Levi 22:22-33

²²Naha ni habia ne BAKOVI DAGI a sipsip, a bulmakau i kepa, i maputu a vahana, i tekiteki, i tahoka a ngarava. Naha ni habi na dede a kanirau maea, ge a nihabi ni gutu na kanono lakea ne BAKOVI DAGI.

²³Na tahuna mu habi a nihabi na ningaru ne mua kunana, mu bole a sipsip, a bulmakau i laho puru rike, i uka maki. Pali naha ni habi nau a sipsip, a bulmakau maea ge vona a nihabi na nita muholi. I uka ma ga ngarua.

²⁴Naha ni habi ne BAKOVI DAGI a kanirau ni ratapile a dolena, ni pala a dolena, ni kini momo a dolena, ni rape a dolena. Naha ni ratea a naro iea na tahuna mu made na malala ne mua.

²⁵Naha ni habi ne BAKOVI DAGI a nihabi na kinani mu bole na mosi. Ra sipsip, a bulmakau maea, i uka ma i kamumu na matagu, i uka ma ga ngaru.”

²⁶E BAKOVI DAGI i takia e Moses i ta maea,

²⁷“Na tahuna a tuna bulmakau, a tuna sipsip, a tuna meme ni poda, ge laho turane kinana na parava ge polorua taro. Muri bara mu ngaru, mu bole lakea na dede mu habia, ge a nihabi ni gutu na kanono lakea ne BAKOVI DAGI. Iau bara ngarua.

²⁸Pali naha ni rabalaki a bulmakau turana e tuna, a sipsip turana e tuna, a meme turana e tuna na parava i taku kunana.

²⁹Na tahuna mu rata a nihabi mu gu kavurike e BAKOVI DAGI vona, mu ramai a vinara na nihabi bara ngaru a nihabi ne mua.

³⁰A maka nihabi ni gi kani lobo na parava iea kunana. Naha ni gi ru ranga ni gi kani na hatelanga kuduvi. Iau e BAKOVI DAGI, a takia a ngava iea.

³¹“Iau e BAKOVI DAGI a ngaru mua, mu gu longototo mu gu ramai a maka vinara nau.

³²Naha ni vakahalea a ragu. Mua o huriki a kabu ne Israel, a ngaru mua lobo mu gu matakilaka nau a kiripiripi. Iau e BAKOVI DAGI a rata mua mu kiripiripi.

³³A tuli tala mua o Egipto a taparaki valai mua koea, ge iau a Vure ne mua. Iau e BAKOVI DAGI, a takia a ngava iea.”