Jon 21:13-24

¹³O Iesu i los pas a beret ma i tabor det nami, ra numur i tabor det bulung nama kiripo.

¹⁴Iri a mantul na dino ra o Iesu i wanpat torom anun a kum nat na ususer, numur tan anun a katkatutur melet gusun a minat.

¹⁵Ra det sa wangon rop, o Iesu i watungi tan o Saimon Pita lena, “Saimon, nutun o Jon, pepetlai, u nem doko iau taun det ri?” I balu i lena, “Lingmulus, Labino, u tasmani lena a nem ui.” O Iesu i watungi tano lena, “Un tabor anung a kum nat na sipsip.”

¹⁶O Iesu i manru u iting toromi lena, “Saimon, nutun o Jon, pepetlai, u nem doko iau?” I balu i lena, “Lingmulus, Labino, u tasmani lena a nem ui.” Ra o Iesu i watungi tano lena, “Un tamtamabat anung a kum sipsip.”

¹⁷Ra o Iesu i mantul u watungi tano lena, “Saimon, nutun o Jon, pepetlai, u nem iau?” O Pita i tupunuk, uni o Iesu i tingi a tulu dino lena, “U nem iau?” I watungi tano lena, “Labino, u tasman a kum utna rop. U tasmani lena a nem ui.” Ma o Iesu i watungi tano lena, “Un tabor anung a kum sipsip.

¹⁸“A inanos ui nama lingmulus, ra u barman, ui ut u ser mar pas ui, ma u ser wan una kum nubual ra u nem na wan iai. Ikut ra un takano, un kodos aru lamam, ma ara gisen ut in mar ui, ma in ben tar ui una nubual ra ko nem na wan iai.”

¹⁹O Iesu i watungi lenri, sur in ese a ngas na iniru ra in los o Pita. Un anun a iniru ra, in ulabo pas o God. Ra i sa watung tari lenri, i inanosi lena, “Un mur iau.”

²⁰O Pita i ger ma i tama a nat na ususer ra o Iesu i ser nem doko i, kura i mur der. A nat na ususer ra, i ra i ere torom o Iesu una nundet a ururop na inangon, ra i ting o Iesu lena, “Labino, osi ra in usobor tar ui?”

²¹O Pita i tama i, ra i ting o Iesu uni lena, “Labino, pepetlai un o naro ri?”

²²O Iesu i balu o Pita lena, “Ra a nemi sur in laun tuk an milet, awu sur a utna anumi. Ikut ui, un mur iau.”

²³A wasiso i wanpat epotor tan det ra det nisnisino una nurnur, lena a nat na ususer ri ken mat. Ikut o Iesu ke watungi lena ken mat, awu, i watungi kut lena, “Ra a nemi sur in laun tuk an milet, awu sur a utna anumi.”

²⁴A nat na ususer ri, i ra i wasiso puaso una kum utna ri, ma i tumus ukai i. Ma dat tasmani lena a kum utna ri i wasiso puaso uni, i lingmulus sakit.