Kolesaga Koneai Bidigo Pusali Po Elalubo Buku 2:1-11

¹Eno te tobage pemene homu yabo kolesaga usu sabo homu yali. Tama ena godolo homu simina ela silaibao homu yali. Tiali goli, te tama kolesaga me page meni yai dao.

²Eno gegelama, te tiwai koneani, te gisugu wabo kolesaga te dobo kolesaga da homu yali. Te homu pemene ebo kolesagago te da dwasianu tau sabo usu meni yaibao.

³Eno te wiegi yai homu kolesaga page gegelama, suainu ebo sę yali, eno te wain ąį tubo kolesaga usu siyu, te tobage pemene homu ebo kolesaga dabe yali. Eno te gegelama koneainu yali, te mena sę mu te we bidi augwali te dwasianu pęwadage sogo e tǫde wiegi yai bidabo te koneainogo yai dao.

⁴Eno te genuai sę hauwa yali. Eno ena be te genuai genuai be dabe sęnama, tama eno te wain gi dabe bulali.

⁵Eno te gide bulali nai dabe me, tama te gide te tobage du walobo wiegi yai ni du dabe elaluai dao.

⁶Eno te dwasianu sigi ąį ge dabe nigilama, te ni du gi dabeba ąį sagaduabo nidigili palio.

⁷Eno sę olo yabo sę bidi, me sę olo yabo we me hauwa abelali. Tama te olo sę ebo bidigo wai dabe, me te olo sę ebo wego wai dabe te eno sę olo yabo we bidi pedelali. Te eno bulmakau me sipsip hani hauwa mu elaluali. Te Jerusalemde polobadu bidali bidi dabego te bulmakau me sipsip eno elalubo nai tiwai me elalubeo.

⁸Eno te silva me gol hauwa elaluali, me te eno tonalubo tǫ kantri pedai king dabego me augwa wiegi yai dila pai nai dabe enaba mayu yali. Eno te we bidi meba sisinama, te augwaligo enaba wiegi yai homu pemene ilabo tęąbi po omainu yali. Te eno te me badu hani we hauwa selama, te ena homu pemene mu ilibo sę yai dao.

⁹Eno te tama nai dabe doado bage saligo te ena genuai bidi mu pedelali. Te Jerusalemde polobadu bidali bidi dabego nai te eno megi elalubo nai tiwai me elalubeo. Tama te sogo ena te homu kolesaga mu konea pai bidi me bidai dao.

¹⁰Te eno homugo godolo yali naide homu dwasianu me geą sabeo. Mu menio. Te eno homude nai me deli godolo ebo sogo da, teda te nai eno siyu naga yali. Te eno ena ebo sę tigidalide wiegi yai homu pemene mu eyu, te pemene yali te sęgo mone sabo tiwai yali dao.

¹¹Tialima, nosali ena te sę dene elama sali nai dabeba homu kone palama, eno te tiwai koneanio, te tigidali nai te olo nai tiwai da, te homu eyu, te nai dabego ena dwasianu tau sogobe da homu yalio. Te bidi udulama, te soabo wali nogogo tola sainu ebo olo sę tiwai ebo dao.