Jon 13:1-38

¹A labino bung na lotu na Wanlakai i sa milau, ra o Iesu i tasmani lena i sa milau sur in nan mo gusun a rakrakon bual, ma in nan torom o Tamano. I maris doko anun a taro ra det kis una rakrakon bual, ra uniri i ese anun a labino marmaris torom det, a marmaris ra katu tuktukino.

²Una mirum, o Iesu tomo nam anun a kum nat na ususer det wangon tomo. Numugu tan anundet a inangon, o Satan i sa unuk tar o Judas Iskariot, a nutun o Saimon, sur in usobor tar o Iesu.

³O Iesu i tasmani lena, o Tamano i sa pitar rop tar a dekdek toromi, sur in warkurai sur a kum utna rop nami. Ma i tasmani lena i wan ut tagisapat tan o God, ma in milet melet torom o God.

⁴I mo ra i katutur pas gusun a inangon, i rakon ru anun in teken namalu ra i rakup bat anun a ememar nami, ra i los pas a tawol ma i ker pasi uni.

⁵I lingis pas a danim una besen ra i gos a kum kikin anun a kum nat na ususer nami, ma i wus sengesenge det nama tawol ra i ker pasi uni.

⁶I wan torom o Saimon Pita, ra o Pita i tingi lena, “Ai, Labino, ui un gos aru kiking?”

⁷O Iesu i balu i lena, “A utna ri a pami ko tasmani, ikut numur un tasmani.”

⁸O Pita i watungi lena, “Gong! Gong u gos aru kiking.” O Iesu i balu i lena, “Ra kan gos aru kikim, ui awu sur ara tagun iau.”

⁹O Saimon Pita i balu i lena, “Labino, gong u gosi kut aru kiking, un gosi utkai aru lamang ma in loring!”

¹⁰O Iesu i watungi tano lena, “Osi ra i sa rurus pas, a pinino rop i sa talapor, din gos tar aru kikino mukut. Mot, mot sa talapor, ikut, awu sur mot rop.”

¹¹O Iesu i sa tasman tar o naro ra in usobor tari. Iri a kibino ra i watungi lena, “Awu sur mot rop mot talapor.”

¹²I sa gos tar a kum kikindet, ra i ubek melet pas anun in namalu ra i rakon ru tari, i kis melet ma i ting det lena, “Mot tasmani ut a utna ri a pami un mot?

¹³Mot watung iau a ‘Tene Ususer’ ma a ‘Labino’. I tokodos ut anumot a wasiso, uni a risang ut ra.

¹⁴Iau anumot a Labino ma a Tene Ususer, ma a sa gos tar a kum kikimot. I wakak sur mot kai mot in ser gos etetalai a kum kikimot.

¹⁵A sa pam tar a larlar ri torom mot, i wakak sur mot kai mot in pami lenri a pami.

¹⁶A inanos mot nama lingmulus, a tultul ke labo taun anun a labino. Ma osi ra di tultulu i, ke labo taun o naro ra i itula.

¹⁷Ra mot tasman a kum utna ri, ma mot pami, mot in dan.

¹⁸“Awu sur a wasiso un mot rop, a tasman det ut ra a sa pilok pas det. Ikut din pam sot pasi ut a wasiso ra di sa tumus tari una Buk Tabu lena, ‘A musano ra mir wangon tomo nami, in tupukus taru melet sur iau, ma in pas pisopiso iau.’

¹⁹A inanos mugu tar mot una utna ri ra in nanpat. Ra in nanpat, mot in nurnur lena, iau a Karisito.

²⁰A inanos mot nama lingmulus, osi ra i gas pas o naro ra a tulu i, i gas pas iau utkai. Ma osi ra i gas pas iau, i gas pasi utkai o naro ra i tulu ru iau urin.”

²¹O Iesu i sa watung tari lenri, ra i taramo a labino mamaut una niono, ra i watung puaso i lena, “A inanos mot nama lingmulus, ara tagun mot in pitar tar iau ulaman a kum ebar.”

²²A kum nat na ususer det tama etetalai det, ikut ka det tasmani lena osi tagun det ra i watung a wasiso ri uni.

²³Ara nat na ususer i kis milau o Iesu. A nat na ususer ri, o Iesu i ser nem doko i.

²⁴O Saimon Pita i pet ukinalong pas a nat na ususer ra, ma i watungi lena, “Un ting o Iesu lena, osi ra i watung a wasiso ri uni.”

²⁵A nat na ususer ra, i ere torom o Iesu ra i tingi lena, “Labino, osi ra u watung a wasiso ri uni?”

²⁶O Iesu i balu i lena, “An puk pas a du beret una dis, ma osi ra an pitari tano, i ut ra.” Ra i puk pas a du beret, ma i pitari tan o Judas Iskariot, a nutun o Saimon.

²⁷O Judas i rakon pas a du beret gusun o Iesu, ra o Satan i ruk taru mut uni. Ra o Iesu i watungi tan o Judas lena, “A utna ra u nem na pami, un pam lakiti.”

²⁸Ikut kataio tagun det ra det kis tomo una inangon i tasmani lena sur asau ra o Iesu i watungi lenra toromi.

²⁹O Judas i ser tamtamabat anundet a mani. Ma iri a kibino ra a ramano kum nat na ususer det nuki lena, o Iesu i inanosi sur in kul lako utna ra det sibo suri una labino bung na lotu. A ramano kum nat na ususer kai det nuki lena o Iesu i inanosi, sur in tabor a kum sibo na taro nam tu utna.

³⁰Ra o Judas i rakon pas a du beret, i pirso pas mut. Ma i sa mirum.

³¹Ra o Judas i sa wan taru, o Iesu i watungi tandet lena, “Uniri din mar a Nutun a Musano, ma o God kai in los a minamar uni.

³²O God in los a minamar uni, ma o God in pitar a minamar torom a Nutun a Musano. Uniutra o God in pitari tano.

³³“A kum paspasang, uniri kan kis suano i mo torom mot. Mot in sisio sur iau. Ikut, a wasiso ra a sa watung tari tan a kum te Juda, uniri an watungi bulung tamot lena, ‘A tamon ra an nan suri, ka mot in nan lar pas iai.’

³⁴“Uniri a pitar a matok na warkurai torom mot lena, mot in nem etetalai mot. Mot in nem etetalai mot elar nami ra a nem mot.

³⁵Ra mot in nem etetalai mot, a taro rop det in tasmani lena mot anung a kum nat na ususer.”

³⁶O Saimon Pita i tingi lena, “Labino, un nan urai?” O Iesu i balu i lena, “A tamon ra an nan suri, kon nan lar pas iai uniri, ikut numur un mur iau.”

³⁷O Pita i tingi lena, “Labino, sur asau ra kan mur ui uniri? Ka ngara ra an mat bat ui.”

³⁸Ra o Iesu i balu i lena, “Pepetlai, a lingmulus ut ra un mat bat iau? A inanos ui nama lingmulus, a kereke ken kurkurirakuk utmakai, ra un ipul a tulu dino lena, ko tasman iau.”