Josua 10:23-42

²³Iwe, ra suki ewe fööimw o emwenawu ekewe limman king ren Josua: ewe kingen Jerusalem, ewe kingen Hepron, ewe kingen Jarmut, ewe kingen Lakis me ewe kingen Eklon.

²⁴Nge lupwen ra emwenireto ren, Josua a körato ekewe re Israel meinisin o üreni ekewe samolun sounfiu mi eti le maun, “Oupwe kanoto o ipwetä won üwen ekei king.” Mürin ra kanoto o ipwetä won üwer.

²⁵Iwe, Josua a üreniir, “Ousap niuokus ika rükö. Oupwe apöchökülakemi o tipepwora. Pun iei usun ewe Samol mi Lapalap epwe föri ngeni chon oputemi meinisin, chokewe oupwe maun ngeniir.”

²⁶Mürin, Josua a niela ekewe king o aitiueretä won limefoch irä. Iwe, ra nikemeittiu won ekewe irä tori lekuniol.

²⁷Nge lupwen akkar a tuputiu, Josua a allük pwe repwe apichiretiu me won ekewe irä. Iwe, ra atururolong lon ewe fööimw, ewe ia ra piin op ie, o pineela mesen ewe fööimw ngeni fau mi watte. Iwe, ekewe fau ra chüen nom tori ikenai.

²⁸Iwe, lon ewe rän Josua a liapeni Maketa o ataela, a pwal niela ewe kingen lon o fokun arosala aramasan. Esap amanaua eman. A föri ngeni ewe kingen Maketa usun mine a piin föri ngeni ewe kingen Jeriko.

²⁹Mürin, Josua me nöün sounfiu meinisin ra feil seni Maketa o feila Lipna. Iwe, ra maun ngeni.

³⁰Iwe, ewe Samol mi Lapalap a pwal atolonga fän nemenien chon Israel ewe telinimw me an king. Iwe, Josua a niela chon o arosala chokewe meinisin mi nom lon, nge esap amanaua eman. A föri ngeni kingen ewe telinimw usun mine a piin föri ngeni ewe kingen Jeriko.

³¹Mürin, Josua me nöün sounfiu meinisin ra pwal feil seni Lipna o feila Lakis. Iwe, ra pwelifeili ewe telinimw fän ar pisekin maun o maun ngeni.

³²Nge ewe Samol mi Lapalap a atolonga Lakis fän nemenien chon Israel. Iwe, Josua a liapeni ewe telinimw lon aruuen rän o niela aramasen lon meinisin, usun mine a piin föri ngeni Lipna.

³³Mürin, Horam ewe kingen Keser a feito pwe epwe alisi chon Lakis. Nge Josua a niela ewe king me nöün sounfiu, tori esap chüen wor eman mi manau.

³⁴Iwe, Josua me nöün sounfiu meinisin ra feil seni Lakis o feila Eklon. Ra pwelifeili ewe telinimw fän ar pisekin maun o maun ngeni.

³⁵Iwe, ra liapeni ewe telinimw lon ewe chök ränin o niela aramasen lon meinisin, usun mine ra piin föri ngeni Lakis.

³⁶Mürin, Josua me nöün sounfiu meinisin ra feitä seni Eklon o feila Hepron. Iwe, ra maun ngeni.

³⁷Ra liapeni ewe telinimw o niela chon fiti ar we king. Ra pwal atai wisoposopun kewe o niela aramasen lor meinisin. Josua esap amanaua eman, nge a fokun ataala ewe telinimw o arosala aramasen lon meinisin, usun mine a piin föri ngeni Eklon.

³⁸Mürin, Josua me nöün sounfiu meinisin ra kul ngeni Tepir o maun ngeni.

³⁹Iwe, Josua a liapeni ewe telinimw me an we king pwal wisoposopun meinisin. Ra fokun niela aramasen lon meinisin. Josua esap amanaua eman. Usun mine a piin föri ngeni Hepron me Lipna me ar kewe king, iei usun a pwal föri ngeni Tepir me an king.

⁴⁰Iwe, Josua a liapeni unusen ewe fanü: ewe fanü mi chukuchukutä me ewe fanü Nekep, ewe fanü mi tekison me ewe fanü mi pal, a pwal liapeni ar kewe king. Esap amanaua eman, nge a fokun arosala meinisin, usun ewe Samol mi Lapalap ewe Koten Israel a allük.

⁴¹Iwe, Josua a akufu chon ekewe fanü seni Kates-parnea tori Kasa, unusen chon ewe fanü Kosen tori Kipeon.

⁴²Iwe, Josua a liapeni ekei king meinisin me fanüer fän eu chök, pokiten ewe Samol mi Lapalap ewe Koten Israel a maun fän iten chon Israel.