Luk 13:13-31

¹³Isen naman wa̱won, nuwanaw mo idamoms tapwan; mapuna ikaves Yowbad.

¹⁴Tage tanuwagan sinagog ikin Yeisuw nivag takatoun ibwein Sa̱bat waseg, ikapasal nuwan, idibakes gamag tasiyas, ilana, “Yam kweinim katanok waseg bitawotets. Awoum kumeis Sa̱bat va̱gan amikatoun biva̱geimiy bukubweins.”

¹⁵Yeisuw ikatimop aygan, ilana, “Tayyaweid yakamiy. Sa̱bat waseg kulikus aleimiy bulumakaw o donkiy wasibunatum nisesus mo kutokes kunawes wayvagam beimoums.

¹⁶“Tage mana̱wen vin, Ebelam tabun na̱tan, Seitan niyawen bweilim babaw, bweina balik Sa̱bat waseg. Peinan Seitan ankatoun nivag sinwatan kweinim kweitoun bweilim.”

¹⁷Anilivan ma̱wan, mo ivag asimwasin tasiyas nivtokays livan, tage gamag babaw imwa̱saws peinan ikines nawotet singay tawtoun.

¹⁸Mapuna idibakes, ilana, “Yowbad nakaleiwag ama̱wan? Aw-kabebay basekeimiy va̱gan bukuliganes o bukukwakins.

¹⁹“Adok ma̱wan tipol veitun, peinan gamag teitan ikow inow isop wanabag; isob, ivakaein, mo mansiyas man iyoyows iwlules sibunatum yayagein waseg.”

²⁰Vayuwein ilivan, ilana, “Ama̱wan bakabebay va̱gan bukukwakins Yowbad nakaleiwag? Adok ma̱wana yist, na̱tan vin ikow isen waseg pwalaw avakaein, tamkwa̱lan mo ilol.”

²²Inoun, in, silma̱nin Yelusalem, ita̱vin ven babaw, ven mwasanin wunoveks, o ven mwasanin wunkekels, ikatimlakes gamags.

²³Teitan gamag ikatigan, ilana, “Tamwey, tabta Yowbad bikatinabwes gamag asteiyuye?” Iwa̱ge, ilana, “Kuyokons va̱gan bukusiws koukwed kabkakit waseg. Mounid, gamag babaw sivines beisiws, biyokons, bo nag.

²⁵“Igaw tanuwagan bunatum bitamanaw, bikatibog koukwed, mo bukutowas watoulan, bukugipits, kulansa, ‘Tamwey, kwaliyow koukwed pinem yakamey,’ tage mtowen bikatimop agamiy, bilana, ‘Nag akakin avanuy mukunoy nukumeis yakamiy.’

²⁶“Mo bukulansa, ‘Nakakamkwam nakamwamoum wamatam yak, o nukwatimlakay wamaven.’

²⁷“Towen gog bilivan, ‘Mounid nag akakin avanuy mukunoy nukumeis yakamiy. Kunounas, kuneis, takalbalebs yakamiy.’

²⁸“Mo bukuvva̱lams o bukwakilis kumtumiy, peinan bukukines Ebelam, Aysak, Yekob sisiyas tasiyas palopits, Yowbad nakabkaleiwag waseg, o yakamiy bukusiwas watoulan.

²⁹“Gamag babaw meinoys wanuvid, wayavat, wabomat, wa̱yals, bimeis bisinis beikams Yowbad nakabkaleiwag waseg. Tage mwasanin wankuyeim bo bimugwas, o mwasanin wanamug bo bikuyeims.”

³¹Tut towen Palisiy mwasanin inekes Yeisuw, ilansa, “Kusawl, kun, Elod sivinan beiweim.”