Juaʌ̃ 4:4-20

⁴Baribʌrʌ Galilead̶aa wãi carea Samaria druad̶e wãida b̶asia.

⁵Wãbʌrʌd̶e Samariad̶e b̶ʌ puru Sicar abadama jũẽne wãsia. Maʌ̃ purura Jacoboba idji warra Josea diad̶a ẽjũã caita b̶ʌa.

⁶Mama baido juebada uriada b̶asia Jacobo querasid̶e bad̶ada. Umatipa babod̶od̶e Jesura od̶e nĩba sẽ b̶asia. Maʌ̃ bẽrã maʌ̃ baido juebada uria caita chũmesia.

⁷Jesu ume nĩbabadarãra purud̶aa wãnoasid̶aa cod̶i carea ne nẽdod̶e. Mãwã b̶ʌd̶e wẽrã Samariad̶ebemada baido jued̶e zesia. Jesuba maʌ̃ wẽrãa jarasia: –Mʌ̃́a baidoda diadua.–

⁹Maʌ̃ne wẽrãba Jesua jarasia: –Mʌ̃ra Samariad̶ebema wẽrãa. ¿Cãrẽ cãrẽã judioba mʌ̃́a baidoda iwid̶i b̶ʌ?– Idjia mãwã jarasia judiorãba Samariad̶ebemarã quĩrĩãnaca bẽrã.

¹⁰Jesuba panusia: –Ãcõrẽba dia b̶ʌda bʌa cawabʌrʌbara idjab̶a za baido iwid̶i b̶ʌda caida cawabʌrʌbara, bʌa mʌ̃́a baidoda iwid̶icasia. Maʌ̃be mʌ̃a baido zocai b̶ai djiwid̶i diabarida diacasia.–

¹¹Wẽrãba jarasia: –Bʌa ¿cãrẽba baido juei? Naʌ̃ baidora ed̶u b̶ʌa. Maʌ̃ zocai b̶ai djiwid̶i diabari baidora ¿bʌa sãma juei?

¹²Dairã drõã naẽnabema Jacoboba naʌ̃ baidora dairã itea amesia. Naʌ̃gʌd̶ebemada idjia do b̶abadjia. Idji warrarãba, idji animarã bid̶a dobadjid̶aa. ¿Mãwãra bʌra Jacobo cãyãbara dji dromaara b̶ʌca?–

¹³Jesuba panusia: –Bariduaba za b̶ʌ baidoda doibʌrʌ, wayacusa opichiaya.

¹⁴Baribʌrʌ mʌ̃a dia b̶ʌ baido dobʌrʌra waa opichiaẽ́a. Idjira Ãcõrẽ ume ewariza zocai b̶aya, mʌ̃a dia b̶ʌ baidora idjid̶e ewariza bogadrʌ b̶ʌ quĩrãca b̶ai bẽrã.–

¹⁵Maʌ̃ne wẽrãba jarasia: –Mãẽteara maʌ̃ baidora mʌ̃́a diadua waa opichiarãmãrẽã, idjab̶a waa nama baido jued̶e ze amaaba.–

¹⁶Maʌ̃ carea Jesuba jarasia: –Bʌ quimada trʌ̃ne wãped̶a namaa zed̶adua.–

¹⁷Wẽrãba jarasia: –Mʌ̃ra quima neẽ́ b̶ʌa.– Jesuba jarasia: –Bʌa jara b̶ʌra wãrãa. Bʌra quima neẽ́ b̶ʌa.

¹⁸Wãrãda bʌa quima juesuma edabʌrʌa. Idjab̶a bʌa naʌ̃ ewarid̶e erob̶ʌra bʌ quimaẽ́a. Bʌa jara b̶ʌra wãrãa.–

¹⁹Maʌ̃ carea wẽrãba jarasia: –Mʌ̃maarã bʌra Ãcõrẽneba bed̶eabarida jãwã b̶ʌa.

²⁰Dai drõã naẽnabemarãba naʌ̃ eyad̶e Ãcõrẽa bia bed̶eabadjid̶aa, baribʌrʌ bãrã judiorãba jarabadaa Jerusaleʌ̃nebʌrʌ idjía bia bed̶ead̶ida panʌda. ¿Sãmabʌrʌ wãnida panʌ Ãcõrẽa bia bed̶ead̶i carea?–