŋök kun waŋgita kun mosötme.

³⁵Mewöyök ambi yahöt mi mohotŋe taweŋ urasiba (bunahöba) tatmahori, yetköreŋök kun waŋgita kun mosötme.”