Lomu 13

1

2

3

4

5

6

7

8

9

10

11

12

13

14

15

16

¹Mukia veamogatama Kamani vayamogami kea akave maleho. Nago Kamani kanoa agaia falote huno omainegi mukia Kamani aliyana Anumaya Koti ayapiti alino falote humalegeya yagai-mainae.

²Kamani vayamogami kehena “Kahaoteyakae.” huya hisayana Anumaya Kotienefe “Kahaoteyakae.” huya nehae. Ani kavama hisaya veamoya amakaiami amakata aisia anonaa aligahae.

³Kanale kava nehisaya veamoya Kamani vayafena kolia ohugahagi havi kavama nehisaya veamoya koli hugahae. Kamani vayafe kolima ohinutama kanale kavakeya hiho.

⁴Kamani vayamoya tamaya hisagetama kanaleya hutama maisayafe Anumaya Koti aliya vaya mainagi havi kavama hisayana tamahaesaya tokiyaamia haneafe koli hiho. Havi kavama hisaya veamogamina havi yana anonaa amakata aisia yama amamisayafe Anumaya Kotia humategeya agai aliyana nealiye.

⁵Kamani vayamoya hamai vai yama tamisaya yafekela kolia huta amakai kea ohavisunagi tagaiti laguamo “Naa hiho.” huno hisia kavakeya huta akave malesunafe Kamani vayamogami kea akave malegahune.

⁶Kamani vayamoya Anumaya Koti aliya nealiya mukia kanafina ani aliyatekeya kava yagai lokiyaage humainayafe tamakaya tamaugafale takesi monea neatalae.

⁷Anonaa mukia kava vayala neamamitama tamaugafaletima kanisole takesiene Kamani takesiene amamiho. Kava vayatamimogamina amaiyaafinaga ako hutama mainetama amakia alisaga hisaya vayamogamina amakia alisaga hutama maiho.

⁸Nago yana tamamitageya “Haenagaa tamamigahune.” hutama humainesaya yana aupaa amamiho. Tamafu-tamakanagamina tamakua amamitama amaya hiho. Nagoa veamoya amafu-amakanama amakuama amamisayana mukia kahegi kemona akave nemalae.

⁹E, kahegi kemoa mage humaine, Kumai he kavala ohuo. Veala haegeno ofalino. Musufa yana ohuo. Alu kanomo kuafenotela ageka kahayea ohuo huno nagoa kene humainegi mukia kahegi kemona aepaamoa nagoke mage huno hane, kagaika kaugafahema kahaiya avamete mukia veamogami amaugafahena kahaino huno humaineane.

¹⁰Mukia veamogami amakuama neamamiya veamoya alu veamogamina havi kavala huoamategahae. Ani yafe veamoya amakuama neamamiya veala mukia ani kahegi kemona akave nemalae.

¹¹Menima mainona kanafima nehaya kavala ago havilinayafe tamaula faetama omaitama hetitama maisaya kanamoa ago falote humaine. Tagayama hagoteta Yisasife havita lagupi maleta tametiti humainona kanafina Anumaya Kotia tagu tamema aligatisia kanamoa aluale haneanagino meni kanafina ago eno aupa nehie.

¹²Hanima kimainea kanamoa ago hano hugahe nehigeno koma alino halesia kanamoa ago falote hugahe nehiafe mukia hani yapima nemaiya auava yana ataleteta tuma hisuna kenatia, hale yamo auava kenatia failisune.

¹³Kama vaiyesunana fatago huta veamoya yagefima vaiyaya avamete huta vaiyesune. Alitalu huta havili neta hagifali kea ohatageta anegi-nagia ohisune. Ageta lahayea huta augafale maita yokalo oateta moli huliteta ohisune. Alu kanomo yatela ageta lahayea ohuta tua ohisune.

¹⁴Anumayatimona Yisasi Kalaisina kenatami kana hutama avaletama taugafale aigamaetama age lamahaye hisaya yafena tamakesa havi havi hutama omaiho.