Joshua 15:2-21

²Re mathil ney ko yimuch e yan u ley ni yimuch ko fare gi day ni Dead Sea,

³me sor ko yimuch u Akrabbim Pass nge yan i mada’ nga Zin. Me yan ko yimuch u Kadesh Barnea, nge pag yu Hezron me yan nga Addar, me chiygog nge sor nga Karka,

⁴me yan u rom nga Azmon, me lek fachipa’ i lul’ ni bay ko mathil nu Egypt me yan i mus ko Day ni Mediterranean, ni aram e gin ni mus e fare mathil riy. Aram e mathil rok Judah ko yimuch.

⁵Ma mathil ko ngek e fare gi day ni Dead Sea fithingan, me yan i mada nga p’ebgul ni gin i tabab e lul’ riy ngafini yib i po’ nga langgin e Jordan. Fare mathil ko lel’och e aram e gin ni tabab riy,

⁶me sor u rom nga talang nge nga Beth Hoglah, me yib nge thilyeg yu Beth-arabah u ba’ ni lel’och. Ma aram me yan u rom ko fare Malang rok Bohan (I Bohan e be’ ni pumo’on ni fak Ruben),

⁷me yan u rom ko Loway ni wagagey fithingan nga talang u Debir, ma aram me chiygog ko lel’och nge yan nga Gilgal, ni bay u puluwon fare Kanawo nu Adummim u ba’ ni yimuch ko fare loway. Meyib u rom ko fapi alublub nu Enshemesh me yan nga Enrogel,

⁸me sor nga talang nge yan u lan fare Loway ni Hinnom ni bay u ba’ ni yimuch ko fachi burey, ni aram e gin’en u Jerusalem ni immoy fare binaw rok piyu Jebus riy. Miki forthog fare mathil u rom ngalang nga p’ebgul fachi burey u ba’ ni ngal ko fare Loway ni Hinnom, ni bay u ley ni lel’och ko fare Loway ni Refaim.

⁹Me yan u rom ko fapi Alublub nu Neftoah me yan i og nga langgin fapi binaw ni bay u to’oben e Burey ni Efron. Me cheal u rom nge yan nga Baalah (ara Kiriath Jearim),

¹⁰me chiygog ko ngal u Baalah nge sor i yan ko binaw nu Edom ni go’ burey, me yan u rom nga ba’ ni lel’och ko fare Burey ni Jearim (ara Kesalon), me log nga Beth Shemesh, me yan nge pag yu Timnah.

¹¹Me yan fare mathil u rom nga daken bochi burey ni bay ko lel’och u Ekron, me cheal nge sor i yan nga Shikkeron, nge pag e Burey ni Baalah, me yan u rom nga Jamnia. Me yan i mus fare mathil ko fare gi Day ni Mediterranean,

¹²ni aram e gin ni sum e mathil ko ngal riy. U lan e pi mathil ney e i par e girdi’ ko pi tabnaw rok Judah riy.

¹³Bang ko fare gi binaw rok Judah e ni pi’ ngak Kaleb nib mo’on ni fak Jefunneh, ni be’ ko fare ganong rok Judah, ya aray rogon ni yog SOMOL ngak Joshua ni nge rin’. I yag yu Hebron ngak, ni fare binaw nib milfan ngak Arba, ni chitamngin Anak.

¹⁴Me tuluf Kaleb e pi’in owchen Anak ngar chuwgad u lan fare binaw — ni aram fa yuke girdi’ rok Sheshai, nge Ahiman, nge Talmai.

¹⁵Me yan u rom ni nge cham ngak fapi girdi’ ni be par u Debir. (Re binaw ney e unog fithingan ni Kiriath Sefer.)

¹⁶Me ga’ar Kaleb, “Gu ra pi’ Aksah ni be’ ni bpin ni fakag nge le’engiy e re mo’on nrayag rok ni nge kol yu Kiriath Sefer.”

¹⁷Me Othniel ni be’ ni pumo’on ni fak Kenaz ni walagen Kaleb e kol fare binaw, ma aram me pi’ Kaleb i Aksah ni fare pin ni fak ni nge le’engiy Othniel.

¹⁸Ma rofen nm’agpa’row me towaser Othniel ngak le’engin ni nge ning bang e flang ngak Kaleb ni chitamngin. Me og Aksah nga but’ u daken e dongki rok, me fith Kaleb ngak ko mang e ba’adag.

¹⁹Me fulweg ni ga’ar, “Ba t’uf boch e alublub rog. Ya fare gi binaw ni kam pi’ ngog e bangi daken e ted nib mlik’ e but’ riy.” Ma aram me pi’ Kaleb fapi alublub u talang nge tin bay u pe’ning ngak.

²⁰Irera’ e re gi binaw nni pi’ ngak fapi tabnaw nu lan e ganong rok Judah ni ngar tafned.

²¹Pi binaw nib palog ko yimuch nib bmilfan ngorad, tin nib chugur ko mathil nu Edom, ni aram yu Kabzeel, ngu Eder, ngu Jagur,