KOHELETE 5:9-19

⁹A e birulaiamu tanona na pavapava ese baine biagua, una na namo.

¹⁰Moni e ura heniamu tauna ese moni baine abi, to lalona basine heḡereḡere; bona taḡa e ura heniamu tauna ese ena taḡa baine habadaia, to lalona basine heḡereḡere. Ina danu asi anina.

¹¹Kohu bae momo, to iha oredia taudia danu bae hoho; bena kohu biaguna ese anidia basine abi, a matana amo baine itadia mo, ani?

¹²Ḡaukara tauna na bogana baine kunu eiava baine hitolo, to ena mahuta baine namo; a taḡa tauna na baine ani paru dainai basine mahuta diba.

¹³Dika badana ta guba henunai vada na itaia: taḡa tauna na ena taḡa igogosina ai e dika;

¹⁴hekwakwanai negana ai una taḡa e boio, bena ia na mai natuna, to imana e tuna.

¹⁵Sinana bogana amo ema heḡereḡerena ai ma bainela, ḡaḡaena ai, ema heḡereḡerena; ena hekwarahi danu asi anina, ḡau ta na imana ai basine laohaia.

¹⁶Ina danu dika badana ta: ema heḡereḡerena ai ma bainela; ia na lai iabina e hekwarahilaia,

¹⁷bona ena dina iboudiai na dibura bona lalo-hisihisi bona lalo-hekwarahi bona gorere bona tudaga lalodiai e ha-oredia, anina be dahaka?

¹⁸Vada na itaia, ina na namo bona heḡereḡere: taunimanima na btine aniani, bona baine inuinu, bona ena hekwarahi idoinai Dirava ese ena mauri dinadia oreoredia dina henunai vada e henia lalodiai baine moalelaia; badina be ia ahuna korikori bunai.

¹⁹Dirava ese taḡa bona kohu vada e henidia taudia iboudiai na siahu danu vada e henidia, bae moalelaidia, bona ahudia bae abi dae, bona edia hekwarahi ai bae moale; una na Dirava ena harihari ḡauna.