25Despuees, orzeꞌ deꞌ zir de losaꞌy nu rsyaꞌ lom byoo dey rishloy coz nu bzaac dey. Orzeꞌ na dey: ―Bi bzaac de̱ Shuaan den ―na dey. Tees Tomaas nay rab yu dey: ―Tees benu wazaca̱ zeꞌ nu guud güii ni yaam nu bzub bey nunu benu waneꞌ mbiza̱ zeꞌ nu guud güii zeꞌ nim, nunu benu waneꞌ ya̱a̱ zeꞌ nu guud güii ni rit lyush mi, orzeꞌ rila wayeña̱ lagya̱ de riidz nu rnii der ―nay.
26Na ornu bzaꞌ shuñ dzi na, orzeꞌ byatublaazhaꞌ de yu nu rsyaꞌ lom laabaꞌ nañ yuꞌ zeꞌ. Orzeꞌ gazaꞌ Tomaas riy lat dey. Nunu ni ziꞌl noow nicy de roꞌ ni yuꞌ nu yuꞌ dey. Orzeꞌ bruꞌña Jesuuz gusum lat dey. Orzeꞌ nam: ―¡Gyel ri zu briñ lat der! ―nam.
27Orzeꞌ nam rab mi Tomaas: ―Tomaas, mneꞌ mbiz ru lo rya̱a̱ ii, nunu güii la na ya̱a̱. Bzaab yaar lo̱ nunu mneꞌ yaa ruꞌ rit lyusha̱. Cueꞌ gac ru mbecy nu wacheña lagy, sinu guc mbecy nu zeña lagy ―nam.
28Orzeꞌ na Tomaas rab yum: ―¡Ru nac ru Shuaana̱ nunu nac ru Ñgyoozh ne̱! ―nay.
29Orzeꞌ na Jesuuz rab mi yu: ―¿A guña lagy ru na par nu bzaac lar ya̱? Dzi ni de mbecy nu rzeña lagy sinu wacsac lay ―nam.
30Jesuuz zañ tonaꞌ la nusuriidz bicy mi lo rgüii la de yu nu rsyaꞌ lom nunu de nu ndeꞌ wanca gaꞌñ lo gyicy ii.
31Tees de nu nii pcañ lo gyicy ii gun orzeꞌ cheña lagy der nu Jesuuz nac mi Mesías, biñ nu ca lo cuen nu cyid co mbañ mbecy, nunu nac mi iꞌñ Ñgyoozh. Nunu par nu nac nu gyicy cup der consuel lom orzeꞌ cui mbañ der.
San Juan 20
San Juan 20:25-31