Levitikus 6:14-24

¹⁴Irera’ gafalen e grain ni yima ognag, ba prist ko tabnaw rok Aron e nge fek e grain ni ngan pi’ ngak SOMOL nga mit fare altar.

¹⁵Me fek ba gogow i flour ni bay e gapgep, nge incense riy, nge urfiy u daken fare altar ni aram e pow riy ni kan pi’ ni ga’ngin ngak SOMOL. Bon e re maligach ney e rib fel’ u wan’ SOMOL.

¹⁶Ma tin nra aw riy e nge kay Aron nge fapi pumo’on ni fak; thingar ni kay ni dariy e is riy u lan e gin nib thothup; u lan e yoror ko fare Tent u P’eowchen SOMOL.

¹⁷Thingar dab nlith ni bay e is riy. I SOMOL e nge pi’ ni f’oth rok fapi prist ko fare maligach ni ggan. Rib tabgul, ni bod e maligach ko denen nge maligach ni mathang malfith.

¹⁸Chiney i yan ngaram e demturug be’ nib mo’on ni owchen Aron, ma rayag ni nge kay e pi ggan ney ni kan pi’ ni maligach ngak SOMOL. Ma yug be’ e ra math ko pi ggan ney mra afmachan nga feni tabgul.

¹⁹I SOMOL e pi’ e tin ba’aray e gafal ngak ngak Moses,

²⁰ni fan ngak Aron nge pi pumo’on ni pifak ko ngiyal’ ni ngan yiblay bagyad ni nge yan ko fare liw ko prist. Rofen ni yira yiblay bagyad ni nge mang prist e ra pi’ l’agruw e pawn e flour (ni bod urngin e tin yima pi’ ko fare maligach ni grain), ra pi’ reb e pawn ni kadbul me baleyal’ miki pi’ reb.

²¹Yira athkuy e gapgep ngay min lith u lan e griddle nge mu’ min din’uf nge m’ingm’ing mi ni pi’ ni bod ba maligach ni grain, ni bon e bm’ag u wan’ SOMOL.

²²Ma chiney i yan e ngaram e go’ pi’in owchen Aron nike mang Prist ni Th’abi Ga’ e ra pi’ e re maligach ney. Thingar ni urfiy nib polo’ ni ba maligach ngak SOMOL.

²³Dariy bochiyang ni yi ra kay ko re maligach ni grain ney nma pi’ e prist; gubin nthingar ni urfiy.

²⁴Me yog SOMOL ngak Moses