Levitikus 22:7-23

⁷Nap’an nra ling e yal’ ma aram e ke be’ech bayay, ma aram e fin rayag ni nge kay boch fapi maligach nib tabgul ni ggan rok.

⁸Dabi kay e ufin u ba gamanman ni yigi yim’ rok ara ke li’ e gamanman ni malboch; ya ra ta’ay facha’. I Gag SOMOL.

⁹“Gubin fapi prist ma ngar folgad ko pi gafal ni kug pi’. Ya fa’anra danga’, ma yad ra par nib buch e rorad miyad ra yim’, ni bochan e dar folgad ko fapi gafal nib thothup. I Gag SOMOL e kug thothup nagrad.

¹⁰“Kemus ni be’ nreb i girdi’en e tabnaw ko prist e ra kay boch fare maligach nib tabgul; ma dariy yug be’ nra kay boch — ku ra be’ nma par rok e prist ara ma maruwel rok e prist ma dabi kay.

¹¹Tapigpig rok reb e prist ni chuw’iy nga salpiyen ara ba tapigpig nni gargeleg u tabnaw rok, e rayag nra kay boch fapi ggan ni kan pi’ ngak fare prist.

¹²Fa’anra be’ ni bpin ni fak re be prist ni figirngiy be’ ni gathi reb e prist, ma dabi kay boch fapi maligach nib tabgul.

¹³Ma fa’anra be’ ni bpin ni fak e prist nike yim’ figirngin ara ke chuw ko pumo’on rok ma dariy e bitir rok, ke sul ke yan i par nga tabnaw ko chitamngin nike mang reb i chonggin fare tabnaw e rayag ni kay boch fapi ggan ko chitamngin nib prist; kemus ni reb i chonggin e tabnaw rok fare prist e ra kay boch fare ggan.

¹⁴“Fa’anra kal be’ riy ni gathi ir reb i chon e tabnaw rok ba prist, nge kay boch ko fapi maligach nib tabgul, ma thangri pi’ puluwon ni ga’ngin ngak fare prist ma kura puthuy rliw’ e pasent ngay.

¹⁵Fapi prist e dab u ra dariyfan naged fapi maligach nib tabgul

¹⁶dab ra paged e yug girdi’ ndariy mat’awrad ni ngar uned i kay fapi ggan; ren’ey e ra girengiy e kireb nge gechig nga daken e cha’ nike kay boch fapi maligach. I Gag SOMOL, e ku gu thothupnag e pi maligach nem.”

¹⁷Me yog SOMOL ngak Moses

¹⁸ni nge pi’ ngak Aron nge pifak ni pumo’on nge urngin e girdi’ nu Israel e pi gafal ni ba’aray. Nap’an nra pi’ be’ nu Israel ara be’ nu reb e nam ni be par u Israel ba maligach ni mo’oruf, ndemturug ko ba maligach ni ir e ognag nra pi’ fa ba maligach ni ir rok e leamnag ni nge pi’,

¹⁹rogon ni yira fanay, e dabisiy ni ba gamanman ndariy bang u downgin nib kireb.

²⁰Fa’anra ga ra pi’ ba gamanman ni bay bang u downgin nib kireb, ma dabi fel’ u wan’ SOMOL.

²¹Nap’an nra pi’ be’ ba maligach ngak SOMOL ni nge gapaseg thilin Got nge girdi’, ni demturug ko nge lebguy e tin ni micheg ara ba maligach ni ir e leamnag ni nge pi’, ma thangri pi’ ba gamanman dariy bang u downgin nib kireb ni fa’anra nge fel’ u wan’ SOMOL.

²²Dab ni pi’ ni maligach ngak SOMOL ba gamanman nib malmit ara ba mugutgut ara ke maad’ad dow, fa bay e malad u dow ni be yib logwen ara ke math’ downgin ara ke for ba m’ar u downgin, fa ke yib e gachal nga dow, ara be fath e biyach u downgin. Dab mu pi’ed ba gamanman ni arrogon u daken e altar ni nge mang ba ggan ni maligach.

²³Rayag ni ngam pi’ed ba gamanman ni gathi rib ga’ ma de falfel’ rogon nga ba maligach ni gimed e leam romed ni ngam pi’ed, machane dabi fel’ ni ngan pi’ ni maligach ni labgen ban’en nni micheg ni ngan rin’.