JUAN 20:13-18

¹³Jøts ja a̱nkɨlɨs ja ñɨma̱a̱jyøø, ja tøꞌøxyøjk yiknɨmaapy: ―¿Ti mja̱jtɨp, tiku mya̱ꞌa̱xy? Jøts ja tnɨma̱a̱y: ―Jaꞌagøjxp ø nya̱ꞌa̱xy ku øts ja nwɨndsønꞌa̱jtɨm ya̱ tø yikwejtspɨdsømnɨ, jøts øts ja kaꞌ nnɨja̱wɨ pø ma̱ ja tø yikpɨkta̱ꞌa̱ky.

¹⁴Jaꞌayɨ ja jadeꞌen wya̱a̱ñ, jøts ku ja yꞌejxjɨmbijty wɨnets ja tꞌejxpa̱a̱jty jøts kudam ja nwɨndsønꞌa̱jtɨm Jesús jam tyanɨ; jøts kaꞌap ja tyimwya̱ꞌa̱ñ jøts ku ja yjaꞌajɨ.

¹⁵Wɨnets ja ojts køꞌøm ñɨɨꞌmxyɨ, jøts ja tøꞌøxyøjk yiktɨɨbyiky: ―¿Tiku mya̱ꞌa̱xy? ¿Pøn mꞌɨxaapy? Jøts ja tøꞌøxyøjk jadeꞌen ja wyɨnmay, ja tsa̱ꞌa̱m ka̱m ejxꞌejtpɨk ɨdøꞌøn ja tijy, jøts ja tnɨma̱a̱y: ―Teety, pønɨ mets ja tø xyikpɨdsimy, tukmadookts øts ma̱ tø xpɨkta̱ꞌa̱ky jøts øts ja nꞌatsyiktsoont.

¹⁶Wɨnets ja ñɨma̱a̱jyøø ja nwɨndsønꞌa̱jtɨm Jesús: ―¡María! Xjats ja yꞌejxjɨmbijty jøts ja tnɨma̱a̱y hebreɨt ayuujk: ―¡Raboni! ―midi tyijpy yikꞌɨxpøjkpɨ.

¹⁷Jøts ja nwɨndsønꞌa̱jtɨm Jesús ja ñɨma̱a̱jyøø: ―Kidi ø xøñ, majtstutk øts, pø kaꞌanɨmxɨ ø nnijkxy jam ma̱ ja nDeety jam. Nøjkxts xꞌatstukmadøy pøn jaty øts njaꞌ xpabøjkɨdɨp, jøts ku øts jap nnijkxy ma̱ øts ja nDeety jap, midi mee mDios Teetyꞌajtpy.

¹⁸Wɨnets ja María Magdalena ojts ñijkxy, jøts ja ojts tꞌatstukmadojɨ ja nwɨndsønꞌa̱jtɨm Jesús pyabøjkpɨtøjk jøts ku ja wyɨnaty tø tꞌixy ja nwɨndsønꞌa̱jtɨm, jøts ku ja wyɨnaty jadeꞌen tø ñɨɨꞌmxyɨyɨ.