Leevi 18:15-28

¹⁵«Mina la ga è-loun anzai. Toɠa ɠɛ ga è-loin unfe faa.

¹⁶«Mina la ga è-ɠɛɛloin anzai. Toɠa ɠɛ ga è-ɠɛɛloin unfe faa.

¹⁷«Mina la ga anzanui, ta ná-doun anzanui. È la ná-doun zunui ná-doun anzanui zeɠea, ɓaa ná-doun anzanui nɔnɔ ma loun anzanui, mazɔlɔɔ ta ga ná-nu ɠiteɠitegiti, naa ɠa ga faa ɲɔu wola.

¹⁸«Ni è-anzai ɠa dɛ vulua, mina diɛ ɓaa deɠe anzanui ta zeɠe ga è-anza. Ɗa toloi lɔ ti yɔɠɔzu.

¹⁹«Mina la ga anzanui ná-alu kaa ziɛgi zu, nii é tɔun kɔzɔzu.

²⁰«Mina la ga è-zeiɲɔɠɔi anzai, ɗa ɓɔɠɔ ɠɔzɔ la.

²¹«Mina è-loin tanɔpɛ kula ga zalaɠa, é ʋa ɠala kɔɔɠɔ ganigi ʋɛ daa ga Mɔlɔke, dɛbi vaa ma, è la ɗa-ƓALAGI lɔɠɔi ɠoloɠologa. Nà ga Ɠɔoɠɔ GALAGI.

²²«Mina la ga zunu, eɠɛʋelei nu a laa la ga anzanui. Naa ɠa ga kɔzɔba vaa.

²³«Mina la ga sua, è ʋa ɓɔɠɔ ɠɔzɔ. Anzanu mina la sua ɠoba. Ɓaaɠulama vaa ʋe.

²⁴«À mina ɓɔɠɔ ɠɔzɔ ga naama ziɛ ʋelei tanɔpɛ, mazɔlɔɔ ziiti gè ti ɓɛɛzu wo luɠɔ, naati ti ɓɔɠɔ ɠɔzɔʋɛ ga naama ziɛ ʋeleiti kpein.

²⁵Zooi kpein ge ɠɔzɔa, gè ti maaɠolo ta-vaaɠaaza golaiti faa zu, zooi unpiliga ga ná-nuɓusɛiti.

²⁶«Wɔun wa, wa ɠolo nà-tɔgiti bɛ, ta nà-deveiti, wo mina naama ɠɔzɔba vai tanɔpɛ kɛ, é ɠɛni ga zou loun, ɓaa seikɔɠɔma nui, nii é wo zaama.

²⁷Mazɔlɔɔ kɔzɔba vaiti kpein kana, zooi zu nuɓusɛiti ti ɠɛni kɛɛzu, niiti ti ɠɛni zeini zooi ɠa mɔungi wo luɠɔ, zooi ɠɔzɔa.

²⁸Naa a ɠɛɛna, zooi la mɔ unpiliga ga woye, tɔɔzei wa-ɠɔzɔba vaiti ba, eɠɛʋelei é unpilini la ga ziiti, ti ɠɛni wɔun wo luɠɔ náʋɛ.