JUECES 5:17-23

¹⁷Iixhuihua Galaad mocajque ne seyoc inaliyo Jordán huan iixhuihua Dan mocajque campa nopa barcos. Iixhuihua Aser mocajque iteno hueyi atl huan amo mijcuinijque campa itztoyaj. San mosiyajquetzayayaj.

¹⁸Pero iixhuihua Zabulón ihuaya Neftalí, inijuanti, quena. Yajque tlahuilanatoj huan amo quichihuilijque cuenta sintla miquisquíaj.

¹⁹Huajca nopa tlanahuatiani tlen cananeos hualajque tlahuilanacoj nechca altepetl Taanac campa pehua nopa atl tlen altepetl Meguido. Pero amo tleno quitlanque. Amo quihuicaque niyon se tomi.

²⁰TOTECO huan nochi sitlalime ipan ilhuicactli techpalehuijque para tijtlanise Sísara.

²¹Elqui quej nopa atlajtli Cisón tlejcoc miyac huan nochi quinhuicac. Quena, quinhuahuatatzqui nochi ininmijcatzitzi. (Ma quipiya fuerza noyolo para nijtlamiltis ni nohuica.)

²²Huajca caquistic nopa cahuayo tecactli pampa motlalojtiyajque. Masque tlahuel motemacayayaj nopa soldados ipan inincahuayos, quistejque ica majmajtli.

²³Itequihua TOTECO quiijto: ‘Xiquintelchihua catli ehuaj Meroz.’ Ma itztoca senquistoc tlatelchihualme catli nopona itztoque, pampa amo hualajque quipalehuicoj TOTECO para quinhuilanase icualancaitacahua catli nelía elque tejtetique.