Levitikus 23:15-23

¹⁵Mu the’eged medlip e wik ko rofen ni yib nga tomuren e Sabbath ni aram e rofen ni ngam feked fare thum i grain romed i yib ngam pied ngak SOMOL.

¹⁶Rofen ni gaman e wugem ngay, ni rofen ni yib nga tomuren e bin medlip e Sabbath, e ngkum pi’ed ngak SOMOL e grain ni ka fini el nge mang maligach.

¹⁷Ra reb e tabinaw ma nge fek l’agruw e flowa i yib nge pi’ ngak SOMOL nib tow’ath nib mal’eag. Ra reb e flowa ma aningeg e pawn e flour nni fanay ngay, nni athkuy e is ngay, ma ngan pi’ ngak SOMOL ni ba maligach ko tin som’on e grain.

¹⁸Ma nge yigey yu Israel medlip e saf ni ta’reb e duw yangarrad ko fapi flowa, nge reb e garbaw ni pumo’on, nge l’agruw e kaming, ndariy reb ni bay bang u downgin nib kireb nib maligach ni mo’oruf ngak SOMOL, nike un e maligach ni grain nge wayin ngay. Bon e re maligach ney e ba m’aguwan’ SOMOL.

¹⁹Ma ngkum pi’ed reb e kaming ni pumo’on ni maligach ko denen, nge l’agruw e saf ni pumo’on ni ta’reb e duw rorow nib maligach ni nge gapaseg thilin Got nge girdi’.

²⁰En ni prist e nge yigey e flowa ko fa gal saf nge pi’ ngak SOMOL nib tow’ath nib mal’eag ni fan ko pi prist. Pi maligach ney e rib tabgul.

²¹Rofen nem e dab mu ngongliyed e maruwel romed ko yu rran, ya ngam mu’ulunggad ngam ted fan SOMOL. Ren’ey e nggi’i rin e pi’in owchamed e chiney i yan ngaram, ndemturug e gin yad be par riy.

²²Fa’an gimed ra t’ar wom’ngin e woldug romed, ma dab mu th’abed e grain ni bay u marichlen e milay’ romed, ma dab mu sulod ngam th’abed e grain ni mpaged; ngam paged nge kay e girdi’ ni gafgow nge girdi’ u yugu boch e nam ni yad be par u fithik’med. I SOMOL e Got romed.

²³Rofen ni som’on ko bin medlip e pul e nge par ni reb e rran ni dab ni maruwel, ma nap’an nra thow e rappa, mi gimed mu’ulung ngam ted fan SOMOL.