Jon 19:1-15

¹Te gavman tuni bidi Pailat agai po olama, tama te ami bidi dabe augwaligo Jisas selama, tama aga tudide elali, te kibu waligo nigai dila pai bįgo.

²Tama augwaligo aga dali gisugu omainogo, augwaligo sesani yai bono selama, tobolu madi nigilama, tama Jisasgo tobolude muai. Tama augwaligo te mama yai nami ugwa selama, aga tigide muai.

³Tama augwaligo Jisas dali tibo posobo po weyu, “Siade dao, Juda we bidigo tuni bidi da” olama, tama augwaligo nogo sawaligo aga nabo gede elali. Augwaligo aga dolobo sę yainogo, te tiwai te ami bidi hauwago aga elidu geai.

⁴Te Pailat te Juda bage bidibo digi buluba ma aselama, te po wai, “Dagego suao, eno Jisas aga buluba odasa asobao, tama dagego konemainogo, eno agade magi dwai sę yali sęgę me subeo,” Pailatgo te po wai.

⁵Tama Jisas buluba asai, augwaligo te sesani yai bonogo nigali madi aga tobolude munaluai. Tama te mama yai nami ugwa me agai tigide me elaluai. Tama Pailatgo augwali dali te po wai, “Te olo bidi dagego suao,” te po wai.

⁶Te tama tialima, te pris tobolu bidi dabe dali, te enesigi bidi dali augwaligo Jisas sulama, tama augwaligo po dagą weyu, te po wai, “Te bidi ni pedaide elao, te bidi ni pedaide elao,” te Juda bage augwaligo te po wai. Tama Pailatgo augwali dali te po wai, “Duga digi aga selama, ni pedaide elao,” te po wai. “Eno agade magi sęgę me subeo,” te Pailatgo Juda bage dali te po wai.

⁷Juda bage augwaligo te gavman tuni bidi Pailat agai po wei ponoyu, te po wai, “Dago bomo yai po me deli tama telalubo. Niwai bidi agai ‘Ena da Godigo Ogwa dao’ obaso da, te bidi ela muao. Te bomo yai po agai bolobaso, aga isao,” augwaligo te po wai.

⁸Te Pailat agai te po odolama, tama aga wi genuai mu yai.

⁹Tama tibaso aga te gavman moni be tomoba ma pai. Tama agai Jisasbolo te po wai, “Nage mena badu bidi nage asai dawe?” Tiali goli, Jisas agai te Pailatgo po wei ponobeo.

¹⁰Tialima, Pailatgo Jisas dali te po wai, “Magi baso nago ena dali po wabewe? Eno nage olo tagala palabo bomo elalubao. Ma, eno nage ni pedaide elabo bomo me, te eno elalubao. Tama nago te konesiąyu ebawe?” te Pailatgo Jisas dali te po wai.

¹¹Te Jisasgo agai po wei ponoyu, te po wai, “Tialima, God dagalu ugwadu bidibo bidi agai bomo nagebolo magi menigi sogo da, te nago bomogo ena aiyaba elalugi menio. Tama tibaso, ena nago nogoba muani bidi, te bidi agai sęgę genuai mu eyu, tama nago sęgę aiyaba elaluaibao,” Jisasgo te po wai.

¹²Te Pailat agai Jisasgo te po odolama, tama agai Jisas olo tagala palabo tų gegai yai. Tiali goli te Juda bage augwaligo bomo elama po dagą weyu, te po wai, “Niwai bidi aga digi ‘Ena tuni bidi da’ weyu da, te bidi agai te Rom gavman tuni bidi Sisar dali boi bidi dao. Tama e bidi Jisas agai te tobage po wai dao. Tama tibaso, nago te bidi Jisas olo tagala palu da, te nage te Rom gavman tuni bidi Sisargo abagi menio, boi bidi tiwai bidaibao,” Juda bagego Pailat dali te po wai.

¹³Pailatgo te po odolama, tama agai te gavman moni be tomoba ma pelama, tama Jisas buluba sela asai. Tama Jisas buluba sela aselama, tama Pailat aga po tų odainogo duabo digi duawai, te bulu augwaligo nogi masigigo bidabo sai nigai digi dao wai. Tama te Hibru pogo te nogi tama wai, Gabata, te nogi tama wai.

¹⁴Te tebo sogo te bo disąwai nai tuabo si nogi Pasova te nai dodolobo side dao. Tama belo nai tubo te giliga tomo ebode tamao. Tama Pailatgo Juda bagebolo te po wai, “Duga tuni bidi suiyąo,” wai.

¹⁵Te augwaligo po dagą weyu, te po wai, “Te bidi sela sąyao, te bidi sela sąyao,” tama po wai, “Te bidi ni pedaide elao,” te po wai. Pailat tuni bidigo augwali Juda bage dali te po wai, “Dagego homugo eno duga tuni bidi ni pedaide elao, te homu ebawe?” Te pris hani tobolu bidi dabe augwaligo po wei ponoyu, te po wai, “Dago tuni bidi me menio, te dago tuni bidi te Sisar deli tama dao,” te bidi dabego tama po wai.