Kap 22:2-15

²Piŋkopno, gɨldarɨ gɨldarɨ gak do yaŋ tɨdosot, mani kobogɨ dɨma nayɨsal. Kalbiyo kɨsi gak do yaŋ tɨdosot, mani yaworɨ kɨnda dɨma abɨdosot.

³Mani gak telagɨ egɨsal. Gak kɨla amɨn madep yɨgaki Israel amɨn da mango aŋkɨsaŋ.

⁴Kalɨp babɨknin da egɨp egɨpni gagon tosok yaŋsi nandaŋ gamgwit. Aŋakwa gak da uwalni da kɨsiron baŋ pulugagɨl.

⁵Gak do yaŋ tɨdaŋba jɨgɨkon baŋ pulugagɨl. Nandaŋ gadaŋ gamɨŋakwa paŋpulugagɨl, do nandaŋ gadatni uŋun ɨsalɨ dɨma agɨt.

⁶Mani nak amɨn dɨma, nak waleŋ yombem yo ɨsalɨ. Amɨn morap da nandaba yokwi tok aŋnamɨŋek manji namaŋ.

⁷Amɨn morap nak nandaŋ uŋun yaŋsul aŋ namaŋ. Aŋek yaŋba yokwi tok aŋek wunda kwakwal aŋ namaŋ.

⁸Aŋek yaŋ yoŋ, “Yawe da aŋpulugosak do nandaŋ gadaŋ ɨmɨsak, do yum kaŋakwa uŋun da jɨgɨkon baŋ pulugaŋ yɨpjak. Yawe do madepsi galak taŋ ɨmɨsak, do yum kaŋakwa aŋpulugosak.”

⁹Piŋkop gak dasi kɨlano aŋaki meŋ da buron da tagɨsi altagɨm. Mum nagɨm bɨsapmon aŋpulugaŋbɨ egɨp egɨpno gagon tosok yaŋsi nandaŋ gamgum.

¹⁰Meŋno da aŋalagɨron da wasaŋek gak da kɨsiron egɨpgum da egɨsat. Si altagɨmon da wasaŋek gak Piŋkopno egɨpgul da egɨsal.

¹¹Jɨgɨ mibɨlɨ mibɨlɨ abaŋ, ae paŋpulugokno mɨni, do dubagɨkon dɨma egɨpbi.

¹²Uwalno uŋun bulmakau wɨli da yaŋ aŋgwasaŋ. Uŋun tapmɨmni madepsi, Basan mɨktɨm dakon bulmakau wɨli yombem.

¹³Laion da joŋ kɨlap nok do yaŋ tɨdaŋek gen kagani aŋtaŋ kwaŋ, uŋudeŋ uwalno da nak aŋupbal ak do aŋ.

¹⁴Pakbi ɨsal dogɨn tagal kɨ mudoŋ, uŋun da tɨlak tapmɨmno mɨnisi aŋ. Kɨdatno dakon saŋbekni kɨsi kalkalaŋ mudoŋ. Bɨt nelak da pakbi dagoŋ uŋun da tɨlak butno wagɨlsi tapmɨmɨ mɨni pakbi ɨdap asak.

¹⁵Tapmɨmno mɨni aŋakwan melno tɨptaŋ gen kaganogwan tegosok. Gak da nepbɨ kɨmot da tamokon pokdot.