Jon 3:7-24

⁷Gong u kisin ra a watungi tam lena din usus matok mot.

⁸A wuwu i wan tuptupukus elar nam anun a nemnem. U longoro a wungu ino, ikut, ko tasmani lena i wan tagai, ma i wan urai. Lenkutkai ra torom det rop ra a Nion i usus matok det.”

⁹Ra o Nikodimas i tingi lena, “In pepetlai a utna ri?”

¹⁰O Iesu i balu i lena, “Ui a labino tene ususer anun a taro Israel, ma ilai ra ko tasman a kum utna ri?

¹¹A inanos ui nama lingmulus, met watung asau ra met tasmani, ma met wasiso un asau ra met sa tama tari, ikut ka mot nurnur un asau ra met wasiso uni.

¹²A inanos mot una kum utna taginin upiso ma ka mot nurnur uni. Mot in nurnur pepetlai ra an inanos mot una kum utna tagisapat una langit?

¹³Kataio i wan pas utmakai usapat netes una langit, a Nutun a Musano sot kut ra i wan pirso tagisapat netes una langit.

¹⁴Numugu, o Moses i ukete in nusui unin nanai una nubual kalako taro uni. Lenkutkai ra din ukete a Nutun a Musano usapat,

¹⁵sur det rop, ra det nurnur uni, det in laun tukum.

¹⁶“O God i maris a rakrakon bual, ra i pitar tar o Nutunu ara sot kut, sur osi ra in nurnur uni, in laun tukum ma ken iru.

¹⁷O God ke tulu tar o Nutunu urin una rakrakon bual sur in pitar a warkurai na minabalu torom a rakrakon bual. I tulu tari kut sur in ulaun a rakrakon bual.

¹⁸Osi ra i nurnur uni, ka din pitar a warkurai na minabalu toromi. Ikut, osi ra ke nurnur, i sa tur una dekdek na warkurai na minabalu uni ke nurnur un ara Nutun o God sot kut.

¹⁹Iri a warkurai anun o God: A talapor i sa wanpat una rakrakon bual, ikut a taro det nem a dumirum kut ma a talapor awu, uni det pam a kum sakino petutna.

²⁰Det rop ra det ser pam a kum sakino petutna, det nget a talapor, ma ka det wan suri, sako din tama pupuaso pas anundet a kum sakino petutna.

²¹Ikut, osi ra i murmur a lingmulus, i ser wanpat una talapor, sur din tama pupuaso i lena anun a kum pinapam i kibino ut tan o God.”

²²Numur, o Iesu tomo nam anun a kum nat na ususer det wan tagisapat o Jerusalem sur ara tamon lik kura una papor Judia. Det kis tiro iai, ma i baptaiso a taro.

²³O Jon kai i baptaiso tong o Ainon milau o Saleim, uni a susut na danim kura iai. A taro det wanan toromi sur in baptaiso det.

²⁴A utna ri i wanpat, ra kabaut di uruk o Jon una karabus.