Josue 13:3-31

³he sakup te menge Canaanhen. Heini puun te wahig he Shihor ziyà te zapit te edsilaan he vahin te Ehipto taman te zulunà te Ekron diyà te zizaya, ragkes en is lelima he menge inged te menge Filistihanen he: Gaza, Ashdod, Ashkelon, Gat, wey Ekron. Elin is tanà te menge Aybihanen

⁴diyà te zivavà; is langun he tanà te Canaanhen puun te Meara, he ǥaked dengan te menge Sidunhanen, taman te Afek he zulunà te tanà te menge Amorihanen.

⁵Elin daan is tanà te menge Gibalnen, wey is tivuuk he Lebanon diyà te edsilaan, puun te Baal Gad diyà te lugtenaan te Buntud he Hermon taman te Lebo Hamat.

⁶Ragkes daan is menge vuvungan puun te Lebanon taman te Misrefot Maim he ǥaked te menge Sidunhanen. “Emun edsurung kew en, iyan a ebpenguney edsegseg te menge meǥinged keniyan he menge lugar. Sigureduwa nu he mevahin heini he menge tanà diyà te menge Israilihanen su wey zan mepengevilin, sumalà te insuǥù ku kenikew.

⁷Behina nu heini he menge tanà diyà te siyam he menge tribu wey te ketengà he tribu ni Manase.”

⁸Is tribu ni Reuben, ni Gad, wey is ketengà he tribu ni Manase daan en mibeǥayan ni Moises he suluǥuen te Nengazen te kandan he vahin diyà te zapit te edsilaan te Jordan.

⁹Is tanè dan, ne ziyà ebpuun te Aroer ziyà te kilid te zal-ug he Arnon (ragkes is inged diyà te kilid kayi he zal-ug) pehendiyà te tivuuk he suǥud puun te Medeba taman te Dibon.

¹⁰Neragkes daan is langun he menge inged he zizalem te kebmandù ni Sihon te midhadì diyà te Heshbon, taman te zulunà te menge Amorihanen.

¹¹Ragkes daan is Gilead wey is menge tanà he mid-ubpaan te menge Gisurhanen wey menge Maakatnen, is tivuuk he Buntud he Hermon, wey is tivuuk he Bashan taman te Saleca.

¹²Ragkes daan is tivuuk he ginhedian ni Og, he midhadì diyà te Ashtarot wey ziyà te Edrei. Si Og, ne sevaha te nesamà te menge kevuwazan te menge Ripanhen he midaag ni Moises ne midsegseg din sikandan puun te tanè dan.

¹³Piru wazà mesegseg te menge Israilihanen is menge Gisurhanen wey is menge Maakatnen. Heini he menge etew nengungubpaan gihapun duma te menge Israilihanen taman en guntaan.

¹⁴Wazà beǥayi ni Moises is tribu ni Levi te tanà he egkepengevilin dan. Kekenà, iyan egkezawat dan is bahin te menge pemuhat pinaaǥi te hapuy he ibpemuhat diyà te Nengazen he Megbevayà te Israel, sumalà is migkaǥi zin diyà te ki Moises.

¹⁵Iyan heini kevahin te tanà te Israel he imbahin ni Moises diyà te tribu ni Reuben, he mibahin diyà te kada pemilya zan:

¹⁶Ebpuun te Aroer he kilid te zal-ug he Arnon (ragkes is inged diyà te kilid kayi he zal-ug) taman te tivuuk he suǥud he nekepeliǥuy te Medeba.

¹⁷Ragkes daan is Heshbon wey is langun he menge inged kayi ziyà te menge suǥud he iyan is: Dibon, Bamot Baal, Bet Baal Meon,

¹⁸Jahaz, Kedemot, Mefaat,

¹⁹Kiriataim, Sibma, Zeret Shahar (he ziyà te vuvungan te menge suǥud),

²⁰Bet Peor, is menge kelendiǥan diyà te Buvungan he Pisga, Bet Jeshimot,

²¹is langun he menge inged diyà te menge suǥud wey is langun he menge inged he nesakup ni Sihon te hadì te menge Amorihanen he midhadì diyà te Heshbon. Nezaag sikandin ni Moises ragkes is menge pengulu te Midian he iyan ensi Evi, Rekem, Zur, Hur, wey Reba. Heini sikandan menge pengulu ziyà te menge tanè dan, dizalem sikandan te keǥehem ni Hadì Sihon.

²²Ragkes daan te midhimetayan te menge Israilihanen si Balaam he menenagnà he anak ni Beor.

²³Is Wahig he Jordan iyan dulunà te tribu ni Reuben. Iyan heini menge inged he imbeǥey ziyà te tribu ni Reuben, he mibahin diyà te kada pemilya zan.

²⁴Iyan heini kevahin te tanà he imbahin ni Moises te tribu ni Gad he mibahin diyà te kada pemilya zan he iyan is:

²⁵Jazer wey is langun he menge inged diyà te Gilead, wey is ketengà te tanà te menge Amunihanen taman te Aroer ziyà te edsilaan he vahin te Raba.

²⁶Ragkes daan is menge tanà puun te Heshbon taman te Ramat Mizpa wey Betonim, wey puun te Mahanaim taman te dulunà te Lo Debar.

²⁷Is tanà diyà te Suǥud te Jordan, he naangken dan iyan is Bet Haram, Bet Nimra, Sucot, Zafon, wey is nesamà he nesakup te ginhedian ni Hadì Sihon he hadì te Heshbon. Is dulunà diyà te edsenlepan iyan is Wahig he Jordan taman te Ranew te Galilea.

²⁸Iyan heini menge inged he imbeǥey ziyà te tribu ni Gad, he mibahin diyà te kada pemilya zan.

²⁹Iyan heini kevahin te tanà he imbeǥey ni Moises diyà te ketengà he tribu ni Manase he mibahin diyà te kada pemilya zan:

³⁰Puun te Mahanaim, pehendiyà te tivuuk he Bashan, kes tivuuk he ginhedian ni Hadì Og he hadì te Bashan, wey is 60 he menge inged diyà te Jair he sakup te Bashan.

³¹Ragkes kayi is ketengà te Gilead, wey is Ashtarot wey Edrei, he menge dezekelà he inged diyà te Bashan he ginhedian ni Og. Iyan heini tanà he imbeǥey ziyà te ketengà te menge kevuwazan ni Makir te anak ni Manase, he mibahin diyà te kada pemilya zan.