Levitikus 24:7-20

⁷Mi gimed tay boch e incense nga daken fa gal thal i flowa, ni aram e pow ko ggan ni kan ognag ngak SOMOL ni nge yan nga luwan fare flowa.

⁸Chiney i yan ngaram e gubin e Sabbath, ma Aron e thangri tay fare flowa u p’eowchen SOMOL. Irera’ ba maruwel rok yu Israel ni dariy n’umngin nap’an.

⁹Fare flowa e gan Aron nge pi’in ni owchen, ni yad ra kay u bang nib tabgul ni bochan e aram e gin nrib tabgul ko fare maligach ni ggan ni kan pi’ ngak SOMOL ma gan e prist.

¹⁰Immoy be’ ni mo’on ni chitiningin e be’ nu Israel ma chitamngin e be’ nu Egypt, ni yib nga fithik’ e girdi’ nu Israel, marbow ra tugthingow reb e pumo’on nu Israel ko gin be par piyu Israel riy.

¹¹Me par fare mo’on ni be’ e chitiningin u Israel ngi i yog e thin nib kireb nga fithingan SOMOL, mi ni fek facha’ i yib ngak Moses, I Shelomath fithingan e chitiningin ni fak Dibre ni be’ ko ganong rok Dan.

¹²Min tay ngu’un matanagiy ma yibe sonnag SOMOL ni nge yog ngorad e n’en ni ngar rin’ed ngak.

¹³Me ga’ar SOMOL ngak Moses,

¹⁴“Mu fek e re mo’on nem nga wuru’ e gin’ey ni be par yu Israel riy. Ma gubin e pi’in rung’aged facha’ ni i yog e thin ni kireb e ngar ted pa’rad nga daken lolgen fare mo’on, me malangnag yu Israel facha’.

¹⁵Mog ko girdi’ nu Israel ni en nra yog e thin nib kireb ngak Got e ra gafgow u wenegan

¹⁶yira thang e fan rok. Demturug be’ nu Israel ara be’ nu bang nma par u fithik’ yu Israel nra dariyfannag fithingan SOMOL, e ra malangnag yu Israel ni yad gubin nge yim’.

¹⁷“En nra li’ be’ nge yim’ e ku ran li’ nge yim’.

¹⁸Ma en nra li’ ba gamanman rok be’ nge yim e thangri tay reb nga luwan. Ya yafos puluwon e yafos.

¹⁹“Fa’anra maad’ad be’ ngak reb e girdi’, ma mit i n’en nike rin’ ngak facha’ e ku aram e mit i n’en ni ngan rin’ ngak.

²⁰Ra t’ar be’ reb e yil rok be’, ma ku reb i yilen e yira t’ar; fa’anra luf barba’ i lanmit be’, ma ku barba’ i lanmit e yira luf; fa’anra t’ar reb i nguwelen be’, ma ku reb i nguwelen e yira t’ar. Demturug e mit i maad’ad nra tay ngak reb e girdi’ ma ku yira rin’ ngak.