Lifitikos 16:1-19

¹Iwe, ewe Samol mi Lapalap a kapas ngeni Moses mürin mälan nöün Aaron kewe ruoman mwän, ra mäla lupwen ar eäni asor mine esap pin fän mesen ewe Samol mi Lapalap.

²Iwe, ewe Samol mi Lapalap a üreni Moses, “Kopwe asile ngeni Aaron pwiüm we, pwe esap tolong inet chök a mochen lon ewe leni mi unusen pin pekilan ewe cheech mwen ewe öppüng mi nom won ewe pworofel, pwe esap mäla. Pun üpwe pwä lon ewe kuchu asen ewe öppüng.

³Iei usun pwüngün än Aaron epwe tolong lon ewe leni mi unusen pin: Epwe uwato eman nienifön ätemwänin kow fän iten asoren tipis, pwal eman ätemwänin sip fän iten asoren kek.

⁴Iwe, epwe üföüf ewe üf mi pin o pwechepwech, pwal ewe rauesesin lon mi pwechepwech, epwe peliti ngeni ewe pelit mi pwechepwech o imweimw ewe akkau mi pwechepwech. Ikkei ekewe üf mi pin. Iwe, epwe tütü, mürin epwe üföüfolong ekewe üf mi pin.

⁵Aaron epwe pwal angei seni ekewe aramasen Israel ruoman ätemwänin kuuch fän iten asoren tipis me eman ätemwänin sip fän iten asoren kek.

⁶Iwe, Aaron epwe eäni asor ewe ätemwänin kow pwe asoren tipis fän püsin itan, o föri asoren amusamusen an tipis me än an famili tipis.

⁷Mürin, epwe angei ekewe ruoman kuuch o anomuur fän mesen ewe Samol mi Lapalap leasamalapen ewe imw mangaku ia aramas ra churi Kot ie.

⁸Ikenan Aaron epwe asisil won ekewe ruoman kuuch, eman fän iten ewe Samol mi Lapalap, nge ewe eman fän iten Asasel .

⁹Iwe, Aaron epwe uwato ewe kuuch mi kuw ewe asisil fän iten ewe Samol mi Lapalap o eäni asoren tipis.

¹⁰Nge ewe kuuch a kuw ewe asisil fän iten Asasel Aaron epwe pwal uwato fän mesen ewe Samol mi Lapalap, nge men manau. Mürin epwe tinala ewe kuuch lon fanüapö ren Asasel, pwe epwe uweala än ekewe aramas tipis.

¹¹Iwe, Aaron epwe uwato ewe ätemwänin kow pwe asoren tipis fän püsin itan, o föri asoren amusamusen an tipis me än an famili tipis. Epwe niela ewe ätemwänin kow pwe asoren tipis fän püsin itan.

¹²Mürin epwe angei eu sepien asoren ötüöt mi masou ren molien ekkei seni ewe rongen asor mi nom fän mesen ewe Samol mi Lapalap. Epwe pwal angei ruukumuch apach mi pwokus o kinikisitiu. Iwe, epwe uwala ekei mettoch pekilan ewe cheech lon ewe leni mi unusen pin

¹³o isetä ewe apach mi pwokus won ewe ekkei mi nom fän mesen ewe Samol mi Lapalap, pwe ötüötün ewe apach mi pwokus epwe pwölüela ewe öppüng mi nom won ewe pworofel, pwe esap mäla.

¹⁴Iwe, epwe angei ekis chan ewe ätemwänin kow o äsupu ren aütün ngeni lepekin me fän mesen ewe öppüng, epwe pwal äsupu fän fisu ngeni mwen ewe pworofel.

¹⁵Mürin, epwe niela ewe kuuch pwe asoren tipis fän iten ekewe aramas o uwalong chan lon ewe leni mi unusen pin. Iwe, epwe föri ngeni chan ewe kuuch usun mine a föri ngeni chan ewe ätemwänin kow. Epwe äsupu ewe cha ngeni won ewe öppüng pwal ngeni mwen ewe pworofel.

¹⁶Iei usun Aaron epwe föri asoren limelim fän iten ewe leni mi unusen pin pokiten limengauen ekewe aramasen Israel, pwal pokiten ar pupungau me ar tipis meinisin. Iei usun epwe pwal föri fän iten ewe imwenfel seni mangaku mi nom rer lon lenier mi limengau.

¹⁷Iwe, esap wor eman epwe nom lon ewe imwenfel seni mangaku, lupwen Aaron a tolong lon ewe leni mi unusen pin pwe epwe föri asoren amusamusen tipis, tori an epwe towu wesin an föri asoren amusamusen tipis fän püsin itan, fän iten an famili, pwal fän iten ekewe chon Israel meinisin.

¹⁸Mürin epwe towu ren ewe rongen asoren kek mi nom fän mesen ewe Samol mi Lapalap, pwe epwe föri asoren limelim fän iten ewe rong. Iwe, epwe angei ekis chan ewe ätemwänin kow, pwal ekis chan ewe kuuch, o tofätä won mächän ewe rong.

¹⁹Iwe, epwe pwal äsupu ren aütün ekis chan ekewe mönün asor fän fisu won ewe rong, pwe epwe alimöchü seni limengauen ekewe aramasen Israel o apini.