Levitikus 6:6-17

⁶Thangri fek i yib ko prist ba saf ni pumo’on ara ba kaming ni pumo’on ni dariy bochyang u downgin nib kireb ni aram e ba maligach ngak SOMOL nib mathang malfith. Ni bod rogon puluwon ni kan turguy.

⁷Ma fare prist e ra pi’ fare maligach ni fan ko denen rok facha’, ma yira n’ag fan rok.

⁸I SOMOL e yog ngak Moses

⁹ni nge pi’ ngak Aron nge pi pumo’on ni pifak e pi gafal ni ba’aray ni murung’agen e maligach ni mo’oruf. Ba maligach ni mo’oruf e ngan pag u daken e altar nib polo’ e n’ep ndabi math e nifiy riy.

¹⁰Me kadbul me yin’ fare prist madan e prist, me chuw ko fa ley i zubong rok. Ma aram me chuweg e awat nike aw ko fare maligach u daken e altar nge tay nga barba’ i charen fare altar.

¹¹Ngemu’ me thilyeg e mad rok me fek fapi awat nga wuru’ e gin ma par yu Israel riy ko fa gin’en nib tabgul.

¹²Fare nifiy nu daken fare altar e thangri par ndabi math. Gubin e kadbul ni ngi i tay fare prist e l’ud ngay, me yarmiy e maligach ni mo’oruf u daken, me tay e mam ko fare maligach nma gapeseg thilin Got nge girdi’ nga daken.

¹³Thangri i par fare nifiy u daken e altar ni dabi math, ni dariy e ngiyal’ ni ngan pag nge math.

¹⁴Irera’ gafalen e grain ni yima ognag, ba prist ko tabnaw rok Aron e nge fek e grain ni ngan pi’ ngak SOMOL nga mit fare altar.

¹⁵Me fek ba gogow i flour ni bay e gapgep, nge incense riy, nge urfiy u daken fare altar ni aram e pow riy ni kan pi’ ni ga’ngin ngak SOMOL. Bon e re maligach ney e rib fel’ u wan’ SOMOL.

¹⁶Ma tin nra aw riy e nge kay Aron nge fapi pumo’on ni fak; thingar ni kay ni dariy e is riy u lan e gin nib thothup; u lan e yoror ko fare Tent u P’eowchen SOMOL.

¹⁷Thingar dab nlith ni bay e is riy. I SOMOL e nge pi’ ni f’oth rok fapi prist ko fare maligach ni ggan. Rib tabgul, ni bod e maligach ko denen nge maligach ni mathang malfith.