LEVITIKO 11:32-40

³²Bona bae mase negana ai idia ese ḡau ta latanai bae moru, una ḡau baine miro: bema au amo e karaia ḡauna ta, eiava dabua, eiava kopi, eiava puse, ranu ai do ba udaia; ia na baine miro ela bona dina baine diho, una murinai baine ḡoeva.

³³A uro ai eiava hodu ai bema moru, uro eiava hodu anina baine miro, bona uro eiava hodu ba huaria.

³⁴Una uro anianina eiava hodu ranuna, eiava una ranu amo bae nadu anianidia na mimiro.

³⁵Una mase ḡauna tau-anina sina taina mo ḡau ta ai baine moru, una ḡau baine miro: bema ataga eiava uro, vada ba huaria; idia na mimiro, bona bae helaḡa umui emui ai.

³⁶Ḡau tamona, ranu e lohilohia gabuna eiava ranu gurina be bae ḡoeva. A mase tau-anina enai baine dau kau ḡauna na baine miro.

³⁷Mase ḡauna tau-anina taina emui hadohado uhedia latadiai baine moru, unu uhe bae ḡoeva;

³⁸a uhe ba hapariparidia murinai mase ḡauna tau-anina na idia latadiai baemoru, unu uhe bae miro.

³⁹Mauri ḡauna ta, ena be aniani ḡauna, to baine mase kava, ia tau-anina baine daua toho tauna baine taubu ela bona dina baine diho.

⁴⁰Hidiona baine ania tauna na ena dabua baine huri, bona baine taubu ela bona dina baine diho. Bona tau-anina baine huaia tauna na ena dabua baine huri, bona baine taubu ela bona dina baine diho.