1Garunia Zihova se Mosese,
2pude tozini sari na tinoni Izireli, be keke tie si lopu gilania sapu sea si asa ba tavete va sea tugo meke lopu va tabea si keke rina tinarae te Zihova, si kaqu luli sari na tinarae hire:
3Be sa ṉati hiama kenukenue si tavete va sea, meke ta goregorei nia rina tinoni, si kaqu vagia sa si keke bulumakao vaqurana sapu loke ari kisakisana pude na vina vukivukihi tana sinea, meke kaqu va vukivukihi la nia sa si asa koe Zihova pude taleosae sari nana sinea.
4Kaqu turaṉa la nia sa sa bulumakao pa sasadana sa Ipi Hopena pa kenuna e Zihova. Meke kaqu va opo nia limana sa sa batuna, meke va matea sa pa kenuna e Zihova.
5Meke kaqu vagi sa ṉati hiama kenukenue si kaiqa eharana sa bulumakao meke paleke nuquruni pa korapa Ipi Hopena.
6Kaqu poṉa la nia sa si keke kakarutuna pa ehara meke siburu la nia sa pa kenuna sa poko goba tukua sa lose hopena pa hopena ka zuapa totoso.
7Meke kaqu vekoi sa si kaiqa ehara koari na kikihona sa hope tana vina uququ humaṉa lea pa kenuna e Zihova. Kaqu titisi betoni sa sari na ehara, koa holadi pa hubina sa hope tana vina vukivukihi va uququ pa sasadana sa Ipi Hopena.
8Kaqu vagi sa koasa bulumakao hie sari doduru deana pa korapana sa vina vukivukihi tana sinea,
9sari karua leleqatana meke sari na deana pu koa koarini, meke sa kukuruna sa bero sapu leanana hola.
10Kaqu vagia sa hiama sa deana meke va uqua koasa hope vina vukivukihi, pude tana vina vukivukihi va uququ, kekeṉoṉo gua sapu evaṉia sa koasa deana sapu ta vagi koasa kurukuru pu tava mate pude tana vina vukivukihi binaere koe Zihova.
11Ba kaqu vagia sa sa kapuna, doduru masana, na batuna, sari nenena, meke sa boguna na laguna,
12meke kaqu paleke lani pa sadana sa vasina koa sari na tie koasa vasina viana pa dinoṉo te Zihova, vasina ta zoropae sari na eba tana vina vukivukihi. Meke vasina si kaqu va uqui sa si arini koasa nika koai na huda katudi.
13Be guana pada pude tava kilasa koe Zihova sa doduruna sa butubutu Izireli koasa keke sinea sipu sekea sa si keke koa ri na tinarae te Zihova meke lopu va nonoga ia rini,
14be lopu sana ta gilana sa sinea, si kaqu paleke mae nia sa butubutu si keke bulumakao vaqurana pude na vina vukivukihina sa sinea meke kaqu turaṉa mae nia rini pa kenuna e Zihova koasa Ipi Hopena.
15Kaqu va opo nia limadi ri na koimata sa batuna, meke kaqu va matea rini vasina si asa.
16Sa ṉati hiama kenukenue si kaqu vagia sa eharana sa bulumakao, meke paleke nuquru la nia pa korapana sa Ipi Hopena.
17Meke noti la nia pa ehara sa kakarutuna meke siburu la nia sa pa kenuna sa gobagoba poko ka zuapa totoso.
18Kaqu vekoi sa si kaiqa ehara koari na kikihona sa hope tana vina uququ humaṉa lea pa kenuna e Zihova pa korapana sa Ipi, meke kaqu titisini sa saripu koa hola pa hubina sa hope tana vina vukivukihi va uququ sapu koa pa sadana sa Ipi Hopena.
19Meke kaqu vagi sa sari doduru deanana meke va uqui koasa hope vina vukivukihi.
20Kaqu tavete va kekeṉoṉo gunia sa sa bulumakao hie, gua sapu tavetia sa koasa bulumakao sapu sa vina vukivukihi tana tinaleosaedi rina sinea, meke koasa siraṉa gua asa si kaqu va vukivukihi ni sa sari na sinea tadi na tinoni meke kaqu taleosae si arini.
21Meke kaqu paleke la nia sa hiama sa bulumakao pa sadana sa vasina koa rina tie meke va uqua gua puta tugo sapu va uqua sa sa kukuru bulumakao sapu na vina vukivukihina sa nana sinea soti. Sa bulumakao hie si na vina vukivukihi pude taleoso nia sa sinea tanisa butubutu.
22Be keke koimata si lopu gilania sa sapu sea si asa, ba tavete va sea meke sekea sa si keke koari na tinarae te Zihova sa nana Tamasa, si pada tugo si asa pude tava kilasa koe Zihova.
23Totoso sapu gilania sa sa nana sinea, si kaqu paleke mae nia sa si keke qoti kokoreo sapu loke ari kisakisana.
24Kaqu va opoa sa sa limana pa batuna meke va matea pa kenuna e Zihova vasina pu hoke va matematei rini sari na vina vukivukihi vina uququ. Asa sa hinere pude vagi pania sa sinea.
25Kaqu noti lania sa hiama sa kakarutuna pa eharana sa kurukuru, meke veko lani koari na kikihona sa hope vina vukivukihi, meke saripu koa holadi si titisi lani sa pa hubina sa hope.
26Meke kaqu va uqui sa sari doduru deana pa hope, kekeṉoṉo gua tugo sari na kurukuru pu ele tava mate meke tava uqu deanadi pude na vina vukivukihi binaere koe Zihova. Pa siraṉa gua tugo asa si kaqu va vukivukihi nia sa hiama sa sinea tanisa koimata, meke kaqu taleosae si asa.
27Be keke koari na tie hokara si lopu gilania sa sapu tavete va sea si asa meke sekea sa si keke koari na tinarae te Zihova,
28ba lopu sana si gilania sa sa nana sinea, si kaqu turaṉa mae nia sa si keke nana vina vukivukihi qoti mamaqota sapu loke ari kisakisana.
29Kaqu va opo nia limana sa sa batuna, meke kaqu va matea sa si asa pa vasina hoke tava mate sa vina vukivukihi va uququ.
30Kaqu poṉa ia sa hiama sa kakarutuna pa eharana sa kurukuru, meke vekoa sa sa eharana koari na kikihona sa hope, meke saripu koa holadi si titisi lani sa pa hubina sa hope.
31Meke kaqu va rizu pulei sa hiama sari doduru deanana, kekeṉoṉo gua sapu tava rizu pule koari na kurukuru pu tava mate pude na vinukivukihi tana binaere koe Zihova, meke kaqu va uqua sa pa hope meke sa hibina si variva qetu koe Zihova. Pa siraṉa gua asa si kaqu va vukivukihi nia sa hiama sa sinea tanisa tie, meke kaqu taleosae si asa.
32Be paleke mae nia sa tie si keke sipi pude na hinerena sa sinea, si kaqu na mamaqota sapu loke ari kisakisana si asa.
33Kaqu va opo nia limana sa sa batuna meke va matea sa koasa vasina hoke tava mate sa vina vukivukihi va uququna.
34Kaqu poṉa ia sa hiama pa eharana sa kurukuru sari kakarutuna, meke vekoa sa koari na kikihona sa hope, meke titisini sa saripu koa hola pa hubina sa hope.
35Meke kaqu va rizu pulei sa sari doduru deanana, kekeṉoṉo gua sapu tavetia sa koasa vina vukivukihi binaere sapu ta vala koe Zihova, meke kaqu va uqui sa, turaṉae koasa vina vukivukihi ginani sapu ta vala koe Zihova. Pa siraṉa gua asa si kaqu va vukivukihi nia sa hiama sa sinea tanisa tie, meke kaqu ta taleosae si asa.
