Joni 5:6-22

⁶Anante mseno mani'negeno Jisasi'a negeno, za'za kna ana krifina mse'ne huno antahi'ne. Jisasi'a anage huno asmi'ne, Kagesama antahinana krika'a knare hugantesie hunka nentahino?

⁷Ana kri ne'mo kenona'a asmino, Ra vahe'moka timoma kazama nehanigeno navreno ome nantesia vahera omni'nege'na, ana'ana hu'na nevuge'za rumo'za tirupina nagtere'za unermize.

⁸Jisasi'a nentahino ana neku huno, Otinka, naverisaka'a renamginka e'nerinka vuo.

⁹Hantaka huno kri'amo atrentegeno, tafe'a erirenamgino e'nerino otino agafa huno kana vu'ne. Ana kna mni fruhu kna (Sabat) zupa ana kaguvazana hu'ne.

¹⁰Ana hige'za Jiu kva vahe'mo'za kri'ama eri amne huntea ne' antahige'naze, menina mni fruhu (Sabat) kna meno nagru hu'neankinka, naverisaka'a erinka vano osu'gahane.

¹¹Hianagi kri'a eri amne hu'nea ne'mo zamasmi'ne, agra aza'o kri'nima eri amne hu'nea ne'mo Agra nasmino, naverisaka'a erisaga hunka vuo huno hunante'ne.

¹²Zamagra, agrira antahige'naze, Iza ana nera huganteno, naverisaka'a eri kofinka vuo huno hugante'ne?

¹³Hianagi azeri so'ema hunte'nea ne'mo'a, iza anara hu'neo antahino keno osu'ne, na'ankure Jisasi'a maka vahepi ruhavia huno vu'ne.

¹⁴Henka Jisasi'a ana nera ra mono nompi ome kefore huno asmi'ne, ko, krika'a hago vgare, mago'ene kumira osuo, e'inama hanunka tusi'a knaza henka'a erigahane.

¹⁵Ana ne'mo'a atreno viazamo, Jiu vahera ome zamasmino, Jisasi kri'nia eri amane hunante'ne huno zamasmi'ne.

¹⁶E'inage hige'za, Jiu kva vahe'mo'za agafa hu'za Jisasina azanva hu'naze, na'ankure ana zantmina mago'a, mni fruhu kna (Sabat) zupa hu'nea zante ana hu'naze.

¹⁷Hianagi Agra zamasmino, Nenfa'a meninena eri'zana otreno e'neriankina, Nagra'nena eri'zana enerue.

¹⁸E'i ana agafare, Jiu kva vahe'mo'za Agri ahenaku mraguza'ati'za maka kanku hakre'naze. Na'ankure Agra mni fruhu kasege hantagia zantekukera ana osu'naze. Hagi Agra Anumzanku Nenfa'e nehuno, Agra Anumzane mago tragave hu'noe, hia zante'ene ahenaku hu'naze.

¹⁹E'inage hzageno Jisasi kenona zmirera amanage huno zamasmi'ne, Nagra tamagerafa hu'na neramasmue, Nemofo'a Agra'a avesitera mago'zana hugaosu'neankino, ke'nesigeno Nefa'ma huveri'nesia zanke, Nemofo'a anazanke hugahie.

²⁰Na'ankure Nenfa'a, Nemofona avesinenteno, Agra maka'zama nehia zana averi nehie. Ana nehuno Nefa'a agtereno tusi'aza averi hugahie. Anama hanigeta tamagra antri hugahaze.

²¹Na'ankure Nenfa'a fri' vahe'ma zamazeri otino, asimu nezmia kna huno, Nemofo'a azano, Agri'ma avesi'nimofona asimura amigahie.

²²Na'ankure Nenfa'a Agra veara refko osugahie. Hagi maka vahe'ma refko hu'zana, Nemofo ami'ne.