Kaarantura 22:21-33

²¹Noravano Kotiva Balaamirara minti tuvaro toqaqi Balaamiva himpiro nai donkiqaa tavuna vuqitero viraqaa vaarintero oquviro Moapihainaa qiata vaiintinavu hampata vurama.

²²Balaamiva vura kaara Kotira arara itora. Balaamiva nai donkiqaa oquviro vumanta vira kaiqa vaiinti taaraqantavata vira hampata vuvaro Noravano Kotiva atito enseliva aaraqaa himpitero vaiharo aara kuvai kareva auti vaura.

²³Mintuvaro donkivano tavovaro enseli viva iqoka paipe tuatero aaraqaa himpitero vauvaro donkivano vira tavero aaraqaa vura qaqira kero ahakaqi vura. Mini vuvaro Balaamiva donkivano aaraqaa qaiqaa vuarire tiro, vira airi tataa ruquti vaura.

²⁴Mintiakero donki ruquti vauvaro donkivano qaiqaa aaraqaa vuvaro uaini naaho taaraqanta vauraqi aaravano vitanta avutana vuvaro aara auvahianta ori ohaavano hini hini vauvaro aaravano muaqeqiro vauvaro enseli viva qaiqaa himpitero viraqaa vaura.

²⁵Donkivano enseli vira tavero, oritarare tiro, ohaa tataaqa viharo Balaamira aiqu oriqaa ratatiaqa kovaro vira kaara Balaamiva qaiqaa donki vira airi tataa ruquti vaura.

²⁶Mintiakero donki ruqutuvaro enseli viva qaiqaa oru Balaamira avuni inaaraiqakaa ori vaiqiro anoma muaqeqama vaunaini himpitero aara kuvaitero vauvaro

²⁷donkivano tavovaro viva kia vira vaaraqama amitaarira aarava vauvaro, donki viva aara viraqaa vaitatero vauvaro, Balaamira voqama kero arara itovaro viva nai kauruqohairo donki qaiqaa airi tataa ruqutura.

²⁸Vira ruquti vauvaro Noravano Kotiva donki vira kahaquvaro donkivano vaiintivano uva tintema kero, Balaamirara tiharo, Te ai nantima kaurarae are taaramo tataa vaihara, ti haruaro? tiro.

²⁹Donkivano minti tuvaro Balaamiva virara tiharo, Are ti varakera kia avu aato vai vaiintira voqaara autu timitaanara kaara te ai ruquti vauro. Te iqoka paipe vatauraitirio, ai aruma kauraitirio, tiro.

³⁰Balaamiva minti tuvaro donkivano vira tiva amiro tiharo, Te ai donkivano vaurara are ekaa enta tiqaa oquvira variqira anira maa entara anintaaro. Te vate autuna okarara haaruvata mintunarave, kiae mintunarave? tuvaro Balaamiva tiharo, Aqao, kia are haaru mintianarave, tiro.

³¹Minti tuvaro Noravano Balaamira avu qantua kovaro viva tavovaro Noravano atito enseliva iqoka paipe totero aaraqaa himpitero vaura. Aaraqaa himpite vauvaro Balaamiva qetakero vaakama vata kanta hiqintiviro nai viri vatainiqama kero vaura.

³²Mintimake vauvaro Noravano atito enseliva vira irero tiharo, Nana kaarae are nena donki taaramo tataa ruqutuaro? Are kia ˻Baraakiva inaini˼ vuataara vaivarama aniaro. Vira kaara te ai aara kuvaikarera anuraukave.

³³Ai donkivano ti taveroma taaramo tataa te unanaihairo tuqantaaviro vivo. Ai donkivano kia mintitirio, te vira vehakuma amiteha ai aruma kauraitirio, tiro.