San Juan 21:5-24

⁵Jesús okintlajtlanij: ―Telpokamej, ¿ankinmajsikej michimej? Yejwan okinankilijkej: ―¡Amo!

⁶Jesús okinmilwij: ―Xiktlamotlakan in michmatlatl ik iyekma in barko, iwan ankinmajsiskej michimej. Ijkón okichijkej kiné, iwan satepan, mach ok oweliaj okikixtiayaj in michmatlatl porke okinkitzkijkej sa tekitl miekej michimej.

⁷Ijkuakón in momachtij katlej Jesús okitlasojtlaya, okilwij in Pedro: ―¡Yen toSeñor! San niman nijkuak ijkón okikakke in Simón Pedro nik yen Señor, omotzotzoltijtiwetzke, porke oyeka xitlatztik, iwan omotlamotlak ijtik atl.

⁸Oksekimej momachtijkej oajsitoj atlatentle itech barko, okitilantiayaj in michmatlatl tentok de michimej. Oyekaj san kanaj se sien metros de kan atlatentle.

⁹Nijkuak otemokej ipan tlale, okitakej se michin iwan se pan ipan tlixochtle.

¹⁰Jesús okinmilwij: ―Xikkualinkuikan sekimej michimej katlej yakin ankinkitzkijkej.

¹¹Simón Pedro otlejkok itech barko iwan okitilanke in michmatlatl asta atlatentle tentok de wejweyin michimej. Okinpoj, iwan oyekaj se siento iwan omenpoale iwan majtlaktle iwan eyi michimej. Maski okinkitzkijkej miekej michimej, mach otzayanke in michmatlatl.

¹²Jesús okinmilwij: ―Xiwikikan xitlakuakij. Iwan nion se imomachtijkaw mach omixewij okitlajtlanij akin Yej, porke kuale okimatiaj nik yen toSeñor.

¹³Satepan Jesús omijkuanij, okitilanke in pan iwan okinmajmakak. Iwan noijki ijkón okichij ika michin.

¹⁴Ika yon omochij ya eyi buelta okinmotitij in Jesús imomachtijkawan, satepan de omoyolkuik oksemi de ijkuak omikka.

¹⁵Satepan de otlanke otlakuajkej, in Jesús okitlajtlanij in Simón Pedro: ―Simón, ikone in Jonás, ¿tinechtlasojtla okachi ke momomachtijkaikniwan? Pedro okinankilij: ―Aján, Señor, tejwatzin kuale tikmati nik sa tekitl nimitzneki. Jesús okilwij: ―Xikintlakualti nochkakonewan.

¹⁶Jesús okitlajtlanij oksemi: ―Simón, ikone in Jonás, ¿tinechtlasojtla? Pedro okinankilij: ―Aján, Señor, tejwatzin kuale tikmati nik nimitzneki. Jesús okilwij: ―Xikinpia nochkawan.

¹⁷Ipan eyi buelta oksemi okitlajtlanij: ―Simón, ikone in Jonás, ¿melawak tinechneki? Nijkuak in Jesús okitlajtlanij ya eyi buelta kox melawak kineki, ijkuakón Pedro omoyolkokoj por ijkón okitlajtlanij. Iwan okinankilij: ―Señor, tejwatzin nochi tikmati. Tejwatzin kuale tikmati nik melawak nimitzneki. Jesús okilwij: ―Xikintlamaka nochkawan.

¹⁸Ipan melajka nimitzilwia, nijkuak otieka titelpochtle, otimotzotzoltiaya iwan otiaya san kan tej otiknekia. Pero nijkuak titetajtis, timajmasos iwan oksé mitztzotzoltis, iwan mitzwikas kan amo tiknekis tias.

¹⁹Jesús ijkón okijtoj para okinmatiltij kenik mikis in Pedro satepan, iwan kenik kiweyikixtis in Dios ika imikilis. Satepan okilwij: ―Xiwiki nowan.

²⁰Nijkuak in Pedro omokuepke, okitak in oksé imomachtijkaw katlej Jesús okitlasojtlaya, oyaya inkuitlapan, katlej oyeka itech in tiotlakantlakuale iwan omijkuanijka ik ielpan in Jesús, iwan okitlajtlanijka: “Señor, ¿akin mitztemaktis (mitztemaktilis)?”

²¹Nijkuak in Pedro okitak, okitlajtlanij in Jesús: ―Señor, ¿iwan yin tlakatl tlan mochiwas?

²²Jesús okilwij: ―Tla Nej niknekis ma mokawa asta ijkuak niwalmokuepas, tej mach motekiw. Tej xiwiki nowan.

²³Ijkuakón yon tlajtole oxoyawik (oxitinki) intech in momachtijkej tlaneltokakej, okimatkej nik nekáj momachtij mach mikis. Pero Jesús mach okijtoj nik mach mikis. Sino Yej okijtoj: “Tla Nej niknekis ma mokawa asta ijkuak niwalmokuepas, tej mach motekiw.”

²⁴Nekáj momachtij yen nej. Nej onikitak tlan otlapanok, iwan onikijkuiloj itech yin libro. Iwan namejwan ankimatij nik nochi tlan nikijta yon melawak.