Juan 20:25-31

²⁵Geru jwannga kledu mo litabage Jesu medu, geru jwannga e ulita gerudu Tomás ole: —Cha ulita kledu mo litaba gire che Chugagwalla chku, cha gwagedu amadi mo gwagwa giti. Agwa Tomás me geru e gau ulia, Tomás gerudu: —Cha agali mo gwagwa giti me gwage ama ko lentigebadi clavo kote, cha agali me kobara chuge ama ko lentigu tanege, cha agali me ko chuge ama jo dagabale jigwaru tanglege, cha me ba gerua gai ulia ba kle gerule kare Jesu chkuni gwade giti.

²⁶Jesu medu chuiage jo tangle, chui apakege gire kwian geru jwannga ulita kledu mo litaba nakwaite gwa, chui ege Tomás kledu ule mo litaba, ama ulita kledu mo litaba ugaka jegaba kejre gire Jesu me chiu gda uñale Jesu chku gwa ama ulitaske, Jesu gbi kadu ama ulitage: —¿Che kle mine? Cha takalin ba ulita ta dbe suga no.

²⁷Jesu gbi kadu ene gire gerudu Tomás ole: —Tomás, kobara chúge aini cha koge clavo taneage, kaire ba ko du aini ko chuge cha jigwaru tangle jo dagaba taneage, ba me tañachugadale cha me chkuni gwade, mo ta gbége cha gai cha chkuni gwade ulia, ba me tañachugale cha me chkuni gwade.

²⁸Tomás gerudu no Jesu ole: —¡Ba amaña ulia cha Chugagwalla, ba ulia cha Chubea!

²⁹Jesu gerudu Tomás ole: —Nege ba cha gai ulia ba gwagedu chadi mo gwagwa giti lentigeba taneadi, agwa noare kwian alin bai kaire me gwage chadi mo gwagwa giti agwa geru cha giti gai ulia mo tale, kwian enedi nga be suga no cha giti kwian tale. Jesu gerudu ene ulita Tomás ole gire Jesu jo siere ama ulitage.

³⁰Jesu lle daga ngwale no tanre dodadu Chube kiralla giti kwian geru jwannga gwa giti, Jesu lle daga ngwale no tanre ulita dodadu me kle degaba chada ai giti.

³¹Agwa chada ai chege degaba Jesu giti kwian ulita alin, kwian chada ai batenga ene chke uñale chada ai giti ulia Jesu Chube Kirolla, amaña kada Cristo kwian ulita jwannga siere ji chugege age me no gdale, kaire chke uñale kwiange chada ai giti kwian ulita bai kaire Jesu gai ulia kwian ene toi diali chui tangle Chube ole Jesu gai ulia giti.