Juan 19:8-12

⁸Echiriꞌ ri Pilato xuta waꞌ, xok más xiꞌin ibꞌ rukꞌ.

⁹Xok kꞌu tanchi ubꞌi pa ri palacio y xutzꞌonoj che ri Jesús: —¿Pa lal petinaq wi rilal? —xchaꞌ. Pero ri Jesús na xukꞌul ta uwach.

¹⁰Ri Pilato xubꞌiꞌij kꞌu che: —¿E laꞌ na kakꞌul ta la uwach wa kantzꞌonoj cheꞌla? ¿Na etaꞌam ta kami la panuqꞌabꞌ riꞌin kꞌo wi kankamisaj la chwa cruz y panuqꞌabꞌ kꞌo wi kanyolopij bꞌi la? —xchaꞌ.

¹¹Ri Jesús xukꞌul uwach: —Paqatzij wi kambꞌiꞌij cheꞌla, na jinta kꞌana paqꞌabꞌ la kataqan la panuwiꞌ we tamaji e ri Dios chilaꞌ chikaj xyaꞌw cheꞌla. E uwariꞌche, china ri xinqꞌatisan paqꞌabꞌ la, e más kꞌo umak riꞌ, chiwach rilal —xchaꞌ.

¹²Chwi kꞌu riꞌ, ri Pilato lik xutzukuj suꞌanik kuyolopij bꞌi ri Jesús. Pero raj judiꞌabꞌ ko kesikꞌin che ubꞌiꞌxik: —¡We xyolopij bꞌi la, na lal ta chi ramigo riꞌ ri nimalaj taqanel re Roma; ma china ri kuꞌan rey che ribꞌ, riꞌ e tzel karil wa nimalaj taqanel! —xechaꞌ.