Jon 14:6-15

⁶Jises eme tiye sahou i ta Tomas, “Jo le ari jo san handru, ma jo kati iri sahou handru, ma kati kohan handru kameh udu le buku doh. Ari ndramak winiya bala hawe tama, bala rasan san ja bwe. Iy kameh keme badak bwena.

⁷Na idah ado ndratanan jo ndramwenen, ma idah kameh ado atanan tama udu mwasin labai. Ehe, na idah ili, aha kameh atanan iy udu mwasin labai, ma aha ndranyolom iy.”

⁸Pilip lelen Jises, “Ndramak tinan, ou leheya tamam keme taso, idoh le tinan udu budon taso.”

⁹Jises tiye i tan, “Pilip, jo udu hawe ado luluwen labai, arile buku sah handru ou bala tanam jo bwe? Are lau iy ndratou jo badeh, iy ndratou tama ale. I buku sah ja ou anya jo kaleheya tama kewek tado ja?

¹⁰Sebwe ou atehei budon tam handru in tek, ta jo in hawe tama, ma tama udu hawek. Iri sahou ale jo ndrasehek ndrawek tado badeh, jo basehek na budon tek amwenen bwe. Tama in hawek, eme iy le amekes iri gok tan amwenen.

¹¹Aha katehei budon taha keme tek ta sahou jo asehek anya, jo udu hawe tama, ma tama udu hawek ale. Buku sah, aha katehei budon taha kili le ta sahou jo asehek, tasah aha ndranyolom iri gok jo amekes.

¹²Jo tiye tado handru, are lau iri atehei budon tiri marakon eme le tek, idah kameh iri amekes iri gok i buku le gok jo amekes. Ehe, ma gok iri amekes idah kameh udu mwasin labai ja ta iri gok jo ndramekes. Tasah, jo kameh ilih hawe tama.

¹³Ma jo kameh amekes iri lakou marakon, buku aha ndremenya tama in ta nyarak. Eme ma tama kameh akohok nyaran i tinan i san ta nadun amwenen.

¹⁴Ehe, buku lakou marakon aha ndremenya in ta bwele-e nyarak, idah kameh jo winiyan bwidiy ma atehei ewek taha.”

¹⁵Jises eme asehek sahou ili toro lau tan, “I buku ado aso-ok jo labai, idah kameh ado ka-en hamon tiri sahou batanau tek.