1Dewit dakon kap kɨnda. Gak amɨn yokwi da aŋpak aŋ uŋun do nandaba kɨk dɨma abi. Gak aŋpak yokwi aŋ amɨn pɨndagek nak da yaŋ asat tam tagɨ yaŋ dɨma nandabi.
2Uŋun joŋ bo ae kɨndap tam da kɨbɨdoŋ, uŋun da tɨlak amɨn yokwi bɨsap pɨsɨpmɨsok kɨbɨdokdaŋ.
3Gak egɨp egɨpgo Piŋkopmon tosok yaŋ nandaŋek aŋpak tagɨsi baŋ abi. Yaŋ aŋek mɨktɨmgokon bɨsap dubak tagɨsi egɨpdɨsal.
4Piŋkop do kɨsɨk kɨsɨk aŋ ɨmɨŋaki yo galak tosol uŋun gamjak.
5Gak egɨp egɨpgo Yawe da kɨsiron yɨpbi. Egɨp egɨpno uŋudon tosok yaŋ nandaŋ ɨmɨŋaki, uŋun da gak aŋpulugosak.
6Aŋpakgo tagɨsi uŋun aban noman gɨldat dabɨl da yaŋ teŋteŋokdɨsak. Aŋek gɨldat dabɨl da gɨldat binapsi wɨsisak, uŋun da tɨlak mɨŋat amɨnyo da dabɨlon aŋpakgo kɨlegɨ nomansi aŋteŋteŋ akdɨsak.
7Gak Yawe da kapmatjok tayaŋgok yɨkgi. Tayaŋgok egek butgo yaworɨ taŋakwan aŋpulugosak do jomjom abi. Amɨn da aŋpak yokwi mibɨlɨ mibɨlɨ aŋek yo tagɨsi morapmɨ tɨmɨkgaŋ uŋun do nandaba kɨk dɨma abi.
Kap 37
Kap 37:1-7