San Juan 5:6-22

⁶Hane xi cavëë Jesús xi cuatjin jiña cha hacuaha ha vëë me xi ha jemu tsëë hmu rë cha ne, cavinenguise me cha cuitjin: ―‍¿Há meje nuju xi cuma ndaja ngayun? ―‍Cuatjin cavinenguise Jesús.

⁷Hane cha hmu rë jan ne, cuitjin cafayangui cha: ―‍Tatá, tsajin yo xi tsinguisehen ná ndava nandá hora xi finiya nandá. Jinguyëjë rë xi tifë́ tiña ne, hacjahi me xi ha cavisehen. ―‍Cuatjin cafayangui cha.

⁸Ngajan xi Jesús ne, cuitjin cachja me cojo cha: ―‍Tisatjunhngun, chjuhun nijña nuju, sehe tujyuhunyun. ―‍Cuatjin cachja Jesús.

⁹Cha vëhë ne, ha tu ñahñu camandaja cha, cafaha cha nijña rë cha, cavetsihin catsujyihiya cha. Nixtin vëhë ne, nixtin xi chjahájenda rë.

¹⁰Ngajan xi xutaxa rë yungun ne, cachja me cojo cha xi camandaja jan cuitjin: ―‍Quihndë ne, nixtin xi chjahájenda rë. Ndajintjin xi cuatjin quichehe nijña riji. ―‍Cuatjin cachja me.

¹¹Hane cha xi camandaja jan ne, cuitjin cafayangui cha: ―‍Me xi casahmi xi camandaja ngahan ne, me vëhë cachja me cojo ná xi cjuahá nijña naha sehe tsujyëhëya. ―‍Cuatjin cachja cha.

¹²Ngajan xi xutaxa rë jan ne, cavinenguise nga me cuitjin: ―‍¿Hane yo xi cachja cojo ri xi chjehe nijña riji ne, sehe tujyihiye? ―‍Cuatjin cavinenguise me.

¹³Peru cha xi camandaja jan ne, hvíin cha yo ta, tsëhë xi Jesús ne, cavetjuxin me tsëhë cahndë́ vëhë, tsëhë xi jemu xutacjín quitsë me.

¹⁴Hane xi cavatju vëhë ne, cavechútáha Jesús cha ngajan yungun xi matitjun, hane cachja me cojo cha cuitjin: ―‍Chutsujun ni, camandaja ngayun. Quihndë ne, xicavinechunyuun sa ndiya rë cjuatsehen, sa tu choho sa cuatjun cuma. ―‍Cuatjin cachja Jesús cojo cha.

¹⁵Sehe cavetju cha quiji cachja cha cojo xutaxa rë ta me xi casahmi xi camandaja cha ne, Jesús.

¹⁶Vëhë xi xutaxa rë jan ne, tsujyihiyatjengui me Jesús cojo cjuahngatacun ta, tsëhë xi casahmi Jesús xcusun vëhë nixtin xi chjahájenda rë.

¹⁷Ngajan xi Jesús ne, cuitjin cachja me cojo xutaxa rë jan: ―‍Nahmi naha ne, hisca quihndë tisahmi me xa, hacuaha ngahan ne, tisahme xa. ―‍Cuatjin cachja Jesús.

¹⁸Ngatsë rë cjua vëhë ne, xutaxa rë jan ne, hitsë sa cavangui me chuva rë xi tsiquehen me Jesús. Cuatjin casahmi xutaxa rë ta, tsëhë xi hacuiin suvá ni cafaharcuaain Jesús nixtin xi chjahájenda rë ta hacuaha cachja me xi Nahmi rë me ne, Nina. Hane xi cuatjin cachja Jesús ne, tsingacun me xi tangun me cojo Nina.

¹⁹Ngajan xi Jesús ne, cuitjin cachja me cojo xutaxa rë xi cuacun jan: ―‍Cuichjá cojo nuju cjuaquixi ta ngahan xi Quihndi rë Nina ngahan ne, tsajin mé xi cuma sahme xi cojo cjuatacun naha suva ta xi vutsején xi sahmi Nahmi naha ne, vëhë xi sahme. Xcusun xi sahmi me vëhë ne, hacuaha xcusun vëhë sahme ngahan Quihndi rë me.

²⁰Nahmi naha ne, hmu cacun ná me, ngahan Quihndi rë me, hacuaha tsingacun ná me yëjë xcusun xi sahmi me. Hane xcusun xi sehe tsingacun ná me ne, hisca yehe sa xi cuma rë xcusun xi casahme xi camandaja cha hmu rë jan. Cuatjin cuma cojo sa xi ngayun ne, cjuercun nuju.

²¹Sacuatjin faha Nahmi naha nima sehe sua nga rë me cjuahñu ne, hacuanitjin ni ngahan Quihndi rë me ta suá rë cjuahñu yo xi meje suá rë.

²²Nahmi naha ne, tsajin yo tsichuva me cojo cjuatacun rë ta ntsa ngahan cavejña me yëjë xa vëhë,