Joshua 10:14-42

¹⁴Dawori yodorom reb e rran nga m’on riy, ara nga tomuren ni bod e re rran nem ni fol SOMOL rok be’ nib mo’on nge un ko mael ni bay u ba’ rok piyu Israel.

¹⁵Me sul Joshua nge salthaw rok nga Gilgal ko gin be par piyu Israel riy.

¹⁶Fa lal i pilung ko Amorite, e ra milgad ngranod ra mithgad ngalan ba yiy u Makkedah.

¹⁷Me pir’egrad be’ minog e gin yad be mith riy ngak Joshua.

¹⁸Me ga’ar, “Mu lobbiyed boch e malang nib ga’ nga langan fare yiy. Mi gimed tay boch e matnag u rom,

¹⁹machane gimed e dab mu pired u rom. Mu leked fapi to’ogor u wuryal ngam oggad ngorad; dab mu pagedrad ngar thapgad nga langgin fapi binaw rorad! I SOMOL ni Got romed e ke ta’med ni ngam gelgad ngorad.”

²⁰I Joshua nge pi’ pumo’on nu Israel e ra li’ed fapicha’ ngarm’ad, machane bochiyad e ra thapgad nga langgin e yoror ko binaw rorad mda kun li’rad ngarm’ad.

²¹Nimu’ me sul urngin e salthaw rok Joshua i yib ngak nga langgin fa gin yad ma par riy u Makkedah ndariy ban’en nike buch rorad. Dariy be’ u lan fare nam ni yag rok ni nge yog ban’en nib togopluw ngak piyu Israel.

²²Me’ere me ga’ar Joshua, “Mbinged langan fare yiy ngam feked fa lal i pilung nga wean i yib ngog.”

²³Ma aram min bing fare yiy, ma fapi pilung nu Jerusalem, ngu Hebron, ngu Jarmuth, ngu Lakish, ngu Eglon e ni fekrad u lan fare yiy nga wean

²⁴min fekrad i yan ngak Joshua. Me’ere me pining Joshua urngin e pumo’on nu Israel ni ngarbad ngak, me yog ngak e pi ga’ ko salthaw rorad ni ngar uned ngak ngar ted rifrifen ayrad nga daken belel’gun fapi pilung. Miyad rin’ ni aram rogon.

²⁵Ma aram me ga’ar Joshua ko fapi ga’ ko salthaw rok, “Dab mu rusgad ara mulan’med. Mu duwgiliyed lanin’med me pagan’med, ya ba’aray e n’en ni bayi rin’ Somol ngak urngin e to’ogor romed.”

²⁶Ma aram me li’ Joshua fapi pilung ngarm’ad me tiningrad nga l’ugun lal ke gek’iy, ni aram e gin i par e pi yam’ nem riy nge blayal’.

²⁷Ma nap’an ni aw e yal’ me yog Joshua ni ngan pilig fapi yam nga but’ nga nin’ nga langgin fare yiy ni ur mithgad u langgin kafram boch. Min tay e malang ni gagang’ nga langan fare yiy, ni kabay e pi malang nem u rom e chiney.

²⁸I Joshua e cham nge kol yu Makkedah nge pilung riy ni krofen nem. Me thang e pogofan rok urngin e girdi’ u langgin fare binaw; dakriy ta’abe’ ni pag ni kabfos. Ma n’en ni rin’ ngak fare pilung nu Jeriko e ku aram e n’en ni rin’ ngak fare pilung nu Makkedah.

²⁹Nga tomuren e ren’ey, me yan Joshua nge fa raba’ i salthaw rok u Makkedah nga Libnah ni mael.

³⁰Miki tayrad SOMOL ngkur gelgad ngak fare binaw nge pilung riy. Dar paged ta’abe’, ya ra thanged e pogofan rok urngin e girdi’ u rom. N’en ni rin’ed ngak fare pilung nu Jeriko e ku aram e n’en rrin’ed ko fare pilung.

³¹Ma nga tomuren e ren’ey, me yan Joshua nge salthaw rok u Libnah nga Lakish, mar longbiyed fare binaw ngar maelgad ngay.

³²Me tay SOMOL piyu Israel ngar gelgad ngak yu Lakish ko rofen ni gaman e l’agruw fen ngay nra maelgad. Nri ku bod rogon ni rrin’en u Libnah, dar paged ta’abe’, ya ra thanged e pogofan rok gubin e girdi’ nu langgin fare binaw.

³³Me yib Horan ni Pilung nu Gezer ni nge ayuweg yu Lakish, machane miki gel Joshua ngak nge salthaw rok ni dariy ta’abgayad nra paged ni kabfos.

³⁴Me migid me yan Joshua nge salthaw rok u Lakish nga Eglon, ngar longbiyed ngar maelgad ngay.

³⁵Ma ka rofen nem miyad kol fare binaw ngar li’ed gubin e girdi’ u rom ngarm’ad, nri bod rogon ni kar rin’ed u Lakish.

³⁶Ma nga tomuren e ren’ey me yan Joshua nge salthaw rok u Eglon ngar farthoggad nga fithik’ e burey nga Hebron, ngar chamgad ngay

³⁷ngar koled. Mar thanged e fan rok fare pilung nge gubin e girdi’ nu lan fare binaw ma ku’er i tay e pi yochi binaw nib chugur ngay. Me duwgiliy Joshua fare binaw ni ngan gathay nge aw ni dakuriy tulwen u but’, nri bod rogon ni kar rin’ned nga Eglon. Dariy ta’abe’ nra paged ni kabfos.

³⁸Are Joshua nge salthaw rok e ra sulod nga Debir ngar chamgad ngay.

³⁹Me kol fare binaw, nib mu’un e pilung riy ngay nge urngin e yochi binaw nib chugur ngay. Miyad thang e fan rok urngin e girdi’ u rom. N’en ni rin’ Joshua ngak yu Hebron nge yu Libnah nge pilung rorad e ri ku aram e n’en ni rin’ nga Debir nge pilung riy.

⁴⁰Miki kol Joshua fare nam ni ga’ngin. Me gel ngak fapi pilung ko fapi binaw ni go’ burey, nge pi binaw nu sigre’en e burey ko ngek, nge binaw u enggin e burey ko ngal, ma ku er rogon e tin bay ko pi binaw ndariy e ran riy ni bay ko yimuch. Dariy ta’abe’ ni digey; gubin e girdi’ nni thang e fan rorad. Irera’ e n’en nike yog SOMOL ni Got rok yu Israel ni ngan rin’.

⁴¹Joshua nge pi salthaw rok e ra maelgad u Kadesh Barnea ni bay ko yimuch u Gaza u to’oben e day, nib mu’un gubin yang u Goshen ngay, ranod ko lel’och ngar mada’gad nga Gibeon.

⁴²Gubin e pilung ntaferad e yu ngin’ey ni go’ gel Joshua ngorad me fekrad nge binaw rorad ni bochan e SOMOL ni Got rok yu Israel e be cham ni pa’ yu Israel.