Lucas 13:13-31

¹³Ne mxoob Jesús yaa Jesús dits zha, ne oraaka lee dits zha mli, ne mndelo zha mbil zha lo Diox.

¹⁴Tsa lee zha kuu nabee ta nkaltaa re zha nzhool zha lo Diox, mkezhyan zha, tak lee Jesús mtegwe thib ngot wiz kuu ndroxkwan re zha, tsa nzhab zhaʼa lo re men: ―Xoop wiz nke men tsin thib sman ne tsow men re kwaa, tsa ndoblo goo yaad goo tsa tegwe zha goo. Per yaadt goo wiz kuu ndroxkwanaa.

¹⁵Tsa lee Jesús mkab ne nzhab: ―¡Zha nkedi nak goo, zhaa kuu mbez goo ne zhaa kuu ntsow goo! ¿Chu nxagt goo ngon goo o burr goo, wiz kuu ndroxkwanaa, ne nyano goo maa nzhuu maa nit?

¹⁶Ne lee ngot ree, nak zha raz chaan Abraham, ne ndaʼa tsiinbtson liin naliib zha lo Maxuuy, ne ¿chu ndoblot laa ngot nal wiz kuu ndroxkwanaa?

¹⁷Leettsa ngwalo nzhab Jesús kona, reta zha kuu nayii ne Jesús mthoy zha, per lee re men kwathoz naley ngoo leettsoo mwii re kuu thoz kuu mtsow Jesús.

¹⁸Tsa lee Jesús nzhab lo re men: ―Nal leen ta tedib kwent nanzee lo goo, chaan ta nabee Diox.

¹⁹Leey nak taxal thib mbiz mostaz kuu ngonn thib mbyi lo yu mbyi. Mlene, mzhene ne ngoke thib ya, tsa lee re min mdexkwaa lyaat lo re zhite.

²⁰Noga nzhab Jesús: ―Nal lee na ta tedib kwent nanzee lo goo, tsa ne goo xomod nak ta nabee Diox.

²¹Leey nak taxal lebadur kuu mloo thib ngot leen tson medid arin, tsa tsowe yezhoob koob.

²²Ne leettsa ndo Jesús net nda Jesús Jerusalén, tsa mloo Jesús lo re zha kuu nzo re yez ne lo re zha kuu nzo re ranch ta ndriid Jesús.

²³Tsa lee thib zha mnaabdiz lo Jesús, ne nzhab: ―Zha Nabee, ¿chu lut zha nak zha kuu tsow gan yalnaban kuu thitanax? Tsa lee Jesús mkab ne nzhab:

²⁴―Bxek goo tsa tetsow goo gan tab goo roo pwert kuu naya, tak wlipaa na nin lo goo, kwathoz zha kwaan zha tab zha, per tsowt zha gan tab zha.

²⁵’Ne leettsa lee zha kuu nak chaan yuu yeteli tow roo yuu, tsa lee re goo kuu yaan lee teez goo roo yuu, ne gab goo: “Zha Nabee, xaal roo yuu lo nee”. Tsa lee Zha Nabee kab lo goo ne ne: “Nlebeetʼn goo, ne neeka netʼn naa cho nak goo”.

²⁶Tsa lee re goo telo ne lon: “Ndow nee kon lu ne ngwii nee kon lu, ne lu mloo lo re tawlaz nee re net”.

²⁷Per lee na ni lo re goo tedib welt: “Nlebeetʼn goo, neeka netʼn naa cho zha goo; beche goo lon, zha kuu ntsow kuu went”.

²⁸Ne tsa gonn goo ne tub keley goo, or wii goo Abraham, Isaac, Kob ne reta profet, re zha kuu nzo yibaa ta nabee Diox, ne lee re goo yaan lee.

²⁹Tak kwathoz re zha kuu nzo dib naxta lo yezlyu, yaad tob roo mes leen yibaa ta nabee Diox.

³⁰Ne nzo chop tson goo kuu nataagt nal, gak nataak tsya; ne lee re goo kuu nataak nal, lee tsya gak goo zha nataagt.

³¹Ne lee chop tson fariseo mbig lo Jesús, ne nzhab: ―Broo nzhee ne tyee, tak lee rey Herodes nlaaz kutha.