Jon 19:15-42

¹⁵A taro Juda det kukukuk dekdek lena, “Sak doko i! Sak doko i! Sak wati unin nanai kutus!” O Pailat i ting det lena, “Mot nemi sur an sak wat anumot a king unin nanai kutus?” A kum lamlabino tene etabor torom o God det balu i lena, “A Sisa sot kut i anumet a king!”

¹⁶Ra o Pailat i pitar tar o Iesu torom a kum tene inaim, sur det in sak wati unin nanai kutus. Ra det ben ru pas o Iesu.

¹⁷O Iesu i pirso gusun a tamon Jerusalem, i los pas anun in nanai kutus ra i wan sur a nubual ra di watungi nama “Nubual na Lor na Minat,” ma una wasiso Ibru di watungi lena o Golgota.

¹⁸Tiro iai, di sak wat tari unin nanai kutus. Ma di sak wat aru musano kai tomo nami, una ru paporino, ma o Iesu i kete potor tander.

¹⁹Ma o Pailat i pitar a wasiso sur din tumus a tumtumus, sur din ubeki sapat netes unin nanai kutus. A tumtumus ra i lena:

²⁰A susut na taro Juda det luk a tumtumus ri, uni a nubual ra di sak wat o Iesu unin nanai kutus iai, i milau kut o Jerusalem, ma di tumus a tumtumus ri una tulu ngas na wasiso, a wasiso Ibru, Latin ma Grik.

²¹A kum lamlabino tene etabor torom o God det watungi tan o Pailat lena, “Gong u tumusi lena, ‘A King anun a taro Juda.’ Un tumusi kut lena, ‘A musano ri i watungi lena i a king anun a taro Juda.’”

²²O Pailat i balu det lena, “A tumtumus ra a sa tumus tari in lenutra.”

²³Ra a kum tene inaim det sa sak wat tar o Iesu unin nanai kutus, det los pas anun a kum malu ra i rakup bat anun a ememar nami, ma det isuaro pasi una a wat na tinibo, arara tene inaim anun ara tinibo. Det los pasi kai anun in namalu ra i pipisi. In namalu ra, katu sunusuk uni, in teken kudulano malu kut.

²⁴A kum tene inaim det wasiso etetalai torom det lena, “Gong dat rarosi, dat in pilai laki sur osi na pasandat in losi.” Det pami lenra sur din pam sot pas a wasiso na Buk Tabu. I watungi lena, “Det isuaro anung a kum malu un det, ma det pilai laki suri.” Iri a kum utna ra a kum tene inaim det pami.

²⁵O nan o Iesu i tur milau nisan in nanai kutus anun o Iesu. I tur tomo nama tisino a ino, ma o Maria kai a ino anun o Klopas, ma o Maria Magdalen.

²⁶O Iesu i tama o nano det tur tomo nam ara nat na ususer ra o Iesu i ser nem doko i, ra i watungi tan o nano lena, “Nang, o naro ra i, a nutumlik.”

²⁷I watungi kai tan a nat na ususer ra lena, “I ra i, o nam.” Turpasi ut una bung ra, a nat na ususer ra, i ben pas o nan o Iesu, sur in kis una nun a rumu.

²⁸O Iesu i tasmani lena i sa pam rop ru tar a kum pinapam, ra i watungi lena, “A muruk.” I watungi lenri sur in pam sot pas a wasiso ra di sa tumus tari una Buk Tabu.

²⁹In teken nokoto na wain ra i mititir kura i tiro. Det los pas ara utna ra i ser dop a polo, ra det puk pasi una wain ra. Det ubek pasi unin nanai ra di watungi namin isop, ra det tulsu toto i usapat sur a wan o Iesu.

³⁰Ra o Iesu i sa dop pas a wain ra, i watungi lena, “I sa rop.” I lukun pirso in lorino, ra i ubek ru anun a nilaun.

³¹A kum te Juda det saring o Pailat sur din sak pakpak tar a kum kikindetul, sur detul in mat lakit, ma din los pirso ru a pinindetul gusun a tulin nanai kutus, uni a bung ra, i a bung na waninar, a bung numugu tan ara labino Bung na Sabat, ma ka det nemi sur a pinindetul in kete una tulin nanai kutus una Bung na Sabat.

³²I mo ra a kum tene inaim det wan, ma det sak pakpak aru kikin a mugano musano, ra numur ara pasander bulung, ra di sak wat tomo detul nam o Iesu una tulin nanai kutus.

³³Ikut, ra det wanpat torom o Iesu, det tama i lena i sa mat, ra ka det sak pakpak aru kikino mo.

³⁴Ikut ara tene inaim i so a paporin o Iesu nama bele, ra a gap ma a danim i sal pirso mut.

³⁵A musano ra i tama a kum utna ri, i wasiso uni sur mot kai mot in nurnur. A utna ri i wasiso uni, i lingmulus, ma i ut i tasmani lena i lingmulus.

³⁶Di pam a kum utna ri sur din pam sot pas a wasiso ra di sa tumus tari una Buk Tabu lena, “Ka din sak pakpak tu surino.”

³⁷Di pam sot pas a wasiso na Buk Tabu kai lena, “Det in tama o naro ra det so tari.”

³⁸Numur, o Josep a te Arimatia i saring o Pailat sur a minatin o Iesu. I kai ara nat na ususer ra i ser mur eno i kut o Iesu, uni i ngaran a kum te Juda. Ra o Pailat i mulaot tari sur in nan ma in palos pirso pas a minatin o Iesu.

³⁹O Nikodimas, i ra numugu i wan torom o Iesu una ara bung na mirum, i kai i wanpat. I los pas ara utna ra i sangnain wakak, ra di pami tagun a mira ma a alo. A maut inder i elar nama tulu noino na kilogrem.

⁴⁰Der los pas a minatin o Iesu, numur der ubek a kum utna ra i sangnain wakak uni, ma der pulusi nama kum wakak na malu. A pinapam ra i elar nama ngasino anun a taro Juda, ra det ser pami una kum minat.

⁴¹Ara kinobot kura milau nisan a nubual ra di sak wat o Iesu unin nanai kutus iai. Ara matok na kulam na minat kura tiro, ra ka di inep i utmakai tu minat uni.

⁴²Det inep tar a minatin o Iesu una kulam na minat ra, uni i milau kut. Det pami lenra uni a bung ra, a bung na waninar, a bung numugu tan a Bung na Sabat anun a taro Juda.