Lomu 14

1

2

3

4

5

6

7

8

9

10

11

12

13

14

15

16

¹Nagoa tamafu-tamakanaya Yisasia hulatenea yafena haviya amakupi maleya amametiti nehayanagi Anumaya Kotia “Ago fatago veane mainae.” huno humatenea yafena havilama ohuya “Naa kava hisunageno Anumaya Kotia ‘Fatago veane mainae.’ huno huotategahie.” huya nehaya veala tamakaiene nagopi maisayafe amavaletama amateho. Amategahagi amakaya amakesafiti alu ke hisaya yafena kea vaitama ani keletila tua hu omateho.

²Nagoa kafu-kaganaa “Mukia kavela negahue.” huno agesa nehavianagi nagoa kafu-kaganaa Yisasife havino agupi maleneanagino Anumaya Kotia “Ago fatago kano mainane.” huno hutenea yafena havilama ohuno “Anumayamoa fatago kano mainane huno hunatesiafe afumo amela onegahue.” huno humaine.

³Mukia kavema nesia kafu-kaganaa afuma nonesia afu-agananafena “Afa kano mainane.” huno huoateno. Afumo ameama nonesia afu-aganaa mukia kavema nesia afu-aganafena “Naa kano mainane.” huno huoateno. Anumaya Kotia ani tole kanolatana ago anavale-maine.

⁴Kagaya taga maineka nago kanomo aliya kanohena “Naa aliya kano mainane.” huka huneatane? Agayama ani kanomo aliyatema fatago huno alisiano havi aliya alino maisiano agaia kava kanoamo yane. Kagai yana omalene. Anumayamoa agaia ali lokiya vaitesia tokiyaa haneafe ali lokiya vaitesigeno maigahie.

⁵Nagoa tamafu-tamakanaya ma amakesa nehaviye “Nagoke kanalema mauna yamoa alu kanamona agase-maineanagita ani kanalekeya alitalu huta Anumayamo agia alisaga hugahune.” nehageya nagoa tamafu-tamakanaya “Mukia kanamoa nagoke avamete humainea kanale nemaune.” huya nehayanagi nagoke nagoke veamoya amakaiami amaku amakesa havilama hisae.

⁶Nago tamafu-tamakanaa agesa haviteno “Nagoke kanama mauna yamoa nagoa kanamona agase-maineanagita ani kanalekeya alitalu huta Anumayamo agia alisaga hugahune.” huno hisia kanomoa Anumaya Koti agia alisaga hisiafe ani kavala nehie. Nago tamafu-tamakanaa “Mukia kavela negahue.” huno hisiana Anumayamotega nunamu huno muse hutenea yafenagino Anumayamo agia alisaga humainegi nago tamafu-tamakanaa afumo amema monesia kanomoa “Anumaya Koti agia alisaga hugahue.” huno monesie. Agaienena Anumaya Kotitega nunamu huno muse huno havinege.

⁷Nago kanoa haegafa huno maisiana agaialefekeya huno omaine. Nago kanoma falisiana agaialefekeya huno ofaline.

⁸Tahaimuma hanesigeta maisunana Anumayamo agia alisaga hisunafe mainone. Falisunana ania huta Anumayamo agi alisaga hisunafe faligahune. Ania humaineafe tahaimuene maisunano falisunano Anumayamo anaga mainone.

⁹Fali-mainaya veateene hamaimu hanegeya mainaya veateene Anumayaamimo maisiafe Kalaisia faliteno eteno haimu alino heti-maine.

¹⁰Nagoa veamogatama naa higetama tamafu-tamakanagami no maiyana fako huneamatae? Nagoa veamogatama naa higetama tamafu-tamakanafena “Afa kano mainane.” hutama huneamatae? Tagaya mukiamogata Anumaya Kotia ala kaiyekema hulatesifina hetigahune.

¹¹Avopina mage huno kae-maleneane Anumayamoa mage humaine “Tamagelafa huna tamahanepauve mukia veamoya nagaifena mage huya hugahae ‘Kagai veane mainonagi kava hulato.’ huya hugahae. Mukia veamoya ‘Kagaya Anumaya Kotiti mainane.’ huya nagia alisaga hugahae.” huno higeya kae-malenayane.

¹²Kae-malenageta tagaya ageteta havilinone mukia nagoke nagokemogata nemauna auava yatimo aepatia Anumaya Kotina hapaigahune.

¹³Tafu-taganagamifena “Naa nehane.” huta fakoa humateta nagoene havi tagesa havi oamamisune. Naa ohisunana tafu-taganaya tageteya asaga hulaviya kefo kava hisaya yafenagita havi kavala ohisune.

¹⁴Anumayanimoa Yisasiene ailokaena mainena ago havilinoe nagoa kavemoa oniyaage ohune. Nago kanomoma agaia agu agesafima “Oniyaage humaine.” huno havisia kavemoa oniyaage haumaine.

¹⁵Kagaya nagoa kavema nenana yafena kafu-kaganana agu agesa alihaviya hutesanana kahau kayamopafi negahaiya kavala nohane. Kalaisia ani kafu-kaganana agu amena aligatisiafene huno fali-maineanagika nesana kavetetifene huka alihaviya huoato.

¹⁶Kanale kava hisaya yafena havigu veamoya “Havi kava nehae.” huya hulamateyafenagi kava yagaiho.

¹⁷Kavema neneya tima neneya nehaya yamoa Anumaya Kotia kava yagailatesia yamona aepaa omaleneanagi Alu Aotage Avamumo taminea fatago kavaene taipa falu hisia yaene muse hisuna yaene aepaa hane.

¹⁸Haneafene huya nagoa veamoya ani kava huya Kalaisi aliyama alisayana Anumaya Kotia “Kanale kava haya veane mainae.” huno hulamatesigeya nagoa veamoyaene “Kanale veane mainae.” huya hulamategahae.

¹⁹Ani yafe tagaya nagoke tagu tagesalema maisuna kavaene tafu-taganagami amaya huta tokiyaage huya maisaya amaku amakesale maisaya kavala hisune.

²⁰Tamakaya kave nesaya yafekeya nehutama Anumaya Koti aliyana alihaviya ohiho. Mukia kave neyana kanale yanagi kagaya nana kavemoa kafu-kaganaya asaga hulavisaya kava humatesanana tusia havi kava nehane.

²¹Afua nesano havilima nesano nagoa kavama hisana yamo kafu-kaganana asaga hulavisia kavama hutesanana aniama hisana kavala atalo.

²²Ani yafema havika kagupi malenana yana kagaikaene Anumaya Kotiene tanakaitanigeya hanesie. Nago kanomoma nagoa nesia yafeene hisia kavaenena agaia aguamoa kaiyekema huoatesiana ani kanomoa muse hugahie.

²³Muse hugahianagi nago kanomoma nesia yafema tole agesa haviteno nesiana Anumaya Kotia “Havi kava nehane.” huno hutegahie. Ani kanomoa “Kanale ya nenoe.” huno agupi omaleneafe havi kava nehie. Mukia yana “Maa kavala kanale kavale.” huta lagupi omalenona yana kefo yane.