Lifitikos 8:26-33

²⁶A pwal angei eföü pilawa seni lon chükün ewe pilawa esap wor iis lon mi nom fän mesen ewe Samol mi Lapalap, pwal eföü pilawa mi nofitfengen me apüra, me echö nokop, o iseniir won kirisin ewe mönün asor pwal won pelifichin pechen.

²⁷Iwe, ekei mettoch meinisin Moses a isenalong lepöün Aaron me nöün kewe mwän, nge ir ra assawerela fän mesen ewe Samol mi Lapalap pwe eu asoren assaw.

²⁸Mürin, Moses a angei ekei mettoch seni lepöür o kenirela won ewe rongen asor fiti ewe asoren kek pwe eu asoren afeiöch ewe Samol mi Lapalap a efich pwoon.

²⁹Iwe, Moses a pwal angei leupwen ewe mönün asor o assawa pwe eu asoren assaw fän mesen ewe Samol mi Lapalap. Iei inetin Moses me won ewe ätemwänin sip, ewe asoren afeiöch. Moses a föri meinisin mine ewe Samol mi Lapalap a allük ngeni.

³⁰Mürin, Moses a angei ekis seni ewe löön epit me ekis ewe cha mi nom won ewe rongen asor o äsupu ngeni Aaron me üfan, pwal ngeni nöün kewe mwän me üfer. Iei usun a apini Aaron me nöün kewe mwän me üfer.

³¹Iwe, Moses a üreni Aaron me nöün kewe mwän, “Oupwe kuku ewe fituk leasamalapen ewe imw mangaku ia aramas ra churi Kot ie. Ikenan oupwe pwal ochei ewe fituk o mongö ewe pilawa mi nom lon ewe chükün asoren afeiöch. Pun iei usun Kot a allük ngeniei pwe oupwe föri.

³²Nge lusun ewe fituk me ewe pilawa oupwe kenala.

³³Iwe, ousap towu lükün asamalapen ewe imwenfel seni mangaku ükükün fisu rän, tori repwe wesöchüla ränin afeiöchümi. Pun angangen afeiöchümi epwe fis lon ükükün fisu rän.