Jon 5:7-44

⁷A musano ra i balu i lena, “Labino, kataio i ser warut iau sur in los tar iau una du bung ra a danim i tonton uni. Ra a nem na wan sur an rurus, ara gisen kut in kalabor mugu batbat pas iau.”

⁸O Iesu i watungi tano lena, “Un katutur, un los anum a bat ra un nan.”

⁹Uniutra a musano ra i langolango, i tur, ma i los pas anun a bat, ra i wan. A utna ri i wanpat una Bung na Sabat.

¹⁰I mo ra a ramano kum te Juda det watungi tan a musano ra o Iesu i ulangolango pasi lena, “A Sabat ri! I tabu sur din los a bat uni.”

¹¹Ra i balu det lena, “A musano ra i ulangolango pas iau, i watungi tang lena, an los pas anung a bat ra an nan.”

¹²Det tingi lena, “Osi na musano ra i watungi tam lena un los pas anum a bat ma un nan?”

¹³Ikut a musano ra ke tasman osi ra i ulangolango pasi, uni o Iesu i wan epotor tan a kunur na taro.

¹⁴Numur ut, o Iesu i barato pas a musano ra una rumu na etabor. I watungi tano lena, “Tama i, uniri u sa langolango. Gong melet mo u pam tu sakino, sako numur tu laulau na utna sakit in nanpat un ui.”

¹⁵A musano ra i wan ma i inanos a kum te Juda lena, “O Iesu ut i ulangolango pas iau.”

¹⁶Ra uniri, a kum te Juda det turpasi sur det in pam a kum sakino petutna torom o Iesu, uni i pam a kum utna ri una Bung na Sabat.

¹⁷O Iesu i watungi tandet lena, “O Tita ke mana nama pinapam na warut, lenkutkai ra iau kan mana nama pinapam na warut torom a taro.”

¹⁸Iri a kibino ra a kum te Juda det nem doko i sur det in um doko o Iesu. Det kankan torom o Iesu, awu sur i kibino kut ra i papam una Bung na Sabat. A kibino utkai ra o Iesu ut i watung o God lena o Tamano, ma una wasiso ri, i elaro i ut nam o God.

¹⁹O Iesu i balu det lena, “A inanos mot nama lingmulus, a Nutun o God ken pam oros pas tu utna elar nam anun a nemnem, in pami kut a kum utna ra i tama o Tamano i ser pami. Uni a kum utna rop ra o Tamano i pami, o Nutunu kai in pami.

²⁰O Tamano i nem o Nutunu, ma i ese i una kum utna rop ra i ser pami. Ma in ese i kai una kum utna ra i labo taun a kum utna ri, sur mot in kisin uni.

²¹O Nutunu in tabor det ra i nemi sur in tabor det nama nilaun, elar nam o Tamano i ukatutur pas a kum minat, ma i tabor det nama nilaun.

²²O Tamano ken warkurai taio, ikut i pitar tar a warkurai rop tan o Nutunu, sur in warkurai nami,

²³sur a taro rop det in ru o Nutunu elar nami ra det ru o Tamano. Osi ra ke ru o Nutunu ke ru i kai o Tamano, i ra i tulu ru i urin.

²⁴“A inanos mot nama lingmulus, osi ra i longoro anung a kum wasiso ma i nurnur un o naro ra i tulu ru iau urin, i sa utur ukai a nilaun tukum, ma ken iru una warkurai. I sa wan gusun a minat sur a nilaun tukum.

²⁵A inanos mot nama lingmulus, a du bung in nanpat, ma iri i sa wanpat, ra a kum minat det in longoro in nalngan a Nutun o God, ma det ra det longoro i det in laun.

²⁶O God a kimkibin a nilaun. Ma lenkutkai ra i pitari torom o Nutunu sur i kai a kimkibin a nilaun.

²⁷O God i pitar tar a dekdek tano sur in warkurai a taro nami, uni, i a Nutun a Musano.

²⁸Gong mot kisin una wasiso ri. A du bung in nanpat, ra det rop ra det inep una kum kulam na minat det in longoro in nalngano.

²⁹Det in katutur melet gusun a kum kulam na minat. Det ra det sa pam tar a wakak na petutna det in katutur melet gusun a minat sur a nilaun tukum. Ma det kai ra det sa pam tar a sakino petutna, det in katutur melet gusun a minat sur a iniru tukum.”

³⁰O Iesu i wasiso utmakai torom a kum te Juda lena, “Ka pam oros tu utna elar nam anung a nemnem. A warkurai nama utna a longoro i. Ma anung a warkurai i tokodos, ma ka mur a nuknuking, a ser muri ut a nuknukin o naro ra i tulu ru iau urin.

³¹Ra an wasiso talapor un iau ut melet, anung a wasiso talapor ken maut.

³²Ikut ara gisen ut i wasiso talapor un iau, ra a tasmani lena anun a wasiso talapor un iau i lingmulus sakit.

³³“Mot tulu ru ara taro torom o Jon a Tene Baptaiso, ra i wasiso talapor torom det un iau. Ma anun a wasiso i lingmulus.

³⁴Ka sibo sur lako taro det in wasiso talapor un iau, ikut a watungi lenri sur din ulaun mot.

³⁵O Jon i elar nama lam, ra i kunabor ma i talapor, ma mot gas ra mot tamtama lilik pas kut una talaporino.

³⁶“Ikut an inanos mot una wasiso talapor un iau, ra i labo taun a wasiso talapor anun o Jon un iau. A kum pinapam ra a ser pami, det wasiso talapor un iau lena, o Tita i tulu ru iau urin. O Tita i pitar tar a kum pinapam ra tang, sur an pami.

³⁷Ma o Tita, i ra i tulu ru iau urin, i sa wasiso talapor taru un iau. Ka mot longoro in nalngano, ma ka mot tama tari kai in matano.

³⁸Ma ka mot utur ukai anun a wasiso una kum balamot, uni ka mot nurnur un o naro ra di tulu ru i urin.

³⁹Mot ser luki ut a Buk Tabu, uni mot nuki lena mot in los a nilaun tukum uni. Ikut a Buk Tabu kai i wasiso ut un iau!

⁴⁰Ikut, mot a kum te Juda, ka mot nem na wan torom iau sur mot in los a nilaun.

⁴¹“Ka ling sur a taro det in ulabo pas iau.

⁴²Ikut a tasman mot ut lena, ka mot nem o God nama balamot mulus.

⁴³A wanpat nama risan o Tita, ma ka mot gas pas iau. Ikut ra taio gisen in nanpat nama risano ut, i ra, mot in gas pasi.

⁴⁴“Mot, mot nemi sur a taro det in ulabo pas mot, ikut a wasiso na ululabo anun o God, i ra ara God sot kut, ka mot tiktikin wakak suri. I mo ra ka mot nurnur un iau.