Levi 8:26-33

²⁶Muri e Moses i lakea na kulopi i vonu vona a bret i uka is, i tabuli na matane BAKOVI DAGI, i bole tala a bret i uka is, a bret ni gutu na namona oliv, a bisket i taku, i ru langa na vina, a pona kanena.

²⁷Lakea e Moses i ru a maki ni kani nga na limane Aron turane huriki e tuna, ri bole na limane ria, ri tabari e BAKOVI DAGI vona.

²⁸Muri e Moses i bole mule ne ria a maki ni kani, i gutu-vuro na dede turana a nihabi gutu-vuro ranga. Ra maki nga, a nihabi ni gamai e huriki a prister, i manginoro a mangina. Ia a nihabi ni gutu na kanono ne BAKOVI DAGI.

²⁹Muri e Moses i bolea a siana, i tabari e BAKOVI DAGI vona, manga a nihabi nitabari. Ra balena sipsip a toga iea, a sika ne Moses na nigamai e huriki a prister, i manga a ngava e BAKOVI DAGI i vakuku e Moses vona.

³⁰E Moses i bole a merena nibiri na nigamai, turana a dara i tabuli na dede, i voro tamali langa ne Aron, ne huriki e tuna, na nirodo ne ria. Na naro iea kunana e Moses i gamai e Aron, e huriki e tuna, turana a maka nirodo ne ria.

³¹Muri e Moses i taki e Aron turane huriki e tuna, i ta maea, “Mu nono a balena sipsip o a bulmakau iea na matana Kape na Vaponga. Mu kani kinika na maka bret ri tabuli na kulopi. Ra kulopi iea i tahoka a maka bret, a bisket ne vona a nihabi nigamai. Na naro iea bara mu ramai a ngava a vakuku e Moses vona, a ta maea, ‘E Aron, e huriki e tuna ri gi kani.’

³²Na tahuna mu kani mu maru, a maka kalavana maki ni kani mu gutu-vuro na kanono.

³³Muri mu pagitala na matana Kape na Vaponga, mu made vonga na parava ge polorua, ge harena na tahuna ge lobo a parava ge polorua na Habu na Nigamai.