Levitikus 26:14-32

¹⁴I SOMOL e ga’ar, “Machane fa’anra dab mu folgad ko tin kugog ngomed, ma yira gechig nagmed.

¹⁵Fa’anra mu siyeged ni dab mu folgad ko motochiyel rog nge tin kug ta’chiylen ngam th’abed fare m’ag ni kug ngongliy u thildad,

¹⁶ma gu ra gechig nagmed. Gu ra pag e buch wa’athan nge yib ngomed, nge m’ar ndab mu golgad riy nge gowel u dakenmed nra malmit nagmed me ngochnag e yafos romed. Bay mu yunged e pi woldug romed, machane dabi yib fal’ngin ngomed, ni bochan e bayi gel e pi to’ogor romed ngomed miyad kay e pin’en ni kam yunged.

¹⁷Bay gu pi’ keru’ug ngomed, ya ngam waergad, ma pi’in yad ba fananikaymed e bay ra gagiyeg niged gimed; bay um pired u fithik’ e marus ngu’um milgad ndariy be’ ni be tulufmed.

¹⁸“Ma fa’anra nga tomuren nike buch e pin’ey ma ku damur folgad rog, ma bay gu yo’ornag e gechig romed ni medlip yay.

¹⁹Bay gu t’ar fenmed gelan’ nge tolngan’; bayi par ndabki aw e n’uw, nge par e but’ romed nike mlik’ ma ke el ni bod e wasey.

²⁰Gubin e pi maruwel ni kam ted nib gel e da biyib angin ni bfel’ ngomed, ni bochan e dabi pi’ e but’ romed e woldug, ma gek’iy e dabi yib wom’ngin.

²¹“Ma fa’anra kigmed be gelan’ i yan ni dab mu folgad rog, ma aram bayay ni ku bay gu yo’ornag e gechig romed ni ku medlip yay.

²²Bay gu pi’ e gamanman ni tak’ad nge yib nga fithik’med, ma bay ra li’ed pifakmed ngarm’ad, ma ku yad ra li’ e gamanman ni gimed be chugliy, ma ri’in i gimed e yad ra magach ma yupa’ i kanawo’ romed e bay nn’ag.

²³“Fa’anra m’ay urngin e pi gechig ney ma ka dawor mmotoyilgad ngog, miki gimed be gelnag lanin’med ndab mfolgad rog,

²⁴me Gag e gu ra cheal nggu togopluw ngomed ma gu ra gechig nagmed ni medlip yay nib gel ko kafram.

²⁵Bay gu pag e mael nge yib ngomed ni nge gechig nagmed ya kam th’abed fare m’ag u thildad, ma fa’an gimed ra mukun ngalan e pi binaw romed ni fan e nge dabi buch ban’en romed, ma bay gu pi’ e m’ar ndariy falayyin nge yib nga fithik’med, ma bay mpired nike math e liyeb ngomed mi gimed m’ing ngak e to’ogor romed.

²⁶Bay gu taleg e ggan nma yib ngomed, me par nri ta’reb e stof e ba t’uf rok ragag e ppin ni ngar lithed urngin e flowa ni bay rorad riy. Mra kuweged u pa’med nra be’ ma buchu’uw, ma nap’an ni gimed ra mu’ i kay ni gubin miki gimed be yim’ ko bilig.

²⁷“Ma nga tomuren e pin’ey ma fa’anra ki gimed be par ni gimed ba gelan’ ndab mu folgad rog,

²⁸ma aram e bay gu sap ngomed u fithik’ e damumuw rog, mu kug gelnag e gechig ngomed ni medlip yay nib gel boch ko kafram.

²⁹Ma bayi gel e uyngol ngomed ngam longyed pifakmed.

³⁰Bay gu kirebnag e yungi tagil e meybil romed u daken e ted, mug buthug e pi altar ni gimed ma urfiy e pi incense riy, mu gun’ e dogur romed nib yam’ nga daken e pi liyos ni gimed ma meybil ngay ni ku yad ba yam’. Mu fithik’ e fananikay rog

³¹e gu ra thirif u but’ e pi binaw romed, mug kirebnag tagil’ e meybil romed, mug siyeg ni dab gu fanay e pi maligach romed.

³²Bay gu thirif e binaw romed nge m’ay taliwen u but’, nge gin e pi to’ogor ni karab ra pired ngay nga gelngin e re mogothgoth nem.