Labidakas 17:5-10

⁵Wal dijan lowa tok ol detlot Isreil pipul garra bringimap ol detlot enimul en kilim deya langa main Seikridwan Tent, nomo langa opin kantri laik olabat bin dum bifo. Olabat garra lafta bringimap langa det serramonimen deya langa det dowawei langa det Seikridwan Tent en kilim olabat blanga det feloship ofring.

⁶Wal det serramonimen garra tjakam det blad olaran langa det teibul blanga ofring langa det dowawei blanga det Seikridwan Tent en barnim det fet blanga meigim gudsmelwan wulijim ai garra jidan gudbinji.

⁷Ola Isreil pipul kaan kipgon jidan nogudbala pipul blanga mi wen olabat oldei kilimbat olabat enimul langa pedik blanga gibitbat sekrifais langa detlot nenigout drimin sheip. Bat dei garra kipgon dumbat main lowa olataim.

⁸“Eni Isreil pipul o pipul brom najawan kantri hu jidan langa yumob kantri en gibitbat det barnapwan ofring o enikain sekrifais blanga mi,

⁹bat nomo dum deya langa det dowawei langa det Seikridwan Tent, wal im nomo blanga main pipul olabat.

¹⁰“En if eni Isreil pipul o pipul brom najalot kantri hu jidan deya dagadagat bif garram blad, wal mi na garra nogudbinji langa detlot, en dei nomo blanga main pipul olabat.