Yowan 5:6-22

⁶Ngan ye kene tani in Yesu ikamata yo ikenen nga, le nga lon tar nen tool i o matamatenge ikauu mukot. Motong la itoru nen, “Ai, ngan lom be tinim dook mulu, too?”

⁷Ngan tool tani se iraua betanga ki nen, “Atoo, tool mai, au i taukak tool yo be ilonau a ikau au a adu ran lono ye kene yo ran bolbolbe ye i. Au tauk i akapye be adu ran lono, bong di diek yo timuku nga, ngan ole tidada sukau a tidu ran lono, inbe akino.”

⁸Motong la Yesu iwete panga nen, “Kumadit! Kouo mie kiong a kupa.”

⁹Yesu iwete nen, le tina pattu leu, inbe tool tani in tinini dook mata mulu, inbe imadit a ikaua mie ki a ipa a ila. Ngan ye ke tani yo Yesu ikarata ye i, in ye lal kidi Yuda ke sungunu,

¹⁰le di Yuda tikamata yo ikaua mie ki a ipa nga, le nga tiwete panga nen, “Ai, katai nga lal kiidi Yuda ke sungunu, inbe ger kiidi igunkalidi be tayei dada yo nen ngan be.”

¹¹Bong ngan iraua betanga kidi nen, “Tool yo ikaratau a le tinik dook mata mulu i, in ya la iwete pau be akaua mie kiau a apa i.”

¹²Motong la titoru nen, “Sei tool iwete pong be kouo mie kiong a kupa i?”

¹³Ngan tool tani yo tinini dook mata mulu i, in lon sarere ye tool yo iwete panga nen i, yesoo Yesu la ikatbon di tooltool malala mai yo tiyepe ye ni tani in nga.

¹⁴Mooloo tiap, inbe Yesu ilo bareme mai ke sungunu lono, ngan ikamata tool tani in, le nga iwete panga. Iyei ne, “Kumata! Ong i tinim dook mata mulu oo. Le kin kuyei noonoo mulu be. Ole nen ngan moonoo san mulu yo dook tiap san i, in la be pombe pang yong i.”

¹⁵Motong la tool tani in ila la iwete pang di Yuda nen, “Tool tani yo ikaratau a le tinik dook mata mulu i, in Yesu.”

¹⁶Ngan so tina nga Yesu iyei ye lal kidi Yuda ke sungunu, ngan nen le di Yuda tina be tigarungu.

¹⁷Bong ngan Yesu iwete pang di nen, “Tamak i, kanakana ngan ikaua urata le taukan maryoongoo. Le au i ayei urata nen lapau.”

¹⁸Ye punu in la le di Yuda tikapye be tisere dada sa yo be tiraumate ye i. Yesoo, tiwete idada ger pono kidi ye lal ke sungunu leu tiap, bong iwete be Maro in ya taunu Tamana. Le ye betanga ki yo nen i, in iwete be ya in gaongo ben Maro lapau.

¹⁹Yesu ilongo tina yo di Yuda tiwete nen nga, motong la iraua betanga kidi nen, “Awete pang moolmool nen, Natunu i ke be iyeie so sa ye ya taunu lono tiap, bong ole iyei so yo ikamata Tamana iyei, ngan leu. Yesoo, soo so yo Tamana iyei nga, ngan Natunu ole iyei nen lapau.

²⁰Ngan Tamana lono pang Natunu mai san le ole ipatnai so le imot yo iyei nga, ngan panga. Inbe Tamana ole ipatnai so maimai kapala mulu panga le illos so yo nookoot kakamata iyei koot nga. Ngan nen le ole katakrai welewele ye.

²¹Le nen, Tamana in ipamadit di tooltool yo timmata koot nga le timaur mulu, inbe ikaua yepongo dook mata pang di. Ngan nanga, Natunu ole iyei nen lapau a ikaua yepongo dook mata yo taukan motingi in pang di tooltool ye ya taunu lono.

²²Inbe so san mulu in nen, Tamana in ole ikarata betanga ke tool sa tiap, bong urata tani ke karatanga betanga ke di tooltool i, in isuku la Natunu baene,