Lomu 12

1

2

3

4

5

6

7

8

9

10

11

12

13

14

15

16

¹Nafunaganagatama Anumaya Kotia kalagi ailatea yafena havina tokiyaage ke lamahanepauve. Anumaya Kotife muse yaamima sipi sipi heya aminaya kava hutama tamahaimula hanenagetama muse yana tamaugafa Anumaya Kotina amiho. Agaila alu aotage veaneagitama Anumaya Kotina haisia kava hisayana fatago lamaku tamakesafiti Anumaya Koti agia alisaga hugahae.

²Tamakaya ma mopafi veamoya nehaya augafa kavala ohutama lamaku tamakesa aiyahae hageno Anumaya Kotia yaufa lamaku tamakesa tamamineafe agaima nehaiya kavafena havilama hutama havigahae. Ani kavala kanale yane. Mukia yamona ago agaseno kosa hetenea ya hane.

³Anumaya Kotia agaia kayone yamaaleti aliyamaa namineafe nagoke nagokemogatamina tamahanepauve “Anumaya Kotia naa yama namine.” huka haviteka kagaika kaugafa alika ohaiyo. Anumaya Kotia agaialefe havitama tamakupi maletama tamametiti humainaya yana nagoke nagokemogatamina ala yano osi yano afaa tamamineafe fatago lamaku tamakesa havitetama lamakaitami fako hiho.

⁴Nagoke taugafamoagi alagate alagate taugafa haneno alu aliya alu aliyana nealiye.

⁵Tagaya mukia veamogata ani kava huta Kalaisiene aigamaeta agai augafa nagoke maineta afalu falu huta nagoke mainone.

⁶Mainonageno Anumaya Kotia kayone hulateno muse yatia haote haote huno agaia aliya alisuna tokiyatia ago tamine. Nagoa veamogamina Anumaya Kotia avayafiti hamapai-mainea kea huhaleya hisaya tokiya muse hunoma amaminesiana Yisasife haviya amakupi maleya amametiti humainaya keage huhaleya hamapaisae.

⁷Nagoa veamogamima muse yama amafu-amakanagami amaya hisaya tokiyama amaminesia aliyana aliya tokiya vaisae. Nagoa veamogamina veane humaveli hamaveli hisaya tokiyama amaminesiana ali lokiya vaiya humaveliho.

⁸Nagoa veamogamina vea amaku amakesa ali hetimatesaya tokiyama amaminesiana ali tokiya vaiya ani amaku amakesa ali hetimatesae. “Nafunaganagamima nago yama amamigahue.” huno humainesia tokiyama amaminesiana kasagoya male kosa heya amamiho. Kava aliya alisaya tokiyama amaminesiana amakualeti ani kava aliyana aliya maiho. Hauma huteno afuaganama ayama hisia tokiyama amaminesiana amaipa falu yapiti amaya hiho.

⁹Tamafu-tamakanagamima tamakua amamigahena tamagelafa hutama amamiho. Kefo kavala tamakaveno hutetama kanale kava hisaya yamaage atafa hutama tokiya vaiho.

¹⁰Tamafu-tamakanafema aluya huno tamahaisigetama tamakua amamiho. Nagoke nagokemogatama tamafu-tamakanagami amakia alisaga hutama “Hagoteho.” hutama humateho.

¹¹Mukia kanafina aliyageya nealisagetama kasalo kasala kea ohiho. Tamakupina Alu Aotage Avamumo tokiyaaleti tamakaila ali hetinagetama Anumayamo aliyana aliho.

¹²Muse nehutama Anumayamoma hulatesia yafena tamametiti hutama agava maiho. Kana yama falote hisigetama hetitama tokiya vaiho. Mukia kanafina Anumayamotega havige havige hutama maiho.

¹³Anumaya Koti anagamogamima nagoa yaamimoma kosa heoamatesigetamahena amaya hiho. Natu veama esagetama ali kayone hutama amateho.

¹⁴Nagoa veamoya ali haviya hulamatesagetama “Ani veala alika kanale humato.” hutama Anumaya Kotitega havigeho. “Alihaviya humato.” hutama haviokeho.

¹⁵Nagoa veamoya kigi yokalo huya maisagetama tamakaienena ania hutama maiho. Nagoa veamoya avima atesagetama tamakaienena ania hutama avia ateho.

¹⁶Tamafu-tamakanagamienena nagoke tamaku tamakesale maiho. “Ala vaya mainone.” hutama ohutama afa veanene vaiyatete hiho. “Nagainige kanale nagu nagesa hane.” hutama ohiho.

¹⁷Nagoa veamoya havi kavama hulamatesagetama anonaa havi kavala hu oamateho. Mukia veamogami amaufina kanale kavakeya hiho.

¹⁸Tamakaitamia tuma hisaya yafena tamakesa ohavitafa hutama mukia veanenena yuna hetama maiho.

¹⁹Nahaumainea nafunaganagatama tamakaima havi yama hulamatesaya anonaa “Ani kavala humategahune.” hutama ohiho. Anumaya Kotia ani yama haya kavala agaia anonaa amamisiafe maitama haleho. Anumaya Koti avopina mage huya kae-malenayane Anumayamoa mage huno humaine “Havi kavama humatesaya anonaa amakata aisia yana amamisua yana nagaini aliyane.” huno humaineane.

²⁰Havi yamo anonaa oamamigahagi Anumaya Koti avopina mage huya kae-malenayane Kame vayatamimogamima amakatesigetama kavela afaa amamiho. Tifema amakesigetama tina afaa amamiho. Na kava hutama ali kayonema humatesageya amakaye hinageya atalegahae huno humaineane.

²¹Atalesanageno havigu havi yamoa katafa huyafenagi kanale yamaage hugeno ani havi yamona agaseno.