Jon 21:5-24

⁵En imbin jingat langa olabat, “Main fren olabat, yumob bin gajim enijing?” En deibin tok, “Najing.”

⁶Wal Jisas bin dalim olabat, “Wal yumob tjakam det fishnet langa det raidensaid langa det bout, en yumob garra gajim sambala fish.” Wal deibin tjakam det net, en wen deibin trai blanga pulumbek, najing, dumaji deibin gajim detmatj fish.

⁷Wal det wekinmen weya Jisas bin laigim brabliwei bin dalim Pida, “Im wi Bos tharran!” En wen Pida bin irrim det wed, imbin repdimap miselp garram im kout, dumaji imbin deigimat sambala klos blanga fishingbat, en imbin jampin langa det woda, en imbin go swim langa Jisas.

⁸Wal detlot wekinmen nomo bin longwei brom det beingk garram det bout. Deibin oni 100 mita, en deibin pedulum det bout langa det beingk, en deibin stil pulumbat det net garram loda fish biyain langa det bout,

⁹en wen deibin kamat brom det bout, deibin luk lilwan faiya deya garram fish en damba,

¹⁰en Jisas bin dalim olabat, “Yumob bajimap sambala fish weya yumob bin gajim.”

¹¹Wal Saiman Pida bin gowin langa det bout, en imbin album detlot najalot wekinmen pulum det net langa beingk garram ola fish, en deibin abum 153 bigwan fish deya. En nomeda deibin abum detmatj fish, bat stil det net nomo bin breik.

¹²Afta na Jisas bin dalim olabat, “Yumob kaman en dagat.” En nobodi brom olabat bin wandi askim im enijing, dumaji deibin sabi imbin Jisas det Bos blanga olabat.

¹³En Jisas bin go langa det faiya, en imbin gajim sambala damba, en imbin gibit olabat, en imbin gibit olabat sambala fish du.

¹⁴Lagijat na Jisas bin shoum miselp thritaim langa im wekinmen olabat afta imbin gidap laibala brom dedbala.

¹⁵Afta wen detlot wekinmen blanga Jisas bin dagat det damba en fish, Jisas bin askim Saiman Pida, “Saiman, yu na det san blanga det olmen neim Jon. Wal yu dalim mi na. Yu laigim mi mowa langa ol detlot najalot wekinmen?” En Pida bin tok, “Yuwai, Bos. Yu sabi mi laigim yu.” Wal Jisas bin dalim im, “Wal yu lukaftumbat ola lilwan ship main.”

¹⁶Wanmo Jisas bin askim Pida, “Saiman, yu na det san blanga det olmen neim Jon. Wal yu dalim mi na. Trubala yu laigim mi?” En Pida bin tok, “Yuwai, Bos. Yu sabi mi laigim yu.” Wal Jisas bin dalim im, “Wal yu lukaftumbat ola ship main.”

¹⁷Wanmo igin Jisas bin askim Pida, “Yu laigim mi?” Wal Pida bin nogudbinji na, dumaji Jisas bin askim im thritaim, en imbin dalim im, “Bos, yu sabi ebrijing. En yu sabi mi laigim yu.” Wal Jisas bin dalim im, “Wal yu lukaftumbat ola ship main.

¹⁸En trubala ai dalim yu. Wen yubin yangbala, yubin oldei meigim miselp redi blanga go eniweya weya yubin wandi go. Bat wen yu olmen, yu garra pudumat yu bingga, en dei garra taiyimap yu en deigim yu weya yu nomo wandi go.” Lagijat na Jisas bin tok langa Pida,

¹⁹en imbin tok lagijat blanga shoum Pida hau im garra dai bambai, en hau im garra shoum ola pipul God im brabli haibala. Afta na Jisas bin dalim Pida, “Yu bulurrum mi.”

²⁰Wal Pida bin tenaran, en imbin luk det najawan wekinmen weya Jisas bin laigim brabliwei. Imbin det wekinmen hubin jidan wansaid langa Jisas wen deibin abum det laswan sapa, en im na bin askim Jisas hu garra hendimoba im langa detlot pipul hu garra kilim im ded langa det kros.

²¹Wal wen Pida bin luk det wekinmen, imbin askim Jisas, “Bos, wotabat im?”

²²Wal Jisas bin dalim Pida, “If ai wandim im garra jidan laibala raidap ai kambek, wal im nomo yu bisnis. Yu garra bulurrum mi.”

²³Wal wen Jisas bin tok lagijat blanga det wekinmen, det wed bin spredat ebriweya langa ola pipul hubin bulurrum Jisas, en deibin ol reken det wekinmen garra kipgon jidan laibala en nomo dai. Bat Jisas nomo bin tok det wekinmen kaan dai. Imbin tok, “If ai wandim im garra jidan laibala raidap ai kambek, wal im nomo yu bisnis.”

²⁴Wal det wekinmen na bin dalimbat ola pipul blanga detlot ting weya Jisas bin dumbat, en im na bin raidimdan ol detlot stori iya langa dijan buk, en wi holot sabi ol detlot ting weya imbin tok im trubala.