Levitikus 27:10-27

¹⁰ma facha’ nike micheg fare gamanman e dabi thilyeg nge yon’ reb nga luwan, fa’anra rin’, ma gal gamanman nem e ke mil farow ngak SOMOL.

¹¹Machane fa’anra fare gamanman e de be’ech ni de fel’ ni ngan pi’ ngak SOMOL, ma aram e nge fek facha’ i yib ngak fare prist.

¹²Fare prist e nge turguy puluwon, nib m’ag nga rogon feni fel’ ara feni kireb, ma ireram puluwon ndab kun thilyeg.

¹³Fa’anra ba’adag fare mo’on ni nge chuw’iy fare gamanman nge sul ngak, ma thangri pi’ fare puluwon nike turguy e prist miki puthuy rliw’ e pasent ngay.

¹⁴Nap’an nra ognag be’ e nu’an rok ngak SOMOL, ma prist e ra turguy puluwon nib m’ag rogon feni fel’ ara feni kireb, ma ireram puluwon ndab kun thilyeg.

¹⁵Fa’anra ba’adag facha’ nike ognag fare naun ngak SOMOL ni nge chuw’iy ngki sul ngak, ma thangri pi’ puluwon ni bod ni kan turguy me puthuy rliw’ e pasent ngay.

¹⁶Fa’anra ognag be’ nib mo’on bang ko binaw rok ngak SOMOL ma puluwon ni yira turguy e be yan u rogon urngin e awoch nrayag nni yung nga daken fare gi but, ragag e salpiy ni silber ma reb e barril e awochngin e woldug ni barley.

¹⁷Fa’anra pi’ fare gi binaw nga tomuren ni kaf ni thumur fare Duwan e Felfelan, ma aram e ra pi’ puluwon fare gi binaw ndabi mul ban’en riy.

¹⁸Ma fa’anra pag nap’an mfin ni pi’ fagi binaw ngak SOMOL, ma ra sumarnag e prist puluwon ni be yan u rogon e tin kabay e duw nga m’on mfin ni taw ko Duwan e Felfelan’, miyad duwgiliy puluwon nib sobut’.

¹⁹Fa’anra leamnag fare mo’on ni nge chuw’iy e flang rok nge sul ngak, ma thangri pi’ puluwon miki puthuy rliw’ e pasent ngay.

²⁰Ma fa’anra pi’ fa gi flang nchuway’ ngak yug be’ u m’on ni dawri chuw’iy rok SOMOL, ma aram e dakuriy mat’wun ni ngki chuw’iy nge sul ngak.

²¹Ma ra bin migid e Duwan e Felfelan’ ma fare gi flang e bayi par nike fanay SOMOL, ni aram e ke milfan ngak e pi prist.

²²Fa’anra pi’ be’ bangi flang ni chuw’iy ngak SOMOL,

²³ma en nib prist e ra sumarnag puluwon ni be yan u rogon urngin e duw ni kabay mfini taw ko Duwan e Felfelan’, ma fare mo’on e thangri pi’ puluwon ni krofen nem; ma salpiy riy e fen SOMOL.

²⁴Ma ra taw ko fare Duwan e Felfelan’ ma fare gi flang e ra sul ko en nri tafen fa ngak e pi’in owchen.

²⁵Urngin puluwon ban’en ma yibe duwgiliy ni bod rogon nike m’ay i turguy.

²⁶Bin nganni’ i pifak e gamanman e bmilfan ngak SOMOL, are dariy be’ ngki ognag ngak SOMOL ni yug ir e leam rok. Demturug ko ba fak e garbaw, ara ba saf, ara ba fak e kaming mab milfan ngak SOMOL,

²⁷machane bin nganni’ u fak ba gamanman nib alit e rayag ni ngan chuw’iy ni rogon puluwon ni kan turguy, ma ku yira puthuy rliw’ e pasent ngay. Fa’anra dan chuw’iy nge sul ngak e en ni fak, ma rayag ni ngan pi’ ngak yug be’ nchuway’ ni bod rogon puluwon ni kan duwgiliy.